‘जात प्रमाणपत्र देताना अधिकारी खोडसाळपणा करतात’; मनोज जरांगेनंतर आता नरेंद्र पाटलांचा सरकारला आंदोलनाचा इशारा

मराठा समाजातील जात प्रमाणपत्र आणि जात वैधता प्रमाणपत्राच्या मुद्द्यावरून अण्णासाहेब पाटील महामंडळाचे अध्यक्ष नरेंद्र पाटील आक्रमक झाले आहेत. काही अधिकारी खोडसाळपणा करत असल्याचा आरोप करत त्यांनी सरकारला आंदोलनाचा इशारा दिला.

• जात प्रमाणपत्र देताना काही अधिकारी खोडसाळपणा करत असल्याचा नरेंद्र पाटलांचा आरोप
• मुख्यमंत्री आणि उपमुख्यमंत्र्यांकडे तक्रार करूनही कारवाई नसल्याचा दावा
• मराठा तरुणांना एकत्र करून आंदोलन उभारण्याचा इशारा

मनोज जरांगे पाटील यांच्या आंदोलनानंतर मराठा-कुणबी समाजातील बांधवांना कुणबी म्हणून जात प्रमाणपत्र मिळण्याचा मुद्दा राज्याच्या राजकारणात चर्चेत आला. ओबीसी प्रवर्गातून जात प्रमाणपत्र मिळाल्यानंतर अनेक मराठा कुटुंबांनी समाधान व्यक्त केले. मात्र, आता जात प्रमाणपत्र आणि जात वैधता प्रमाणपत्र मिळवताना येणाऱ्या अडचणींमुळे हा विषय पुन्हा ऐरणीवर आला आहे.

काही प्रकरणांमध्ये जात प्रमाणपत्र रद्द करण्यात येत असल्याचेही समोर येत असताना मनोज जरांगे पाटील यांनी सरकारवर टीका केली आहे. त्यातच आता अण्णासाहेब पाटील आर्थिक विकास महामंडळाचे अध्यक्ष नरेंद्र पाटील यांनीही प्रशासनाच्या भूमिकेवर गंभीर प्रश्न उपस्थित केले आहेत.

“काही अधिकारी अति हुशार; खोडसाळपणा करतात”

जात प्रमाणपत्र देताना काही अधिकारी जाणीवपूर्वक खोडसाळपणा करत असल्याचा आरोप नरेंद्र पाटील यांनी केला. काही अधिकारी “अति हुशार” असल्याचे म्हणत त्यांनी प्रमाणपत्र देताना लावल्या जाणाऱ्या अटी आणि शर्तींवर नाराजी व्यक्त केली.

‘उद्धव ठाकरेंना जळी स्थळी काष्ठी पाषाणी शिंदेच दिसतात’; रामदास कदमांचा उद्धव ठाकरेंना टोला

महामंडळाच्या व्यवस्थापकीय संचालकांकडून लावण्यात येणाऱ्या काही अटींवरही त्यांनी आक्षेप घेतला. संबंधित अधिकारी मराठा समाजातील असूनही अशा अटी का लावल्या जात आहेत, असा सवाल नरेंद्र पाटील यांनी उपस्थित केला.

या प्रकरणी मुख्यमंत्री आणि उपमुख्यमंत्र्यांकडे वारंवार तक्रारी केल्या असूनही अपेक्षित कारवाई झाली नसल्याचा दावा त्यांनी केला आहे. त्यामुळे आता मराठा समाजातील तरुणांना एकत्र करून सरकारविरोधात आंदोलन उभारण्याचा इशाराही त्यांनी दिला.

कर्ज घेतलेल्या तरुणांनाही अडचणींची भीती

दरम्यान, 2025 मध्ये प्रमाणपत्राच्या आधारे महामंडळातून कर्ज घेतलेल्या अनेक तरुणांना कागदपत्रे अपलोड करण्यात अडचणी येत असल्याचे नरेंद्र पाटील यांनी सांगितले. त्यामुळे पात्र असूनही काही तरुणांना महामंडळाच्या योजनांचा लाभ मिळण्यात अडथळे निर्माण होण्याची शक्यता त्यांनी व्यक्त केली.

‘Gen Z शी बोलण्याआधी अमित शाहांचा राजीनामा घ्या’; उद्धव ठाकरेंचा मोहन भागवतांना खोचक टोला

या समस्येबाबत मराठा समाजातील अनेक तरुणांचे फोन आल्याचा दावाही त्यांनी केला. महामंडळाच्या व्यवस्थापकीय संचालकांच्या निर्णयांविरोधात लेखी पत्र देण्यात आले असून, मंत्रिमंडळाच्या उपसमितीसह मुख्यमंत्री आणि उपमुख्यमंत्र्यांकडेही तक्रार करण्यात आल्याचे त्यांनी सांगितले.

वारंवार तक्रारी करूनही कारवाई होत नसल्याने नरेंद्र पाटील यांनी आता मराठवाड्याचा दौरा सुरू करून आंदोलनाची पूर्वतयारी करण्याचा निर्णय घेतला आहे. तरुणांच्या गाठीभेटी घेऊन जनजागृती केली जाणार असून, मराठा समाज एकत्र आल्याशिवाय सरकारला आपला आक्रोश समजणार नाही, असा इशारा त्यांनी दिला.