पुणे गणेशोत्सव
डेक्कनमधील प्रसिद्ध श्रीकृष्ण मंडळाने उभारलेला ‘चॉकलेटचा बंगला’ आणि शहरांतील विविध मंडळांनी पंचतंत्र तसेच इसापनीतीतील बोधकथांवर आधारित साकारलेले हलते देखावे बालचमूंसाठी यंदाचे मुख्य आकर्षण ठरले आहेत.
श्रीकृष्ण मंडळाचा चॉकलेटचा बंगला पाहण्यासाठी लहानांपासून मोठ्यांपर्यंत सर्वांचीच उत्सुकता ताणली गेली असून, हा देखावा पाहण्यासाठी तब्बल तीन ते चार किलोमीटरपर्यंत लांबच लांब रांगा लागत आहेत. देखाव्यात चॉकलेटी रंगाच्या भिंती उभारून त्याला सुंदर बंगल्याचे रूप देण्यात आले आहे. या बंगल्याच्या आत आईस्क्रीम आणि टॉफींची अत्यंत आकर्षक मांडणी करण्यात आली आहे.
त्यामुळे देखावा पाहताना आपण थेट काल्पनिक चॉकलेटच्या दुनियेतच पोहोचलो असल्याचा अद्भुत आनंद चिमुकल्यांना मिळत आहे. बालपणी चॉकलेटचा बंगला प्रत्यक्षात पाहण्याची अपूर्ण राहिलेली इच्छा या निमित्ताने पूर्ण होत असल्याने मोठ्यांमध्येही या देखाव्याबद्दल मोठी उत्सुकता दिसून येत आहे. मुलांचा उत्साह वाढवण्यासाठी मंडळाकडून फुगे उडवले जात असून प्रत्यक्ष चॉकलेटचे वाटपही केले जात आहे.
दुसऱ्या बाजूला, मुलांवर नकळत संस्कार करणाऱ्या आणि मनोरंजन करणाऱ्या पौराणिक तसेच नैतिक कथाही देखाव्यांच्या माध्यमातून जिवंत झाल्या आहेत. हत्ती गणपती मंडळाने पंचतंत्रातील प्रसिद्ध ‘माकड आणि मगर’ ही बोधकथा हलत्या देखाव्याद्वारे अतिशय रंजक पद्धतीने मांडली आहे. कसबा पेठेतील उदय मित्र मंडळाने लहान मुलांच्या उत्सुकतेला खतपाणी घालणारा ‘भयावह जंगल’ या संकल्पनेवर आधारित थरारक देखावा उभारला आहे.
चित्रपट किंवा डिजिटल पडद्यापलीकडे जाऊन प्रत्यक्ष पात्रांच्या माध्यमातून बोधकथा आणि काल्पनिक दुनिया पाहता येत असल्याने मुलांमध्ये नवा उत्साह पाहायला मिळत आहे. गणेशोत्सवात देखावे पाहण्यासाठी येणाऱ्या कुटुंबांमध्ये लहान मुलांचा मोठा सहभाग असल्याने, बालमनाला भुरळ घालणारे हे देखावे यंदाच्या उत्सवात सर्वाधिक गर्दी खेचणारे ठरत आहेत.
.png "Videos"){kind=small}
