Nashik News: “मंदिरात ऊर्जा नाही; रातोरात पाडून टाका…”, वैजेश्वर मंदिराबाबत कॅप्टन खरातचा अजब सल्ला

वावी येथील १२१७ सालातील यादवकालीन वैजेश्वर मंदिर पाडण्याचा ‘ऊर्जा नाही’ असा दावा करत कॅप्टन अशोककुमार खरात यांनी दिलेला सल्ला पुन्हा चर्चेत आला. ग्रामस्थ संभ्रमात पडले आणि अखेरीस या विषयाला बगल देण्यात आली.

• वैजेश्वर मंदिराबाबत कॅप्टन खरातचा अजब सल्ला
• मंदिर रातोरात पाडून टाकून नव्याने मंदिर उभारावे
• खरातने आपल्या ईशान्येश्वर मंदिराचे महात्म्य वाढावे

सिन्नर : वावी येथे असलेल्या सुमारे इसवी सन १२१७ सालात बांधलेल्या यादवकालीन पुरातन वैजेश्वर मंदिराबाबत भोंदू बाबा कॅप्टन अशोककुमार खरात यांनी दिलेला अजब सल्ला आता पुन्हा चर्चेत आला आहे. मंदिरातील शिवलिंग क्षीण झाले असून त्यात कोणतीही ‘ऊर्जा’ उरलेली नाही, गावासाठी हे मंदिर अरिष्ट आहे. त्यामुळे हे मंदिर रातोरात पाडून टाकून नव्याने मंदिर उभारावे, असा सल्ला त्यांनी ग्रामस्थांना दिल्याची माहिती समोर आली आहे. ही घटना सुमारे चार वर्षांपूर्वी घडल्याचे समजते. खरातने आपल्या ईशान्येश्वर मंदिराचे महात्म्य वाढावे, या कुटील हेतूनेच त्यांनी वैजेश्वर मंदिर पाडण्याचा सल्ला दिला होता, असा आरोप आता ग्रामस्थांकडून केला जात आहे.

इतिहासाच्या नोंदीनुसार हे मंदिर काशी विश्वेश्वराचे स्थान मानले जाते. धार्मिक व ऐतिहासिक दृष्ट्या महत्त्व असलेल्या या मंदिराला केंद्रीय पुरातत्त्व विभागाचे संरक्षण असल्याने त्यात कोणताही हस्तक्षेप केल्यास कायदेशीर कारवाई होऊ शकते. ही बाब लक्षात घेऊन ग्रामस्थांनी खरात यांच्या सल्ल्याकडे दुर्लक्ष केल्याचे सांगितले जाते. वैजेश्वर मंदिराच्या जीर्णोद्धारासाठी मार्गदर्शन मिळावे या अपेक्षेने काही स्थानिक तरुणांनी खरात यांना बोलावले होते. मात्र त्यांनी मंदिर पाडण्याचा सल्ला दिल्याने ग्रामस्थ संभ्रमात पडले आणि अखेरीस या विषयाला बगल देण्यात आली.

जग्गू, जग्गू सर्च इट’ म्हणत मोबाईल अॅपकडून उत्तर

ग्रामस्थांच्या माहितीनुसार, कॅप्टन अशोककुमार खरात त्या वेळी मोबाईलमधील एका अॅपचा वापर करत होते, मोबाईलकडे जग्गू, जग्गू सर्व इट” अशी कमांड देत ते काही प्रश्न विचारत असत. त्यानंतर त्या अॅपमधून येणाऱ्या उत्तरांवरून मंदिराची क्षमता क्षीण झाल्याचा, तसेच शिवलिंगातील शक्ती नष्ट झाल्याचा दावा ते ग्रामस्थांसमोर करत होते. मोबाईलवरील या प्रक्रियेमुळे उपस्थित काही ग्रामस्थांचा क्षणभर या प्रकारावर विश्वासही बसला होता. मात्र नंतर ग्रामस्थानी या दाव्यांकडे दुर्लक्ष करत या विषयाला बगल दिली.

… बरे झाले नादी लागलो नाही!

ग्रामस्थांच्या मते, त्या वेळी खरात मोबाईलमधील एका अॅपद्वारे विचित्र भाषेत प्रश्न विचारत होते आणि त्यातून मिळालेल्या उत्तरांच्या आधारे मंदिर ‘गावासाठी घातक’ असल्याचा दावा करत होते. त्यांच्या या दाव्यामुळे उपस्थित लोक काही काळ गोंधळून गेले होते. त्यावेळी त्यांच्या सांगण्यावर विश्वास ठेवला असता तर गावातील या ऐतिहासिक मंदिराचे अस्तित्व धोक्यात आले असते आणि कायदेशीर अडचणीही ओढवल्या असत्या, अशी चर्चा सध्या गावात रंगली आहे. ‘त्यावेळी या भानगडीत पडलो नाही, हेच बरे झाले, ‘असे म्हणत मंदिर जीर्णोद्धारासाठी पुढाकार घेणाऱ्या तरुणांनी सुटकेचा निश्वास सोडला आहे.