Leopard Captured : मर्सिडीज-बेंझ कंपनीतील बिबट्या अखेर जेरबंद; थरारक मोहिमेनंतर वन विभागाला यश

चाकण वनपरिक्षेत्रातील मर्सिडीज-बेंझ कंपनीच्या प्रकल्प परिसरात शिरलेल्या बिबट्याला अखेर दोन दिवसांच्या थरारक शोधमोहीमेनंतर वन विभागाने रविवारी रात्री जेरबंद केले आहे.

• मर्सिडीज-बेंझ कंपनीतील बिबट्या अखेर जेरबंद
• थरारक मोहिमेनंतर वन विभागाला यश
• कर्मचाऱ्यांनी सोडला सुटकेचा निश्वास

चाकण : चाकण वनपरिक्षेत्रातील मर्सिडीज-बेंझ कंपनीच्या प्रकल्प परिसरात शिरलेल्या बिबट्याला अखेर दोन दिवसांच्या थरारक शोधमोहीमेनंतर वन विभागाने रविवारी रात्री जेरबंद केले आहे. विशाल उत्पादन प्रकल्पाच्या परिसरात लपून बसलेल्या या बिबट्यामुळे कंपनीत भीतीचे वातावरण निर्माण झाले होते. खबरदारीचा उपाय म्हणून कंपनीचा उत्पादन विभागही दोन दिवस पूर्णपणे बंद ठेवण्यात आला होता. शनिवारी सकाळी कंपनीच्या परिसरातील सीसीटीव्ही चित्रफितीत हा बिबट्या भक्ष्याच्या शोधात फिरताना दिसून आला होता. त्यानंतर वन विभाग, ‘रेस्क्यू’ चॅरिटेबल ट्रस्ट आणि ‘वाइल्डलाइफ एसओएस’च्या पथकांनी संयुक्तपणे शोधमोहीम सुरू केली. मात्र, मर्सिडीज-बेंझसारख्या विस्तीर्ण उत्पादन प्रकल्पात बिबट्याचा ठावठिकाणा शोधणे वन अधिकाऱ्यांसाठी मोठे आव्हान ठरले.

 

अखेर सोमवारी (ता. ११) दोन दिवसांच्या अथक प्रयत्नांनंतर भक्ष्याच्या शोधात फिरत असताना बिबट्या कंपनी परिसरात लावलेल्या पिंजऱ्यात अडकला. पकडण्यात आलेला बिबट्या सुमारे साडेतीन ते चार वर्षांचा प्रौढ नर असल्याची माहिती वन विभागाने दिली. ही संपूर्ण मोहीम पुणे वनसंरक्षक आशिष ठाकरे, जुन्नर उपवनसंरक्षक प्रशांत खाडे आणि सहाय्यक वनसंरक्षक अमृत शिंदे यांच्या मार्गदर्शनाखाली पार पडली. चाकण वनपरिक्षेत्र अधिकारी संतोष कांक, वन कर्मचारी इंदलकर, जगताप, पिसाळ तसेच संपूर्ण चाकण वन विभागाच्या पथकाने मोहिमेत सहभाग घेतला.

हे सुद्धा वाचा : पुणे-दौंड डेमोच्या चाकांना अचानक आग, प्रवाशांमध्ये घबराट; पाटस रेल्वे स्थानकात काय घडलं?

कर्मचाऱ्यांनी सुटकेचा निश्वास सोडला

याशिवाय माणिकडोह बचाव केंद्राचे महेंद्र धोरे व डॉ. अविनाश विसाळकर, ‘रेस्क्यू’ चॅरिटेबल ट्रस्टचे नचिकेत उत्पात, किरण रहाळकर, एजाज शेख आणि त्यांच्या पथकानेही महत्त्वाची भूमिका बजावली. म्हाळुंगे पोलिस ठाण्याचे पोलिस निरीक्षक विजय ढमाले तसेच मर्सिडीज-बेंझ प्रशासनाचे सारंग जोशी आणि व्यंकटेश कुलकर्णी यांनीही मोहिमेस सहकार्य केले. दोन दिवसांच्या तणावपूर्ण परिस्थितीनंतर बिबट्याला सुरक्षितपणे पकडण्यात यश आले. कंपनीतील कर्मचारी आणि परिसरातील नागरिकांनी सुटकेचा निश्वास सोडला आहे.