रिक्त जागांचा पोटनिवडणुकीचा कार्यक्रम जाहीर
२३ ग्रामपंचायतींमधील रिक्त पदांची पोट निवडणूक होणार
२८ एप्रिल रोजी प्रत्यक्ष मतदान घेण्यात येणार
पाटण: पाटण तालुक्यातील थेट सरपंच, सदस्य यांचे निधन, राजीनामा, अनर्हता अथवा इतर अन्य कारणांमुळे रिक्त झालेल्या जागांच्या पोटनिवडणुकीचा कार्यक्रम जाहीर झाला आहे. त्यानुसार पाटण तालुक्यातील ६ ठिकाणी थेट सरपंच व १७ ग्रामपंचायतींमधील सदस्य अशा एकूण २३ ग्रामपंचायतींमधील रिक्त पदांची पोट निवडणूक होणार आहे. यासाठी मंगळवार, दि. २८ एप्रिल रोजी प्रत्यक्ष मतदान घेण्यात येणार आहे. त्यामुळे तालुक्यात पुन्हा एकदा निवडणूक रणधुमाळी पहावयास मिळणार आहे.
तालुक्यातील भारसाखळे, संभाजीनगर, झाकडे, मान्याचीवाडी, गुंजाळी, गोठणे या ६ ग्रामपंचायतीत सरपंचपद रिक्त असल्याने येथे थेट सरपंचपदासाठी निवडणूक होणार आहे. गोठणे, कराटे, ढोरोशी, किल्ले मोरगिरी, नारळवाडी, मारूल हवेली, घोटील येथील प्रत्येकी ३, गाडखोप २, नाव, बहुले, लेंढोरी, भिलारवाडी, निवी येथील प्रत्येकी १, मराठवाडी, म्हावशी येथील प्रत्येकी ४, अशा रिक्त सदस्यपदांच्या जागांसाठी पोटनिवडणूक होणार आहे.
या पोटनिवडणुकीसाठी मंगळवार, दि. ७ ते सोमवार, दि. १३ एप्रिल रोजी सकाळी ११ ते दुपारी ३ या वेळेत नामनिर्देशन पत्र सादर करता येणार आहेत. बुधवार, दि. १५ एप्रिल रोजी सकाळी ११ वाजल्यापासून अर्जाची छाननी करण्यात येणार आहे. शुक्रवार, दि. १७ रोजी दुपारी ३ वाजेपर्यंत नामनिर्देशन पत्र मागे घेता येणार आहेत.
त्याच दिवशी दुपारनंतर निवडणूक चिन्ह वितरण व निवडणूक लढविणाऱ्या उमेदवारांची यादी प्रसिध्द केली जाणार आहे. मंगळवार, दि. २८ एप्रिल रोजी सकाळी ७.३० ते सायंकाळी ५.३० वाजेपर्यंत मतदान प्रक्रिया पार पडणार आहे. बुधवार, दि. २९ रोजी मतमोजणी होणार आहे. एकंदरीत पाटण तालुक्यात पोटनिवडणुकीच्या निमित्ताने पुन्हा एकदा रणधुमाळी पहावयास मिळणार आहे.
.png "Videos"){kind=small}
