कल्याणमध्ये खड्ड्यांविरोधात युवक काँग्रेसचे आंदोलन, खड्ड्यात रांगोळ्या काढत व्यक्त केला निषेध

कल्याण शहर युवक काँग्रेसच्या पुढाकाराने हे आंदोलन करण्यात आले. शहाड पुल परिसरातील रस्त्यावर असलेल्या खड्ड्यांमध्ये बसून या आंदोलनकर्त्यांनी प्रशासनाचा निषेध नोंदवला.

कल्याणमध्ये खड्ड्यांविरोधात युवक काँग्रेसचे आंदोलन, खड्ड्यात रांगोळ्या काढत व्यक्त केला निषेध

Follow Us:

Follow Us:

गणेशोत्सवाला अवघा एक महिना राहिला असून अद्यापही शहरांतील रस्ते खड्डेमुक्त झालेले नाही. उलट या खड्डेयुक्त रस्त्यांमुळे शहरात दोन दोन तास वाहतूक कोंडी होत असल्याविरोधात आज युवक काँग्रेसतर्फे आंदोलन करण्यात आले. येथील शहाड पुल परिसरात युवक काँग्रेस आणि काँग्रेसच्या पदाधिकाऱ्यांनी जोरदार आंदोलन करत येथील खड्ड्यात रांगोळ्या काढत प्रशासनाचा निषेध केला. तर चुकून रस्ता दिसला तर दचकू नका, पुढे खड्डे आहेत..,अशी बॅनरबाजी करण्यात आली. या अनोख्या बॅनरबाजीने येणाऱ्या जाणाऱ्या नागरिकांचे लक्ष वेधले होते.

कल्याण डोंबिवलीतील अंतर्गत आणि प्रमुख रस्त्यांची खड्ड्यांमुळे अक्षरशः चाळणी झाली असून नागरिक तर मेटाकुटीला आले आहेत. या खड्ड्यांमुळे दररोज तास न तास वाहतूक कोंडी होण्यासह नागरिकांना मणक्याचे आजारही झाले आहेत. परंतु त्यानंतरही गेंड्याच्या कातडीचे केडीएमसी प्रशासन अजिबात त्याकडे लक्ष द्यायला तयार नाही. याच पार्श्वभूमीवर आज (14 ऑगस्ट) कल्याण शहर युवक काँग्रेसच्या पुढाकाराने हे आंदोलन करण्यात आले. शहाड पुल परिसरातील रस्त्यावर असलेल्या खड्ड्यांमध्ये बसून या आंदोलनकर्त्यांनी प्रशासनाचा निषेध नोंदवला.

जनतेचे हाल होत असूनही केडीएमसी प्रशासनाला त्याचे काही देणेघेणे नसल्याचे सांगत काँग्रेस जिल्हाध्यक्ष सचिन पोटे यांनी प्रशासनावर जोरदार हल्ला चढवला. तर खड्डे बुजविण्यासाठी 22 कोटींचे टेंडर केडीएमसीने पास केले आहे. खड्डे बुजविण्यासाठी आणलेल्या मशीन धूळखात पडून आहेत. यासंदर्भात नितीन गडकरी सांगतात मी 10 लाख करोड, 15 लाख करोडचे हायवे बनवतो. पण या हायवेला जायला रस्ता नाही. कल्याणला येणारे जाणारे सर्व रस्ते खड्डेमय झाले आहेत. येत्या तीन ते चार दिवसांत खड्डे न बुजविल्यास तीव्र आंदोलन करण्याचा इशारा युवक कॉँग्रेस जिल्हाध्यक्ष जपजीत सिंग यांनी दिला आहे.

यावेळी कल्याण डोंबिवली जिल्हाध्यक्ष सचिन पोटे यांच्यासह युवक काँग्रेसचे महाराष्ट्र प्रभारी विवेक यगवल, कल्याण डोंबिवली जिल्हाध्यक्ष जपजीत सिंग, महिला जिल्हाध्यक्ष कांचन कुलकर्णी, ब्लॉक अध्यक्ष विमल ठक्कर, प्रदेश सदस्य मुन्ना तिवारी, राकेश मुथा, लालचंद तिवारी, अरुण वायले, वैशाली वाघ, लता जाधव, शेखर पोटे, अमित म्हात्रे, वर्षा रसाळ, भूषण बेंद्रे, रोहित कदम, ब्लॉक अध्यक्ष प्रवीण साळवे, यांच्यासह अनेक पदाधिकारी आणि महिला कार्यकर्त्या मोठ्या संख्येने उपस्थित होते.

Web Title: Youth congress protest against potholes in kalyan

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com