21 हजार पोलीस, 10 हजार CCTV आणि AI ची गर्दीवर करडी नजर, गणेश विसर्जनासाठी पोलिसांचा कडेकोट बंदोबस्त

मुंबईत ६ सप्टेंबरला होणाऱ्या गणेश विसर्जनासाठी बॉम्बस्फोटाच्या धमकीनंतर सुरक्षा वाढविण्यात आली आहे. पहिल्यांदाच AI चा देखील उपयोग करण्यात येत आहे, इतकंच नाही तर 21 हजार पोलिसांची फौज तैनात आहे

• गणपती विसर्जनासाठी कडेकोट सुरक्षा
• पोलिस मोठ्या प्रमाणात तैनात
• CCTV, AI ची देखील मदत

मुंबईत मूर्ती विसर्जनादरम्यान कायदा आणि सुव्यवस्था राखण्यासाठी २१ हजारांहून अधिक पोलिस कर्मचारी तैनात केले जातील.पहिल्यांदाच, पोलिस मार्ग व्यवस्थापन आणि इतर वाहतूक संबंधित अद्यतनांसाठी कृत्रिम बुद्धिमत्तेचा अर्थात AI चा वापर करतील. राज्य राखीव पोलिस दलाच्या १४ कंपन्या, केंद्रीय सशस्त्र पोलिस दलाच्या चार कंपन्या, जलद प्रतिक्रिया पथक आणि बॉम्ब निकामी पथक (BDDS) देखील तैनात केले जातील.

PTI ने दिलेल्या वृत्तानुसार, बॉम्बस्फोटाच्या धमकीमुळे पोलीस अधिक सतर्क झाले असून कायदा आणि सुव्यवस्था नीट रहावी यासाठी पोलिसांनी वेगवेगळ्या ठिकाणी खबरदारी घेतली आहे. मुंबईत विसर्जनाच्या ठिकाणी कडेकोट बंदोबस्त करण्यात आला आहे. कसा आहे बंदोबस्त जाणून घ्या 

देखरेखीसाठी १० हजार CCTV

संयुक्त पोलिस आयुक्त (कायदा आणि सुव्यवस्था) सत्यनारायण चौधरी यांनी सांगितले की, बृहन्मुंबई महानगरपालिकेच्या मदतीने पोलिसांनी सुरक्षा व्यवस्था तयार केली आहे. विसर्जन स्थळांवर जीवरक्षक देखील तैनात केले जातील. शहरातील १० हजार सीसीटीव्हींसह गर्दीवर लक्ष ठेवण्यासाठी ड्रोनचा वापर केला जाईल, तर खाजगी ड्रोन उडवण्यास बंदी घालण्यात आली आहे.

‘मुंबईकरांनी अफवांकडे लक्ष देऊ नये’

याशिवाय मुंबईकरांना अफवांकडे लक्ष देऊ नये आणि कोणत्याही संशयास्पद हालचालीची तक्रार करू नये असे आवाहन पोलिसांनी केले आहे. Midday नुसार, शनिवारी सुमारे सात हजार सार्वजनिक गणेशमूर्तींचे विसर्जन केले जाईल, ज्यासोबत १० दिवस चालणारा गणेशोत्सव संपेल. गेल्या १० दिवसात मुंबईत असणारी धूम उद्या संपणार आहे. 

Navi Mumbai : गणपती विसर्जनासाठी नवी मुंबई पोलिसांचा मोठा बंदोबस्त; ठिकठिकाणी करडी सुरक्षा

मुंबईला बॉम्बस्फोटाची धमकी 

मुंबईला बॉम्बस्फोटाची धमकी देण्यात आली आहे. धमकीच्या संदेशात दावा करण्यात आला आहे की 14 पाकिस्तानी दहशतवादी भारतात घुसले आहेत. स्फोट घडवण्यासाठी ४०० किलो आरडीएक्स वापरला जाईल. धमकीच्या संदेशानंतर सुरक्षा कडक करण्यात आली आहे. मुंबई पोलिस हाय अलर्टवर आहेत. गुन्हे शाखेने या धमकीची चौकशी सुरू केली आहे. दहशतवादविरोधी पथक (ATS) आणि इतर एजन्सींनाही माहिती देण्यात आली आहे.

गुरुवारी मुंबई पोलिसांच्या वाहतूक विभागाच्या What’s App हेल्पलाइनवर आलेल्या संदेशात दावा करण्यात आला आहे की 14 दहशतवादी शहरात घुसले आहेत. दहशतवाद्यांनी स्फोट घडवण्यासाठी 34 वाहनांमध्ये ४०० किलो RDX ठेवले आहे. मुंबईत स्फोट घडवण्यासाठी आरडीएक्सचा वापर केला जाईल. ज्यामुळे एक कोटी लोकांचा मृत्यू होऊ शकतो. धमकी पाठवणाऱ्या व्यक्तीने स्वतःला लष्कर-ए-जिहादी दहशतवादी संघटनेचा सदस्य म्हणून सांगितले आहे. मात्र या धमकीनंतरही मुंबई विसर्जनासाठी सज्ज झाली आहे. तसंच अशा अफवांवर विश्वास न ठेवण्याचे आवाहन पोलिसांनी सोशल मीडियाद्वारेही केले आहे. 

Mumbai Bomb Threat: मुंबईत बॉम्बस्फोटाची धमकी, पोलीस म्हणाले, ‘घाबरण्याची गरज नाही अलर्ट….’