इंदापूर : गेल्या आठवड्यात दै.‘नवराष्ट्र’ने प्रसिद्ध केलेली सचित्र बातमी व स्थानिक रहिवासी असणारे काँग्रेस पक्षाचे सरचिटणीस प्राथमिक शिक्षण सुधार समितीचे सदस्य निवास शेळके (Niwas Shelke) यांच्या पाठपुराव्यामुळे पंचायत समितीच्या बांधकाम विभागाने, बनकरवाडी ते करेवाडी या दळणवळणाच्या रस्त्यावरच्या पावसाने खचलेल्या पुलाची युध्दपातळीवर डागडुजी केली आहे.
मागील आठवड्यात दै.‘नवराष्ट्र’च्या तालुका प्रतिनिधीने बनकरवाडीस भेट दिली होती. त्या भेटी दरम्यान बनकरवाडीच्या परिसरातील कळाशी, गंगावळण, अगोती नं.१, करेवाडी या गावातील ऊसवाहतूक व दळणवळणासाठी वापरात येत असणाऱ्या बनकरवाडी ते करेवाडी या रस्त्यावरील गतवर्षी पावसाने खचलेल्या पुलाच्या दुरावस्थेसह प्राथमिक शाळेची पडझड व तुळजाभवानी मातेच्या मंदिराच्या कळस नसलेल्या देवळाची कथा समोर आली.
निवास शेळके यांनीही आपण या कामासंदर्भात करत असलेल्या पाठपुराव्याची माहिती दिली. सर्व वस्तुस्थितीच्या आधाराने दै.‘नवराष्ट्र’ने सचित्र सविस्तर वृत्त प्रसिद्ध केले. त्याची दखल घेऊन पुलाच्या दुरुस्तीचे काम मंगळवारी करण्यात आले.
.png "Videos"){kind=small}
