Nagpur Curfew Update : नागपूरकरांना दिलासा! ‘या’ भागातील संचारबंदी नियमांवर पाच दिवसांनी शिथिलता

Nagpur Curfew : नागपूरमध्ये हिंसाचार होऊन दंगल उसळली होती. औरंगजेबाच्या कबरीवरुन वातावरण तापले होते. यामुळे अनेक भागांमध्ये संचारबंदी लागू करण्यात आली होती. आता काही ठिकाणी शिथिलता आणण्यात आली आहे.

नागपूर : नागपूरमधील महाल या परिसरामध्ये दंगल झाली. यामध्ये एका संतप्त जमावाने दगडफेक आणि जाळपोळ केली. यामध्ये पोलिसांवर देखील जमावाने प्राणघातक हल्ला केला. यामध्ये 34 पोलीस जखमी झाले तर एका महिला पोलिसांचा विनयभंग देखील करण्यात आला. औरंगजेबाच्या कबरीच्या मुद्द्यावरुन ही दंगल झाली असून यावरुन राजकारण्यांदेखील आक्रमक भूमिका घेतली. यामुळे नागपूरमध्ये तणावपूर्ण वातावरण निर्माण झाले होते. त्यामुळे अनेक भागांमध्ये संचारबंदी लागू करण्यात आली होती. यामुळे दुकांनासह शाळा आणि नागरिकांच्या वावरावर देखील बंधने होती. आता परिस्थिती निवळ्यामुळे नियमांमध्ये शिथिलता आणण्यात आली आहे.

राजकीय बातम्या वाचण्यासाठी क्लिक करा

नागपूरमधील तणावपूर्ण परिस्थिती लक्षात घेत नागपूरच्या पोलीस आयुक्तांनी सोमवारपासून (दि.17) शहरातील 11 भागांमध्ये संचारबंदी (कर्फ्यू) लागू करण्यात आली होती. मात्र, दंगलीच्या पाचव्या दिवशी परिस्थिती निवळली आहे. यामुळे  आज पोलीस आयुक्तांनी 11 पैकी नऊ भागातील संचारबंदी शिथिल केली आहे. तर उर्वरित तीन पोलीस ठाण्याच्या हद्दीतील संचारबंदी अद्यापही कायम आहे. यामुळे अनेकांनी दिलासा व्यक्त केला आहे.

नागपूरमधील या भागातील संचारबंदी उठवली

• गुरुवारी दुपारी दोन वाजतापासून परिमंडळ 04 हद्दीतील नंदनवन व परिमंडळ पाचमधील कपीलनगर या ठिकाणची संचारबंदी पूर्णतः उठवण्यात आला आहे.
• परिमंडळ ०३ मधील लकडगंज, पाचपावली, शांतीनगर, परिमंडळ ०४ मधील सक्करदरा, इमामवाडा, परिमंडळ ०५ मधील यशोधरानगर या हद्दीतील संचारबंदी (कर्फ्यू) परिसरातील लोकांना दैनंदिन जीवनावश्यक वस्तू प्राप्त करता याव्यात व जनजीवन सुरळीत राहावे याकरीता परिस्थितीचा आढावा घेवून दिनांक गुरुवारपासून दुपारी दोन ते चार वाजताच्या कालावधीकरीता संचारबंदी शिथील करण्यात येत आहे. सायंकाळी चार वाजतापासून पुढे संचारबंदी पूर्ववत अंमलात राहील.
• परिमंडळ ०३ मधील कोतवाली, तहसील व गणेशपेठ येथील संचारबंदी (कर्फ्यू) पुढील आदेशापर्यंत ‘जसाचा तसा’ कायम सुरू राहील.
• नागपूर शहरातील परिमंडळ ३, ४, ५ मधील नमूद पोलीस ठाण्याकडे येणारे मार्ग कायदा व सुव्यवस्था बघता बंद करण्याचे अधिकार, व आदेश अंमलबजावणी करण्याचे अधिकार नेमण्यात आलेल्या पोलीस अधिकारी यांना राहतील.
• या आदेशाचा भंग करणाऱ्या व्यक्ती भारतीय न्याय संहिता २०२३ कलम २२३ अन्वये शिक्षेस पात्र राहील.

महाराष्ट्रसंबंधित बातम्या वाचण्यासाठी क्लिक करा

 संचारबंदीत संबंधितांना सूट

• शहरात कोणत्याही भागात तैनात असलेले पोलीस अधिकारी, कर्मचारी, होमगार्ड आणि शासकीय अधिकारी व कर्मचाऱ्यांनी यातून सूट देण्यात आली आहे.
• अग्निशमन दलाचे अधिकारी आणि कर्मचाऱ्यांना सूट देण्यात आली
• विविध विभागाच्या परिक्षा देणारे विद्यार्थी, परिक्षेशी संबंधित प्राध्यापक-शिक्षकांना सूट देण्यात येईल
• अत्यावश्यक सेवेत कार्यरत असलेले अधिकारी, कर्मचारी यांना सूट दिली जाईल