Nanded News: काँग्रेसमध्ये राहून भाजपला मदत…? काँग्रेसच्या ११ बंडखोरांची हकालपट्टी, कोण आहेत ते?

आतापर्यंत पक्षाचा अधिकार, आधार घेऊन पक्षाचा वापर स्वतः साठी करुन पक्ष संकटात असताना आणि ऐन निवडणुका सुरू असताना काहींनी पक्षाशी प्रतारणा करत बंडखोरी केली.

• काँग्रेसच्या ११ बंडखोरांची हकालपट्टी
• पक्षादेश डावलून अपक्ष म्हणून निवडणूक लढवण्याचा पवित्रा
• भाजपला मदत व काँग्रेसला अडचण व्हावी म्हणून बंडखोरी

Nanded News: निलंगा नगरपालिका निवडणुकीत काँग्रेस पक्षाच्या उमेदवारांच्या विरोधात पक्षादेश डावलून अपक्ष म्हणून निवडणूक लढवित असलेल्या एकूण ११ जणांची पक्षशिस्तेचे पालन न केल्याचा ठपका ठेवून पक्षातून हकालपट्टी केल्याचे पत्र प्रदेशाध्यक्ष हर्षवर्धन सपकाळ यांच्या सूचनेवरून वरिष्ठ उपाध्यक्ष अॅड. गणेश पाटील यांनी दिल्याचे काँग्रेसचे जिल्हाध्यक्ष अभय साळुंके यांनी सांगितले.

महायुतीमध्ये 2 नंबर कोण? रवींद्र चव्हाण म्हणाले “त्याला काहीच किंमत नाही”; शिंदेंना लगावला टोला?

निलंगा नगरपालिका निवडणुकीत काँग्रेस पक्षाने गटतट न पाहता गुणवत्तेवर तिकीट वाटप करून स्वच्छ चारित्र्याचे, जनतेच्या सतत संपर्कात राहणारे एकूण २३ नगरसेवक आणि एक नगराध्यक्ष पदाचा उमेदवार दिला असून नगराध्यक्ष पदासह पूर्ण बहुमताने आपले पॅनल शंभर टक्के निवडून येणार आहे.

परंतु काँग्रेसच्या काहींनी भाजप (BJP)  आमदाराशी हातमिळवणी करून भाजपला मदत व काँग्रेसला (Congress)  अडचण व्हावी म्हणून नगराध्यक्ष आणि दहा नगरसेवक पदासाठी बंडखोर अपक्ष उमेदवार उभे केले. उभे करणाऱ्यांसंदर्भात निवडणुकीनंतर आम्ही सविस्तर अहवाल देऊ, मात्र उघड बंडखोरी करणाऱ्या उमेदवारांची तत्काळ हकालपट्टी करावी, अशी मागणी शहर व तालुका काँग्रेस कमिटीच्या वतीने जिल्हा निरीक्षक बाळासाहेब देशमुख यांना कळवले होते. त्याचे गांभीर्य लक्षात घेऊन देशमुख यांनी वरिष्ठांकडे अहवाल पाठवला असता प्रदेशाध्यक्ष सपकाळ यांच्या सूचनेवरून अॅड. पाटील यांनी ही कारवाई केली.

पुण्यात तरुणावर कोयत्याने सपासप वार, सिमेंटच्या गट्टूनेही मारहाण; नेमकं काय घडलं?

यांच्यावर झाली कारवाई

बंडखोर नगराध्यक्षपदाचे उमेदवार महमदखॉ पठाण, नगरसेवकपदाचे उमेदवार लक्ष्मीताई वांजरवाडे, बालाजी कांबळे, साजिद करीम शेख, लक्ष्मी अमोल सोनकांबळे, दीपक चोपणे, पवन पोतदार, रंजना इहजीत कांबळे, शाबाद युसुफजानी करदी आणि यशोदा विश्वनाथ कांबळे यांची हकालपट्टी केल्याचे पत्र प्रसिद्ध केल्याची माहिती जिल्हाध्यक्ष अभय साळुंके यांनी दिली.

कार्यकर्त्यांमधून समाधान

आतापर्यंत पक्षाचा अधिकार, आधार घेऊन पक्षाचा वापर स्वतः साठी करुन पक्ष संकटात असताना आणि ऐन निवडणुका सुरू असताना काहींनी पक्षाशी प्रतारणा करत बंडखोरी केली. यामुळे प्रदेशाध्यक्ष हर्षवर्धन सपकाळ यांनी तत्काळ निर्णय घेत त्यांच्यावर हकालपट्टी करण्याचे पत्र जिल्हा कमिटीला दिली. यामुळे त्यांच्यावर कारवाई करण्यात आल्याने कार्यकर्ते समाधान व्यक्त करत आहेत.