(फोटो सौजन्य - इन्स्टाग्राम)
मुंबई घर घ्यावं असं प्रत्येकालाच वाटते, मात्र, मुंबईतील आकाशाला भिडणाऱ्या घरांच्या किमती पाहता, हे स्वप्न पूर्ण करणं सहज शक्य होत नाही. मात्र, आपल्या अभिनयाने प्रेक्षकांच्या मनात स्थान मिळवणारी मराठी अभिनेत्री मीरा जोशी हिने तिचं हे स्वप्न साकार केलं आहे.
मीरा जोशीने मुंबईत स्वतःचं घर विकत घेतलं असून, दसऱ्याच्या शुभ मुहूर्तावर तिने तिच्या नव्या घरात गृहप्रवेश केला. या खास क्षणाचे फोटो आणि भावना तिने तिच्या सोशल मीडियावर पोस्ट करत चाहत्यांसोबत शेअर केल्या आहेत. मीराने १३ व्या मजल्यावर घर घेतलं आहे. ती म्हणाली, ”१३ हा नंबर माझ्या खूप जवळचा आहे. माझी जन्मतारीख १३. माझ्या फ्लॅटचा फ्लोअर नंबर १३ च आणि फ्लॅट नंबरसुद्धा १३च. हा निव्वळ योगायोग नाही, जणू काही युनिव्हर्स मला येथे आणण्यासाठी एकवटलं होतं असं म्हणावं लागेल. म्हाडाचे हे सगळं गणित जुळवून आणल्याबद्दल आभार! मुंबईत फ्लॅट असावा हे स्वप्न मी गेली पंधरा वर्षे उराशी बाळगून होते. कारण हीच आता माझी कर्मभूमी आहे. १५ वर्षांपूर्वी मुंबईत आले. मुंबईने आपलंसं केलं. अर्थात मुंबई सर्वांनाच आपलं करून घेते. इतकी वर्षे भाड्याच्या घरात राहिले. भाड्याच्या घरातही चांगले दिवस गेले. कोणत्याच घरमालकाने कधी खाली करा सांगितले नाही. पण स्वतःचं असं एक घर असावं असं कोणाला वाटत नाही!”
पुढे मीराने सांगितलं की “माझा स्वभाव उधळा नसल्याने माझं पंधरा वर्षांच थोडंफार सेव्हिंग होतं. माझ्या दादाचं सलील जोशी योग्य सल्ला असल्याने पै आणि पै अगदी योग्य ठिकाणी सेव्ह झाली होती. पण ती रक्कम एक फ्लॅट घेण्यासाठी पुरेशी नव्हती. फ्लॅट घेण्यासाठी पालक देऊ करत असलेली मदत मी नम्रपणे नाकारली खरी पण अडचण अशी आली की या क्षेत्रामधील लोकांना बँका लोन देत नाहीत. कारण आमचा ठोस असा इन्कम नसतो. मग बाबांनी माझं फर्स्ट नाव आणि त्यांचं सेकंड नाव , असं महाराष्ट्र बँकेचे होम लोन करून दिले. फायनली माझं आज घर झालं. खरंतर हे वर्ष धाडसाचं होतं. चॅलेंजिंग होतं. स्वप्नांना योग्य दिशा देणार होतं म्हटलं तरी चालेल. माझं प्रॉडक्शन हाऊस ’कृष्णसखी’ मी याच वर्षी सुरु केलं आणि घर घेण्याचा योगसुद्धा याच वर्षी आला”.
“माझ्या आईने नेहमीच माझ्यावर विश्वास दाखवला, सगळ्यात महत्त्वाचं म्हणजे मूल्यांशी कोणतीही तडजोड न करता स्वतःच्या अटींवर काम करण्यास प्रवृत्त करणं असो. माझ्या आईमुळेच रत्नागिरीतील एक मुलगी स्वप्नांच्या शहरात मोठी स्वप्ने पाहू शकली.अर्थात प्रत्येक प्रोफेशन मध्येच आपापल्या परीने संघर्ष असतो. तसा तो मी पण केला त्यात काही मोठे केलं असं मला वाटत नाही. माझे आई-बाबा, माझा दादा, माझा मित्र दुर्गेश, माझा मामा, पूनम मामी आणि माझ्यावर प्रेम करणारे आपण सर्व प्रेक्षक मायबाप या सर्वांचे आभार माझ्या चढत्या आलेखासाठी. आणि सर्वात महत्त्वाचे म्हणजे, माझी काळजी घेतल्याबद्दल आणि चढ-उतारांमध्ये मला मार्गदर्शन केल्याबद्दल मी देवाचे आभार मानते. तो माझ्यासोबत सदैव असणार आहे मला त्याची खात्री आहे”, असं म्हणत मीराने तिच्या या प्रवासात सोबत असलेल्या सगळ्यांचे आभार मानले आहेत. तिच्या या पोस्टवर चाहते, सहकलाकार आणि मित्रमंडळींकडून भरभरून शुभेच्छांचा वर्षाव होत आहे.
.png "Videos"){kind=small}
