(फोटो सौजन्य- इन्स्टाग्राम)
‘बिग बॉस’, ‘द ५०’ आणि ‘द सोसायटी’ यांसारख्या रिॲलिटी शोजनंतर, करण जोहरचा ‘द ट्रेटर्स सीझन २’ लवकरच येत आहे. याची घोषणा नुकतीच प्राईम व्हिडिओच्या एका कार्यक्रमात करण्यात आली. या शोचे चित्रीकरण सध्या राजस्थानमधील जैसलमेर येथे सुरू असून, त्याच्या स्पर्धकांच्या यादीने लक्ष वेधून घेतले आहे. बॉलिवूड अभिनेत्री मल्लिका शेरावत या शोमध्ये दिसणार असल्याची चर्चा होती, आणि आता याला दुजोरा मिळाला आहे. प्रेक्षक आता मल्लिकाच्या रोमांचक अंदाजाची आणि शोतील ट्विस्ट‑टर्न्सची उत्सुकतेने वाट पाहत आहेत. शोमध्ये मल्लिका शेरावतची उपस्थिती नव्या उर्जा आणि ड्रामा आणणार असल्याचे चाहत्यांना अपेक्षित आहे.
‘व्हेरायटी इंडिया’च्या वृत्तानुसार, ‘द ट्रेटर्स सीझन २’ च्या चित्रीकरणाला सुरुवात करण्यासाठी मल्लिका शेरावत जैसलमेरमध्ये दाखल झाली आहे. गेल्या महिन्याभरापासून तिचे नाव चर्चेत होते, आणि आता या अटकळांना पूर्णविराम मिळाला आहे. मात्र अभिनेत्रीने याला दुजोराही दिलेला नाही किंवा नाकारलेही नाही.
पहिल्या सीझनप्रमाणेच, ‘द ट्रेटर्स’चे चित्रीकरण आलिशान सूर्यगढ पॅलेसमध्ये होत आहे, जिथे अनेकदा मोठे कार्यक्रम आयोजित केले जातात. कियारा अडवाणी आणि सिद्धार्थ मल्होत्रा यांचे लग्न जानेवारी २०२३ मध्ये येथेच झाले होते. पहिला सीझन प्राईम व्हिडिओवर स्ट्रीम झाला होता आणि दुसरा सीझनही तिथेच प्रसारित होईल. पहिला सीझन उर्फी जावेद आणि निकिता लुथर यांनी जिंकला होता आणि त्याचे सूत्रसंचालन करण जोहरने केले होते.
मल्लिका शेरावत बऱ्याच काळापासून परदेशात राहत आहे. ती शेवटची २०२४ साली प्रदर्शित झालेल्या ‘विकी विद्या का वो वाला व्हिडिओ’ या चित्रपटात दिसली होती, ज्यात राजकुमार राव आणि तृप्ती डिमरी यांच्यासोबत तिने काम केले होते. ‘मर्डर’ या चित्रपटामुळे तिला लोकप्रियता मिळाली. त्यानंतर तिने इतर हिंदी चित्रपटांमध्ये काम करून स्वतःला स्थापित केले. ती ब्रुनो मार्ससोबत ‘व्हॉट्टा मॅन’ या गाण्याच्या म्युझिक व्हिडिओमध्येही दिसली होती.
.png "Videos"){kind=small}
