Worker dies after falling from roof (संग्रहित फोटो)
अकलुज : माळशिरस तालुक्यातील महाळुंग ढवळे वस्ती येथे गायीच्या गोठ्यात शॉक लागून दोन महिलांसह एका जर्शी गायीचा मृत्यू झाला. बुधवारी रात्रभर सुरू असलेल्या पावसामुळे गाईच्या गोठ्यात उतरलेल्या विद्युत प्रवाहामुळे दोन महिलांसह एका जर्शी गाईचा विजेच्या धक्क्याने मृत्यू झाल्याचे उघडकीस आले आहे. या दुर्दैवी घटनेत रशिका विठ्ठल रेडे (वय 57), सुवर्णा अमोल रेडे (वय 27), एक जर्शी गाय असे मृत पावले आहेत.
सकाळी सुमारे सहा वाजेच्या सुमारास रशिका रेडे यांनी नेहमीप्रमाणे गाईच्या गोठ्याकडे जाण्याचा प्रयत्न केला. गोठ्यात गेल्यानंतर गाईला शॉक लागून ती खाली पडलेली दिसली. गाईला उठवण्याचा प्रयत्न करत असताना रशिका रेडे यांना विजेचा धक्का बसला आणि त्यांचा घटनास्थळीच मृत्यू झाला. त्यानंतर काही वेळात सुवर्णा रेडे या परिस्थिती पाहण्यासाठी गोठ्यात गेल्या. मात्र, त्याही विजेच्या संपर्कात आल्या आणि त्यांचाही दुर्दैवी मृत्यू झाला.
या घटनेचे कारण अद्याप तपासाअंती स्पष्ट व्हायचे आहे. मात्र, रात्रभर पडलेल्या मुसळधार पावसामुळे गोठ्याच्या पत्राशेडमध्ये पाणी साचून, तिथे शॉर्टसर्किट झाल्याची शक्यता व्यक्त केली जात आहे. या संपूर्ण घटनेचा तपास अकलूज पोलीस स्टेशनचे तपास अधिकारी दीपक भोसले करत असून, घटनास्थळी पंचनामा करण्यात आला आहे. ही घटना संपूर्ण गावाला हादरवून गेली असून, एकाच कुटुंबातील दोन महिलांचा व एक जिवंत गाईचा मृत्यू झाल्याने परिसरात शोककळा पसरली आहे.
अमरावतीत दोन चिमुकल्यांचा मृत्यू
दुसऱ्या एका घटनेत, अमरावती जिल्ह्यात एक धक्कादायक घटना घडली. यात कुलरचा शॉक लागल्याने आईसह दोन चिमुकल्यांचा मृत्यू झाल्याने परिसरात शोककळा पसरली आहे. शनिवारी सायंकाळी सातच्या सुमारास अचलपूर तालुक्यातील चमक बुद्रुक येथे ही घटना घडली. कुलरमध्ये पाणी टाकताना हा विद्युत शॉक लागल्याचे समोर आले. सुमती लक्ष्मण कासदेकर (वय 35) श्वेता लक्ष्मण कासदेकर (वय 4) आणि विकी लक्ष्मण कासदेकर (वय 3) अशी मृतांची नावे आहेत.
