रविवार, 11 ऑक्टोबर 2026
Wai Pathway Work
पाथवेच्या कामासाठी वापरण्यात आलेल्या दगडाचा बाजारभाव सुमारे २५० ते ३०० रुपये असताना संबंधित कन्सल्टंटने अंदाजपत्रकात ७५० रुपये दर दाखविल्याचा आरोप ढेकाणे यांनी केला आहे. बाजारभाव आणि अंदाजपत्रकातील दरामध्ये एवढी तफावत कशी निर्माण झाली? दर निश्चित करताना कोणता आधार घेण्यात आला? असे सवाल त्यांनी उपस्थित केले आहेत.
या कामातील दगड कोल्हापूर येथून आणण्यात आला असून, त्याची किंमत आणखी कमी असल्याचेही ढेकाणे यांचे म्हणणे आहे. त्यामुळे प्रत्यक्ष वापरलेल्या दगडाचा प्रकार, गुणवत्ता, जाडी आणि बाजारमूल्य यांची पडताळणी करून अंदाजपत्रकातील दराशी तुलना करावी, अशी मागणी त्यांनी केली.
कामाच्या गुणवत्तेबाबतही ढेकाणे यांनी आक्षेप घेतला आहे. कामासाठी आरएमसी अर्थात रेडी मिक्स काँक्रीट वापरण्याच्या सूचना असताना प्रत्यक्षात साधे मिश्रण वापरण्यात आल्याचा आरोप त्यांनी केला. मंजूर तांत्रिक निकषांनुसार काम झाले आहे का, याची स्वतंत्र तज्ज्ञांकडून प्रत्यक्ष पाहणी व तपासणी करण्याची आवश्यकता असल्याचे त्यांनी नमूद केले.नगरपरिषदेच्या प्रशासकीय काळात हे काम झाले असल्याने प्रशासकीय मान्यता, कन्सल्टंटची नियुक्ती, अंदाजपत्रक, निविदा प्रक्रिया, मंजूर दर, वापरलेले साहित्य आणि अदा करण्यात आलेली बिले यांची चौकशी करावी. केवळ कागदपत्रांपुरती तपासणी मर्यादित न ठेवता प्रत्यक्ष कामाचा दर्जाही तपासावा, असा आग्रह ढेकाणे यांनी धरला आहे.
“वाईकर जनतेच्या पैशातून हे काम झाले आहे. त्यामुळे प्रत्येक रुपयाचा हिशेब जनतेला मिळाला पाहिजे. अंदाजपत्रकातील दर आणि बाजारभावातील तफावतीची चौकशी झाली पाहिजे. कामाचा दर्जाही तपासला गेला पाहिजे. जनतेने आम्हाला मोठ्या मताधिक्याने निवडून दिले असून, त्यांचा विश्वास जपणे ही आमची जबाबदारी आहे. जनतेच्या पैशांची उधळपट्टी होत असेल, तर ती खपवून घेणार नाही. गरज पडल्यास जनतेच्या हितासाठी रस्त्यावर उतरून आंदोलन करू,” असा इशारा त्यांनी दिला.या कामाच्या प्रशासकीय मान्यतेपासून अंतिम बिलापर्यंतची कागदपत्रे सार्वजनिक करावीत आणि दर व गुणवत्तेबाबत उपस्थित केलेल्या प्रश्नांचा स्वतंत्र चौकशीतून उलगडा करावा, अशी मागणीही ढेकाणे यांनी केली आहे.
