‘श्रीमंतां’चा थाटचं वेगळा; ‘उमांगमलज’ जन्मोत्सवानिमित्त बाप्पाला तब्बल १,१०० नारळांचा महानैवैद्य

पुण्यातील गणेशोत्सव अत्यंत लोकप्रिय आहे. मानाचे गणपती आणि त्यांची विसर्जन मिरवणूक पाहण्यासाठी हजारो नागरिक पुण्यनगरीत येत असतात. तसेच भाविकांना श्रीमंत दगडूशेठ हलवाई गणपती बाप्पाचे देखील मोठे आकर्षण असते.

पुणे: पुण्यातील गणेशोत्सव अत्यंत लोकप्रिय आहे. मानाचे गणपती आणि त्यांची विसर्जन मिरवणूक पाहण्यासाठी हजारो नागरिक पुण्यनगरीत येत असतात. तसेच भाविकांना श्रीमंत दगडूशेठ हलवाई गणपती बाप्पाचे देखील मोठे आकर्षण असते. बाप्पाचे दर्शन घेण्यासाठी रोज हजारो भाविक मंदिरात येत असतात. दरम्यान आज श्रीमान दगडूशेठ हलवाई गणपती मंदिर ट्रस्टतर्फे उमांगमलज जन्मोत्सव सोहळ्याचे आयोजन करण्यात आले होते.

श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळातर्फे मंदिरात श्री उमांगमलज जन्मोत्सव सोहळ्याचे आयोजन करण्यात आले होते. नारळांची आरास व धार्मिक विधी यानिमित्ताने मंदिरामध्ये पार पडले. गाणपत्य संप्रदायात कार्तिक शुद्ध चतुर्थी, श्री उमांगमलज जन्मोत्सवात मोरयाला नारळ समर्पित करण्याला विशेष महत्व आहे.  त्यामुळेच दगडूशेठ गणपती मंदिरात हा जन्मोत्सव सोहळा साजरा करीत श्रीं ना ११०० नारळांचा नैवेद्य दाखविण्यात आला.  मंगळवारी पहाटे ३ वाजता ब्रह्मणस्पती सूक्त अभिषेक, पहाटे ४ ते सकाळी ६ दरम्यान गायिका रसिका कुलकर्णी, सानिका कुलकर्णी यांचा स्वराभिषेक हा गायनाचा कार्यक्रम झाला. त्यांना अक्षय भंडगे (तबला), यश जवळकर (ऑक्टोपॅड) यांनी साथसंगत केली. त्यानंतर सकाळी ८ वाजता गणेश याग देखील पार पडला.

ट्रस्टचे अध्यक्ष सुनील रासने म्हणाले, अंत:करणातील अहंकार आणि ममत्वाचे मळभ दूर झाल्यानंतर शुद्ध, स्वच्छ, प्रशांत स्वरूपातील जे परमात्म दर्शन घडते, त्यांना म्हणतात उमांगमलज. देवी पार्वतीने अंगावरच्या मळापासून एक पुतळा बनवला. त्याला जिवंत केले. पुढे त्याचे आणि  शंकरांचे युद्ध झाले. भगवान शंकरांनी त्या मुलाचे मस्तक उडविले. देवी पार्वतीच्या संतापाला शांत करण्यासाठी शेवटी त्या बालकाच्या धडावर भगवान श्री विष्णूंनी आणलेले गज मस्तक बसविण्यात आले. त्यांना श्री गजानन असे म्हटले आहे. ही श्री गणेश जन्माची कथा आपण नेहमी ऐकतो ती या अवताराची कथा आहे. या अवतारात भगवान श्री गणेशांचे नाव आहे उमांगमलज.