Maharashtra Lok Sabha Election 2024 : बारामती मतदारसंघातून सुप्रिया सुळेंचा विजय झाला आहे. ही लढाई खूपच मोठी प्रतिष्ठेची झाली होती. कारण पवार विरुद्ध पवार अशी लढाई होती, परंतु एकाच कुटुंबातील ही लढाई होती. यामध्ये खरी लढाई शरद पवार विरुद्ध अजित पवार यांच्यामध्ये होती. या निवडणुकीदरम्यान मोठ्या प्रमाणात आरोप-प्रत्यारोप झाले, त्याचबरोबर बळाचा वापर झाला. परंतु, मतदाराजांचा कौल आता समोर आला आहे.
मतदानाच्या दिवशी पैशांचा वापर
सुप्रिया सुळेंच्या विजयानंतर अजित पवारांची मोठी गोची झाली आहे. कारण यामध्ये त्यांच्या प्रतिष्ठा मोठ्या प्रमाणात लागली होती. अगदी मतदानाच्या दिवशीसुद्धा अजित पवारांकडून पैशांचा वापर झाल्याचे आरोप रोहित पवारांनी केले होते. प्रचारादरम्यान तर रोहित पवारांच्या डोळ्यातील अश्रूसुद्धा दिसून आले. त्यामुळे ही लढाई मोठ्या प्रमाणात भावनिक झाल्याचे पाहायला मिळाली.
सुप्रिया सुळेंना महाविकास आघाडीकडून तिकीट
राष्ट्रवादी काँग्रेस पक्ष फुटून दोन गट पडल्यानंतर अजित पवारांचा गट भाजपाप्रणित महायुतीत आणि राज्याच्या सरकारमध्ये सहभागी झाला. तर शरद पवारांचा पक्ष महाविकास आघाडीबरोबर विरोधात उभा राहिला आहे. या मतदारसंघात शरद पवार गटाने विद्यमान खासदार सुप्रिया सुळे यांना पुन्हा एकदा लोकसभेचं तिकीट दिलं होतं.
अजित पवारांनी पत्नी उतरवले रिंगणात
तर अजित पवार यांनी त्यांच्या पत्नीला म्हणजेच सुनेत्रा पवार यांना या मतदारसंघातून लोकसभेच्या रिगणात उतरवलं होतं. त्यामुळे बारामती लोकसभा मतदारसंघात नणंद विरुद्ध भावजय असा संघर्ष चालू आहे. या संघर्षात नणंदबाई म्हणजेच सुप्रिया सुळे यांनी बाजी मारल्याचं चित्र पाहायला मिळत आहे.
लोकसभा निवडणुकीनंतर मतमोजणीच्या एकूण १८ फेऱ्या असतात. बारामती मतदारसंघातील मतमोजणीच्या १६ फेऱ्या पूर्ण झाल्या असून सुप्रिया सुळे यांना तब्बल ९३,८२८ मतांची निर्णायक आघाडी मिळाली आहे. मतमोजणीला सुरुवात झाल्यापासून सुप्रिया सुळे यानी आघाडी मिळवली असून मतमोजणीच्या प्रत्येक फेरीनंतर ही आघाडी वाढत गेली आहे. आता केवळ दोन फेऱ्यांमधील मतमोजणी बाकी असून सुप्रिया सुळे जवळपास विजयाच्या समीप असल्याचं चित्र पाहायला मिळत आहे. त्यामुळे शरद पवार आणि सुप्रिया सुळेंनी त्यांच्या बारमतीचा गड राखण्यात यश मिळवल्याची सर्वत्र चर्चा आहे.
.png "Videos"){kind=small}
