मनोज जरांगे पाटलांच्या गावात लक्ष्मण हाकेंवर दगडफेक; बीडमध्ये तणावपूर्ण वातावरण

आरक्षणाच्या मुद्द्यावरुन बीडचे वातावरण तापले आहे. मनोज जरांगे पाटील यांच्या मातोरी या गावामध्ये लक्ष्मण हाके यांच्या यात्रेवर दगडफेक करण्यात आली आहे. यावर धनंजय मुंडे यांनी देखील प्रतिक्रिया दिली आहे.

बीड : राज्यामध्ये मराठा आरक्षण व ओबीसी आरक्षणावरुन तणावपूर्ण वातावरण निर्माण झाले आहे. मनोज जरांगे पाटील हे मराठा आऱक्षण ओबीसीमधून घेण्याबाबत आग्रही आहेत. तर मराठा समाजा ओबीसी आरक्षणाला धक्का न लावता स्वतंत्र आरक्षण द्यावे अशी मागणी लक्ष्मण हाके यांनी केली आहे. हाके यांनी 10 दिवस उपोषण देखील केले. शिष्टमंडळाच्या मध्यस्थीनंतर हाके यांनी आपले उपोषण स्थगित केले आहेत. तसेच महाएल्गार यात्रा घेत अभिवादन करत आहे. दरम्यान, बीडमधील मनोज जरांगे पाटील यांच्या गावामध्ये लक्ष्मण हाके यांच्या यात्रेवर दगडफेक करण्यात आली आहे. यामुळे वातावरण पुन्हा एकदा पेटण्याची शक्यता आहे.

लक्ष्मण हाके यांनी सिंदखेडराजा येथून त्यांच्या यात्रेला सुरुवात केली. यानंतर त्यांची यात्रा बीड जिल्ह्यातील कासार तालुक्यातील मातोरी गावात आलेले असताना बसस्टॅँडवर दगडफेक झाली. या घटनेत काहीजण जखमी असल्याचे माहिती समोर येत आहे. या दौऱ्यात त्यांच्याकडे डीजेसह अनेक उपकरणे होते. प्राथमिक वृत्तानुसार डीजे वाजवण्यावरून दोन गट आमने सामने आले. यावेळी मातोरी येथील बसस्टॅण्डवर दगडफेक देखील झाली. या दगडफेकीनंतर गावात तणावपूर्ण वातावरण होते. त्यामुळे पोलिसांकडून अधिक सुरक्षा व्यवस्था देण्यात आली आहे. यासंदर्भात बीडचे पालकमंत्री धनंजय मुंडे यांनीही एक्स पोस्टद्वारे माहिती दिली आहे.

 

बीडमधील या प्रकारानंतर पालकमंत्री धनंजय मुंडे यांनी सोशल मीडियावर पोस्ट करत लक्ष असल्याचे सांगितले आहे. मुंडे यांनी लिहिले आहे की, “बीड जिल्ह्यातील शिरूर कासार तालुक्यात मातोरी परिसरात घडत असलेल्या घटनाक्रमावर मी लक्ष ठेवून आहे. पोलीस प्रशासनास तातडीने घटनास्थळी जाऊन परिस्थिती नियंत्रणात आणण्याचे निर्देश दिले आहेत. माझी बीड जिल्ह्यातील सर्व जनतेला विनंती आहे की कायदा व सुव्यवस्था बिघडविण्याचा कोणीही प्रयत्न करू नये, तसेच जिल्ह्यातील सामाजिक सौहार्द बिघडू देऊ नये…” असे मत धनंजय मुंडे यांनी व्यक्त केले आहे.