वाहतूक कोंडी टळणार ! पुण्यातील ‘या’ परिसरात अवजड वाहनांवर बंदी; नियम मोडल्यास थेट…

वाहनचालक नशेत नसल्याची खात्री, वैध परवाना आणि संबंधित वाहनांची संपूर्ण माहिती प्रकल्पाच्या संकेतस्थळावर अद्ययावत ठेवणे बंधनकारक करण्यात आले आहे. सध्या परिसरात अनेक गृहप्रकल्प व व्यापारी प्रकल्पांची कामे सुरू आहेत.

पिंपरी : हिंजवडी आयटी पार्क परिसरात अवजड वाहनांमुळे वाढलेल्या अपघातांच्या पार्श्वभूमीवर पुणे महानगर प्रदेश विकास प्राधिकरणाने (पीएमआरडीए) निर्णायक पावले उचलली आहेत. परिसरात अवजड वाहनांच्या प्रवेशावर आता वेळेचे निर्बंध, चालकांची नशेची तपासणी आणि वाहतूक नियमांचे पालन या अटी बंधनकारक करण्यात आल्या आहेत. नियमांचे उल्लंघन करणाऱ्या बांधकाम व्यावसायिकांची कामे तात्पुरती थांबवण्यात येणार आहेत, असा इशारा पीएमआरडीएकडून देण्यात आला आहे.

अपघातांच्या मालिकेनंतर प्रशासन सतर्क झाल्याचे दिसून येत आहे. अवजड वाहनांमुळे हिंजवडी व आसपासच्या भागात गेल्या काही महिन्यांत अनेक अपघात घडले असून, काहींना आपला जीव गमवावा लागला आहे. त्यामुळे आयटी कर्मचाऱ्यांनी काही दिवसांपूर्वी प्रशासनाकडे ठोस उपाययोजनांची मागणी करत मोर्चा काढला होता. या पार्श्वभूमीवर सोमवारी पीएमआरडीएच्या अधिकाऱ्यांची व बांधकाम व्यावसायिकांची बैठक झाली. या बैठकीत हिंजवडी, माण, म्हाळुंगे परिसरात पोलिसांनी निश्चित केलेल्या वेळेतच अवजड वाहनांना प्रवेश द्यावा, असा निर्णय घेण्यात आला.

हेदेखील वाचा : पुणे पोलिसांकडून 2038 पर्यंतचे नियोजन; वाहतुकीचा वेग कसा वाढणार?

तसेच वाहनचालक नशेत नसल्याची खात्री, वैध परवाना आणि संबंधित वाहनांची संपूर्ण माहिती प्रकल्पाच्या संकेतस्थळावर अद्ययावत ठेवणे बंधनकारक करण्यात आले आहे. सध्या परिसरात अनेक गृहप्रकल्प व व्यापारी प्रकल्पांची कामे सुरू आहेत. बांधकाम साहित्य सिमेंट, लोखंड, गिट्टी इत्यादींच्या वाहतुकीसाठी अवजड वाहनांचा वापर आवश्यक असला, तरी त्यांची वेळ व मार्ग नियोजनाशिवाय हालचाल होत असल्याने नागरिकांच्या सुरक्षेला धोका निर्माण झाला आहे.

वाहतूक कोंडी आणि सुरक्षेचे प्रश्न गंभीर

हिंजवडी-माण हा भाग शहरातील प्रमुख आयटी पट्टा असून, सकाळी आणि सायंकाळी हजारो आयटी कर्मचारी प्रवास करतात. या गर्दीच्या वेळेत अवजड वाहने धावत असल्याने वाहतूक कोंडी, अपघात आणि अडचणींचा सामना करावा लागत आहे. या समस्येवर उपाययोजना करण्यासाठी पीएमआरडीएचे महानगर आयुक्त डॉ. योगेश म्हसे यांनी स्पष्ट निर्देश दिल्याचे सांगण्यात आले.

काम थांबवण्याचा इशारा

हिंजवडी परिसरात १० सप्टेंबर रोजी एका काँक्रीट मिक्सरखाली दुचाकीस्वार महिलेचा मृत्यू झाल्याची घटना घडली होती. या घटनेनंतर संबंधित वाहनचालकावर गुन्हा नोंदवण्यात आला. याआधारे सदर वाहन ज्या बांधकामासाठी कार्यरत होते, त्या प्रकल्पाची परवानगी स्थगित करण्याचा निर्णय पीएमआरडीएने घेतला आहे, अशी माहिती पीएमआरडीएचे जनसंपर्क अधिकारी डॉ. ज्ञानेश्वर भाले यांनी दिली.