दुष्काळी जत तालुक्याला पावसाने झोडपले; पाच्छापूर, खलाटी, सोरडी पूल पाण्याखाली

जत तालुक्यातल्या दुष्काळी पूर्व भागामध्ये तुफान असा पाऊस पडला आहे. त्यामुळे काही ठिकाणी पूल पाण्याखाली गेले आहेत. तर ओढे-नाले तुडुंब भरून वाहत आहेत.

जत / नवराष्ट्र न्युज नेटवर्क : जत तालुक्यातल्या दुष्काळी पूर्व भागामध्ये तुफान असा पाऊस पडला आहे. त्यामुळे काही ठिकाणी पूल पाण्याखाली गेले आहेत. तर ओढे-नाले तुडुंब भरून वाहत आहेत. तसेच तीर्थक्षेत्र असणाऱ्या गुड्डापुर येथील मंदिरात पाऊसामुळे जलमय झाल्याने गुडघाभर पाण्यातून भक्तांनी प्रदक्षिणा घालण्याची वेळ आली आहे.

जत तालुक्यातील पाऊसाची मोजलेली आकडेवारी खालीलप्रमाणे

जत ७८ मि.मी, शेगांव २८ मि.मी, सर्वाधिक माडग्याळ गणात ८३ मि. मी. नोंद झाली आहे. तर मुचंडी ७३ मि.मी डफळापूर ५४ मि.मी, तर उमदीला ७३ मि.मी, संख ४५ मि.मी, कुंभारी २८ मि.मी, नोंद झाली आहे.

दुष्काळी जत तालुक्यातही गेल्या बारा तासापासून मान्सूनपूर्व धुवाधार असा पाऊस पडत आहे. पूर्व भागात पावसाची संततधार ही अद्याप कायम आहे. गेल्या अनेक वर्षातील हा सर्वात मोठा मान्सूनपूर्व पाऊस असल्याचे सांगण्यात येत आहे.या पावसाने कोकणची अनुभूती येत आहे.

तालुक्यात सर्वत्र हा पाऊस सुरूच असून बहुतांशी ओढे, नाले तुडुंब भरून वाहत आहेत. त्यामुळे वळसंग ते सोर्डी रस्ता पुलावरून पाणी वाहत असल्याने बंद झाला आहे. तसेच पाच्छपूर, खलाटी, उमराणी, बिळुर, मुचुंडी, शेगाव, वाळेखिंडी, जत शहर आदी भागात जोरदार पाऊस झाला आहे. पावसाने मोठा दिलासा दिला असला तरी काही पिकांचे नुकसान ही झाले आहे.