गुरुवार, 15 ऑक्टोबर 2026
Pune-Saswad Road Dive Gha
बारामती : पुणे-सासवड मार्गावरील दिवे घाटात वाहतूक सुरक्षित आणि वेगवान करण्यासाठी आता ‘मिसिंग लिंक’ उभारण्याची गरज निर्माण झाली आहे. संत ज्ञानेश्वर महाराज पालखी महामार्गांतर्गत दिवे घाटाच्या रुंदीकरणाचे काम सुरू असले, तरी केवळ रस्ता रुंद करून वाहतुकीच्या भविष्यातील समस्या सुटणार का, असा प्रश्न उपस्थित होत आहे. घाटातील डोंगरांचे स्वरूप, दरडी कोसळण्याची संभाव्य भीती आणि दिवसेंदिवस वाढणारी वाहनांची संख्या लक्षात घेता, या मार्गासाठी दीर्घकालीन पर्यायाचा गांभीर्याने विचार करण्याची वेळ आली आहे.
पाणीकपातीचा निर्णय रद्द करा, अन्यथा…; मनसेचे पुणे महापालिका प्रशासनाला निवेदन
दिवे घाट हा पुणे-सासवड मार्गावरील महत्त्वाचा आणि वर्दळीचा घाट आहे. या मार्गावरून जेजुरी, बारामती, फलटण आणि पंढरपूरकडे जाणाऱ्या वाहनांची मोठी वर्दळ असते. धार्मिक पर्यटन, औद्योगिक वाहतूक, मालवाहतूक आणि दैनंदिन प्रवासामुळे या मार्गावरील वाहतुकीचा ताण वाढत आहे. अशा परिस्थितीत घाटाचे रुंदीकरण करताना डोंगरांच्या कड्यांमध्ये मोठ्या प्रमाणावर खोदकाम झाल्यास भविष्यात दरड कोसळण्याचा धोका वाढण्याची शक्यता व्यक्त केली जात आहे.
कोकणातील आंबोली घाटात पावसाळ्यात दरडी कोसळण्याच्या घटनांमुळे वाहतुकीला अडथळे निर्माण होतात. दिवे घाटातही भविष्यात अशा स्वरूपाच्या दुर्घटना घडू नयेत, यासाठी आतापासूनच सुरक्षिततेच्या उपाययोजनांना प्राधान्य देणे आवश्यक आहे. घाटातील भूगर्भीय परिस्थितीचा अभ्यास करूनच रुंदीकरण आणि संरक्षणाची कामे केली जात आहेत का, याकडेही लक्ष देण्याची गरज आहे.
दुसरीकडे, पुरंदर तालुक्यातील प्रस्तावित विमानतळ प्रकल्पामुळे या परिसरातील पायाभूत सुविधा आणि दळणवळणाचे महत्त्व भविष्यात आणखी वाढण्याची शक्यता आहे. विमानतळाच्या कामाला गती मिळाल्यानंतर पुणे-सासवड परिसरात वाहनांची वर्दळ वाढू शकते. त्यामुळे आजच्या वाहतुकीचा विचार करून नव्हे, तर पुढील काही दशकांच्या गरजा लक्षात घेऊन नियोजन करणे आवश्यक ठरणार आहे.
मुंबई-पुणे द्रुतगती मार्गावरील मिसिंग लिंकच्या धर्तीवर दिवे घाटासाठीही पर्यायी बोगदा किंवा स्वतंत्र जोडमार्ग उभारण्याच्या शक्यतेचा अभ्यास व्हावा. यामुळे घाटातील वाहतुकीचा ताण कमी होण्यास, प्रवास अधिक सुरक्षित होण्यास आणि भविष्यातील वाहतूक कोंडी टाळण्यास मदत होऊ शकते. दिवे घाटाचे रुंदीकरण हा तात्पुरता उपाय ठरू नये; भविष्यातील सुरक्षित आणि सक्षम दळणवळणासाठी ‘मिसिंग लिंक’चा पर्याय गांभीर्याने तपासण्याची गरज आहे.
