बुधवार, 21 ऑक्टोबर 2026
एसटी बँकेच्या २३.९७ कोटींच्या कामांच्या फाईल्स गायब? आर्थिक गुन्हे शाखेकडे चौकशीची मागणी (फोटो सौजन्य-ChatGPT)
बँकेच्या एकूण ४० शाखांमध्ये अंतर्गत सजावट आणि फर्निचर दुरुस्तीची कामे करण्यासाठी निविदा प्रक्रिया राबवण्यात आली होती. निविदा क्रमांक १३/२५-२६ अंतर्गत या कामांशी संबंधित तीन फाईल्स असल्याचे बरगे यांनी म्हटले आहे. त्यांच्या आरोपानुसार, यापैकी एका फाईलमधील काही महत्त्वाची कागदपत्रे गहाळ झाली आहेत, तर उर्वरित दोन फाईल्स पूर्णपणे गहाळ झाल्या आहेत. महत्त्वाच्या आर्थिक व्यवहारांशी संबंधित कागदपत्रे अशा प्रकारे गायब होणे गंभीर बाब असल्याचे त्यांनी म्हटले आहे.
बरगे यांनी दिलेल्या माहितीनुसार, संबंधित तीन कामांचे करार मूल्य अनुक्रमे १६ कोटी ७० लाख ८८ हजार रुपये, ३ कोटी ३४ लाख १७ हजार ६८५ रुपये आणि ३ कोटी ९१ लाख ७६ हजार रुपये आहे. या तीनही कामांची एकत्रित किंमत २३ कोटी ९६ लाख ८१ हजार ६८५ रुपये, म्हणजेच जवळपास २३.९७ कोटी रुपये होते.
या निविदा प्रक्रियेत आर्थिक गैरव्यवहार आणि अनियमितता झाल्याचा आरोपही बरगे यांनी केला आहे. त्यामुळे निविदा प्रक्रियेची मूळ कागदपत्रे आणि संबंधित फाईल्स गहाळ झाल्याचा दावा अधिक गंभीर असल्याचे त्यांनी म्हटले आहे.
महत्त्वाची कागदपत्रे आणि फाईल्स गहाळ होणे ही केवळ प्रशासकीय निष्काळजीपणाची बाब मानता येणार नाही, असा दावा बरगे यांनी केला आहे. कथित आर्थिक गैरव्यवहार किंवा अनियमितता लपविण्यासाठी पुरावे नष्ट करण्याचा प्रयत्न झाला आहे का, याची चौकशी होणे आवश्यक असल्याचे त्यांचे म्हणणे आहे. मात्र, हे सर्व बरगे यांनी केलेले आरोप असून, चौकशीनंतरच नेमकी वस्तुस्थिती स्पष्ट होणार आहे.
या प्रकरणाचे गांभीर्य लक्षात घेऊन बरगे यांनी आर्थिक गुन्हे शाखेच्या पोलिस आयुक्तांकडे निवेदन दिले आहे. गहाळ झालेल्या फाईल्स नेमक्या कुठे गेल्या, त्या कोणाच्या ताब्यात होत्या, त्यातील कागदपत्रे कधी आणि कोणत्या परिस्थितीत गहाळ झाली तसेच निविदा प्रक्रियेत आर्थिक अनियमितता झाली का, याची सखोल चौकशी करण्याची मागणी त्यांनी केली आहे. तपासात गैरव्यवहार किंवा पुरावे नष्ट केल्याचे निष्पन्न झाल्यास संबंधितांविरुद्ध फौजदारी कारवाई करण्यात यावी, अशी मागणीही बरगे यांनी केली आहे.
या आरोपांमुळे हजारो एसटी कर्मचाऱ्यांशी संबंधित असलेल्या स्टेट ट्रान्सपोर्ट को-ऑपरेटिव्ह बँकेच्या निविदा प्रक्रियेवर प्रश्न उपस्थित झाले असून, आता या प्रकरणात संबंधित यंत्रणांकडून काय कारवाई केली जाते, याकडे एसटी कर्मचाऱ्यांचे लक्ष लागले आहे.
St Employees Salary : एसटी कर्मचाऱ्यांना मोठा दिलासा! वेतन वाढीचा थकीत हप्ता बँक खात्यात जमा
