कल्याण :- कल्याण पश्चिम विधानसभा मतदारसंघातील शिवसेना भाजप राष्ट्रवादी आणि रिपाई महायुतीचे उमेदवार विश्वनाथ भोईर यांच्या निवडणूक प्रचाराला आजपासून सुरुवात झाली. टिटवाळा येथील श्री महागणपतीचे दर्शन घेत विश्वनाथ भोईर यांनी मंगळवार दि. 5 नोव्हेंबर 2024 रोजी आपल्या प्रचाराचा नारळ फोडला. मुख्यमंत्री एकनाथ शिंदे यांची धडाकेबाज कामगिरी आणि गेल्या अडीच वर्षांमध्ये आपल्याकडून झालेली विकासकामे या जोरावर मतदार आपल्याला पुन्हा एकदा विधानसभेत पाठवतील असा ठाम विश्वास विश्वनाथ भोईर यांनी व्यक्त केला.
टिटवाळा येथील श्री महागणपतीचे दर्शन घेत आपला निवडणूक प्रचार सुरू केला
कल्याण पश्चिम विधानसभा मतदारसंघातून महायुतीचे उमेदवार म्हणून विद्यमान आमदार विश्वनाथ भोईर यांनाच पुन्हा एकदा उमेदवारी देण्यात आली असून कालच मुख्यमंत्री एकनाथ शिंदे यांच्या हस्ते मध्यवर्ती निवडणूक कार्यालयाचे दणक्यात उद्घाटन झाले. त्यानंतर आज लगेचच विश्वनाथ भोईर यांनी टिटवाळा येथील श्री महागणपतीचे दर्शन घेत आपला निवडणूक प्रचार सुरू केला.यावेळी टिटवाळा मंदिर परिसरापासून वाजत गाजत भव्य अशी प्रचार रॅली काढण्यात आली. ज्यामध्ये शिवसेना, भाजप, राष्ट्रवादी,रिपाइं महायुतीचे प्रमुख पदाधिकारी आणि कार्यकर्ते मोठ्या संख्येने सहभागी झाले होते. ज्या ज्या भागातून ही रॅली जात होती त्या त्या ठिकाणी स्थानिकांचा विश्वनाथ भोईर यांना उत्स्फूर्त प्रतिसाद मिळाल्याचे दिसून आले.
विकासकामांच्या बळावर मतदार पुन्हा विधानसभेत पाठवणार – विश्वनाथ भोईर
तर कोविडनंतरच्या अडीच वर्षांच्या काळात मुख्यमंत्री एकनाथ शिंदे यांनी राज्यातील प्रत्येक घटकासाठी अत्यंत धडाकेबाज लोककल्याणकारी निर्णय घेतले आहेत. तसेच कल्याण पश्चिम विधानसभा मतदारसंघामध्ये तब्बल दोन हजार कोटी रुपयांची विकासकामे सुरू असून ती पूर्णत्वाच्या अंतिम टप्प्यात आहेत. या पार्श्वभूमीवर कल्याण पश्चिमेतील जनता आपल्याला पुन्हा एकदा विधानसभेत पाठवणार असा ठाम विश्वास विश्वनाथ भोईर यांनी यावेळी प्रसिध्दी माध्यमांशी बोलताना व्यक्त केला.
कल्याण पश्चिम विधानसभा निवडणूकीमध्ये विश्वनाथ भोईर हे 2019 मध्ये 22 हजारापेक्षा जास्त मताधिक्क्याने निवडून आले होते. यावेळी त्यापेक्षाही जास्त मतांनी आमदार विश्वनाथ भोईर निवडून येतील असा विश्वास कार्यकर्त्यांनी व्यक्त केला आहे. लोकसभेमध्ये या मतदारसंघातून युतीचा उमेदवार पुढे होता त्यामुळे जनतेची साथ भोईर यांना आहे अशी भावना कार्यकर्त्यांमध्ये आहे.
या रॅलीमध्ये शिवसेना जिल्हाप्रमुख अरविंद मोरे, विधानसभा संघटक मयूर पाटील, संजय पाटील, महिला शहर संघटक नेत्रा उगले, माजी नगरसेवक जयवंत भोईर, संतोष (आप्पा) तरे, माजी नगरसेविका वैशाली भोईर, युवासेना उपशहर प्रमुख विकास भोई, शाखाप्रमुख रोशन चौधरी यांच्यासह किरण पाटील, अशोक चौरे, बबलेश पाटील, निता देशेकर अनेक पदाधिकारी आणि कार्यकर्ते मोठ्या संख्येने उपस्थित होते.
.png "Videos"){kind=small}
