Pune Fire Incidents: दिवाळीत महाराष्ट्रात फटाक्यांमुळे अग्नितांडव! पिंपरी-चिंचवडमध्ये २५ फ्लॅटसह ५० ठिकाणी आग

Pune Fire Incidents: दिवाळीच्या आनंदावर पसरले आगीचे सावट! पिंपरी-चिंचवडमध्ये २५ फ्लॅटसह ५० ठिकाणी आगीचा भडका, तर पुण्यात २४ ठिकाणी दुर्घटना; अग्निशमन दलाच्या धावपळीने टळली मोठी जीवितहानी!

• फटाक्यांमुळे पिंपरी-चिंचवडमध्ये ५०, तर पुण्यात २४ ठिकाणी आगी लागल्या
• राज्यातील इतर जिल्ह्यांतही मोठे आर्थिक नुकसान झाले; जीवितहानी सुदैवाने टळली
• अग्निशमन दलाने तत्परतेने सर्व आगींवर वेळीच नियंत्रण मिळवले

Pune Fire Incidents: दिवाळीत राज्यभरात आनंदाचे आणि जल्लोषाचे वातावरण असतानाच अनेक ठिकाणी या सणाला आगीच्या भीषण घटनांचे गालबोट लागले आहे. लक्ष्मीपूजनाच्या रात्री फटाके वाजवताना झालेल्या निष्काळजीपणामुळे पिंपरी-चिंचवड आणि पुण्यासह भिवंडी, नाशिक, बीड, रायगड, धुळे आणि गोंदिया जिल्ह्यात आगीच्या दुर्घटना घडल्या. पिंपरी-चिंचवडमध्ये चक्क २५ फ्लॅट्ससह ५० ठिकाणी आगी लागल्याने नागरिक भयभीत झाले होते. सुदैवाने अग्निशमन दलाच्या तत्परतेमुळे सर्व आगींवर वेळीच नियंत्रण मिळवण्यात आले असून मोठी जीवितहानी टळली आहे.

हेही वाचा: Father Kills Son: मालमत्तेच्या वादातून पोटच्या ७ वर्षांच्या मुलाचा बापानंच आवळला गळा अन् शेतातील नाल्यातून…

पिंपरी-चिंचवडमध्ये २५ सदनिकांना आग; ५० ठिकाणी आगीचे कॉल

पिंपरी-चिंचवड शहरात फटाके फोडताना वेगवेगळ्या भागांत भीषण दुर्घटना घडल्या. अग्निशमन दलाने दिलेल्या माहितीनुसार, शहरातील विविध भागांत तब्बल २५ फ्लॅट आणि घरांना फटाक्यांच्या ठिणग्यांमुळे आग लागली. याशिवाय मोकळी मैदाने, वाळलेले गवत आणि कचऱ्याच्या ठिकाणी आग लागण्याच्या २५ घटना घडल्या. तसेच फ्लेक्स, सोसायट्यांचे कंपाउंड आणि मोबाईल टॉवरला आग लागण्याच्या ५ घटनांची नोंद झाली. एकाच रात्री ५० ठिकाणी आगीचे कॉल आल्याने अग्निशमन दलाच्या गाड्यांची धावपळ उडाली. जवानांनी कौशल्याने आगीवर तातडीने नियंत्रण मिळवल्यामुळे मोठा अनर्थ टळला.

पुण्यात २४ ठिकाणी आगीचे सत्र; गोंदियात चायनीज सेंटर खाक

फटाक्यांमुळे लागलेल्या आगीच्या घटनांमध्ये पुणे शहरातही २४ वेगवेगळ्या ठिकाणी आगी लागल्याची नोंद झाली आहे. दुसरीकडे गोंदिया जिल्ह्यातील सडक-अर्जुनी येथे फटाक्याची ठिणगी उडाल्याने एका चायनीज सेंटरला भीषण आग लागली, ज्यामध्ये दुकानातील साहित्य जळून खाक झाले व परिसरात खळबळ उडाली.

हेही वाचा: Fire Incidents: “लक्ष्मीपूजनाच्या रात्री मुंबई अन् ठाण्यात कुठे काय घडलं? १७ मजली इमारतीला आगीसह अनेक ठिकाणी अग्नितांडव…

राज्यातील इतर जिल्ह्यांतही मोठे आर्थिक नुकसान

लक्ष्मीपूजनाच्या रात्री भिवंडी, बीड, रायगड, नाशिक आणि धुळे या जिल्ह्यांमध्येही आगीच्या अनेक दुर्घटना समोर आल्या आहेत. फटाक्यांच्या निष्काळजी वापरामुळे अनेक ठिकाणी दुकाने, घरे, गोदामे आणि गॅरेज आगीच्या भक्ष्यस्थानी पडले. या सर्व घटनांमध्ये दुकानदारांचे आणि नागरिकांचे मोठे आर्थिक नुकसान झाले असून सुदैवाने अग्निशमन दलाच्या वेळेवरील कामगिरीमुळे जीवितहानी टळली आहे.