भगव्या रंगाच्या लंगोटबद्दल आपण का बोलत नाही? मराठी अभिनेत्रीचा थेट सवाल

दीपिकाचे काही चुकलंय असं मला तरी वाटत नाही. कुस्तीतल्या आखाड्यात पैलवान लंगोट घालतात तो भगव्या रंगाचा असतो मग त्याबद्दल आपण काही बोलत का नाही? हे फक्त महिलांपुरते मर्यादित आहे का? असा प्रश्न अभिनेत्री स्मिता गोंदकर हिने उपस्थित केला आहे.

मुंबई : ‘पठाण’ (Pathan) चित्रपटातील ‘बेशरम रंग’ हे गाणं सध्या वादाच्या भोवऱ्यात अडकलं आहे. काही दिवसांपूर्वीच प्रदर्शित झालेल्या या गाण्यात दीपिकाने (Deepika Padukone) भगव्या रंगाची बिकिनी (Orange Bikini) परिधान केली आहे. त्यावरून देशभरात राजकारणही तापले आहे. तसेच, सोशल मीडियावर (Social Media) नवा वाद सुरू आहे. मात्र, आता मराठी कलाकारही (Marathi Actors) मैदानात उतरले आहेत.

अभिनेता पुष्कर श्रोत्रीने (Pushkar Shrotri) या प्रकरणावर संताप व्यक्त केल्यानंतर आता अभिनेत्री स्मिता गोंदकर हिने (Smita Gondkar) मत व्यक्त केले आहे. स्मिता गोंदकर एका चॅनलला दिलेल्या मुलाखतीत भगव्या रंगाबाबत आपली बाजू मांडली. भगव्या रंगावरुन जो काही वाद सुरु आहे तो काही संपण्याचे नाव घेत नाही. दीपिकाचे काही चुकलंय असं मला तरी वाटत नाही. कुस्तीतल्या आखाड्यात पैलवान लंगोट घालतात तो भगव्या रंगाचा असतो मग त्याबद्दल आपण काही बोलत का नाही? हे फक्त महिलांपुरते मर्यादित आहे का? असा प्रश्न तिने उपस्थित केला आहे.

दीपिकाने इतर काहीही विचार करुन ती बिकीन परिधान केलेली नाही. प्रत्येक अभिनेत्रीला स्क्रीनवर छानच दिसायचे असते. पण मलाही याची भीती वाटू लागली आहे. कोणते कपडे घालायचे याचा विचार आता मलाही करावा लागणार आहे, असेही स्मिता गोंदकर म्हणाली. हे सर्व प्रकरण बघितल्यानंतर सर्वप्रथम मी माझं वॉर्डरोब चेक केलं. त्यात माझ्याकडील बिकिनी कलेक्शनमध्ये भगव्या रंगाचे काही आहे की नाही, याची खात्री केली. मला तर आता भगव्या रंगाची ब्रा परिधान करायलाही दडपण येते. चुकून कोणाच्या नजरेस पडली तर ही लोकं आपलं काय करतील, याचा विचार करुनही भीती वाटते, असे तिने म्हटले होते.