
Maharashtra Breaking News Today 17.11.2026
17 Nov 2026 09:25 AM (IST)
सातारा जिल्ह्यातील पाटण तालुक्यातील तारळी पंप स्टोरेज प्रकल्पावरून मोठा वाद निर्माण झाला आहे. राष्ट्रीय वन्यजीव मंडळाची पूर्वपरवानगी न घेताच अदानी प्रकल्पाचे काम सुरू असल्याचा ठपका ठेवत पाटण वनविभागाने १३ नोव्हेंबर रोजी प्रकल्पाच्या अधिकृत स्वाक्षरीदाराला नोटीस बजावून काम तात्काळ बंद करण्याचे आदेश दिले आहेत.
याप्रकरणी १५ नोव्हेंबर रोजी प्रसिद्ध अभिनेते सयाजी शिंदे आणि प्रकल्पविरोधी लढ्याचे नेते विवेकानंद पाटील यांनी प्रत्यक्ष प्रकल्पस्थळी भेट देऊन पाहणी केली. हे काम पूर्णपणे अनधिकृत असल्याचा आरोप करत त्यांनी पाटण पोलीस ठाण्यात तक्रारही दाखल केली असून, यामुळे हा वाद आणखी चिघळण्याची शक्यता वर्तवली जात आहे.
17 Nov 2026 09:15 AM (IST)
ऊसाला पहिली उचल ३५०० रुपये मिळावी या मागणीसाठी राजू शेट्टी यांच्या नेतृत्वात सोलापूर जिल्हाधिकारी कार्यालयाबाहेर सोमवारी शेतकऱ्यांनी जोरदार आंदोलन केले. रात्री उशिरा पालकमंत्र्यांच्या अध्यक्षतेखाली १९ नोव्हेंबरला बैठक निश्चित झाल्याने तोपर्यंत आंदोलन स्थगित करण्यात आले आहे. मात्र, या बैठकीत तोडगा न निघाल्यास सोलापूर रेल्वे स्टेशनवरील वाहतूक बेमुदत रोखण्याचा इशारा राजू शेट्टी यांनी दिला आहे. दुसरीकडे, साताऱ्यात स्वाभिमानी शेतकरी संघटनेच्या आंदोलनाला पहिले यश मिळाले असून, जिल्हाध्यक्ष राजू शेळके यांच्या नेतृत्त्वाखाली सुरू असलेल्या आंदोलनानंतर 'शिवनेरी शुगर्स'ने ऊसाला प्रतिटन ३९०० रुपये पहिली उचल जाहीर केली आहे.
Maharashtra to World Breaking News :
कोल्हापूर ‘गोकुळ’ दूध संघाचे अध्यक्ष व संचालक अनुदानाच्या मागणीसाठी मुख्यमंत्री देवेंद्र फडणवीस यांची भेट घेणार आहेत. वन्यजीव विभागाची आवश्यक मंजुरी नसल्याने महाराष्ट्र सरकारने अदानी समूहाच्या ‘तारळी जलविद्युत प्रकल्पाला’ (Tarali Hydropower Project) स्थगिती दिली आहे.
बंगालच्या उपसागरातील ‘अकवान’ (Cyclone Akvan) चक्रीवादळाचे आज तीव्र चक्रीवादळात रूपांतर होण्याची शक्यता हवामान विभागाने (IMD) वर्तवली असून आंध्र प्रदेशच्या किनारपट्टीला सतर्कतेचा इशारा दिला आहे. जम्मू-काश्मीरमधील कुलगाम येथे सुरक्षा दलांनी राबवलेल्या शोधमोहिमेत लष्कर-ए-तोयबाचा मुख्य कमांडर लतीफ भटसह दोन दहशतवाद्यांचा खात्मा केला.
चीनमधील शेन्झेन येथे १९ नोव्हेंबर रोजी अमेरिकेचे राष्ट्राध्यक्ष डोनाल्ड ट्रम्प, चीनचे राष्ट्राध्यक्ष शी जिनपिंग आणि रशियाचे राष्ट्राध्यक्ष व्लादिमीर पुतिन यांच्यात पहिली ऐतिहासिक त्रिपक्षीय शिखर परिषद होणार असल्याची अधिकृत घोषणा.