संशोधक हुसेन यांना फिलिपाईन्समध्ये आढळले अतिप्राचीन ‘त्रिशूळ’ आणि ‘वज्र’

भारतीय संशोधक सय्यद शमीर हुसेन यांना फ़िलिपाइन्समधील सिरोन डोंगरावर खाणीत काम करत असताना धातूच्या दोन अतिप्राचीन वस्तू आढळून आल्या आहेत. या वस्तू हिंदू संस्कृतीशी संबंधित असल्याचे आढळून आले आहे. यांचे फोटो आता शेअर करण्यात आले आहेत, एकदा पहाच.

हिंदू वैदिक धर्माला हजारो वर्षांची परंपरा आहे. आणि भारत ही विविध धार्मिक तत्वाज्ञानांची भूमी आहे. हिंदू, बौद्ध, शीख, लिंगायत, जैन या धर्मांचा उदय भारतभूमीत झाला. विविध संस्कृती भारतात उगम पावल्या आणि जगभरात विस्तारल्या. रामायण, महाभारत, भगवद्गीता हे ग्रंथ विदेशात देखील अभ्यासले जातात. गणपती, प्रभू श्री रामचंद्र, हनुमान सीतामाता यांच्या प्रतिमा भारताबाहेर अनेक देशांमध्ये दिसून येतात. श्रीलंका आणि भारत यांचे नाते तर रामायण काळापासूनचे आहे. वैदिक धर्माला सर्वात प्राचीन धर्म मानले जाते. देश विदेशात अनेक ठिकाणी उत्खननात भारतीय देव देवतांच्या प्रतिमा आढळून येतात. आता तर फ़िलिपाइन्स या देशातील खाणीत हजारो वर्षांपूर्वीचे त्रिशूळ आणि वज्र आढळून आले आहे. भारतीय पुरातत्व खात्याने ही दोन्ही आयुधे किमान दीड हजार वर्षांपूर्वीची असावीत, असा अंदाज व्यक्त केला आहे.

सय्यद शमीर हुसेन हे 2012 सालापासून खाण उद्योगात आहेत. याच व्यवसायाशी संबंधित कामांच्या निमित्ताने देश विदेशात त्यांची भ्रमंती सुरु असते. सय्यद यांचा 9 वर्षांचा संशोधनाचा अनुभव आहे. 2015 साली फ़िलिपाइन्स येथे अगुसान डेल नोर्ते विभागातील, सिरोन डोंगरावर पिरादा येथील खाणीत काम सुरु असताना एका कामगाराने त्यांना खाणीच्या ठिकाणी पाचारण केले. जमिनीच्या खाली 20 फुटांवर त्याला धातूच्या दोन विचित्र वस्तू आढळून आल्या होत्या. सय्यद हुसेन यांच्या मार्गदर्शनाखाली त्या दोन्ही वस्तू बाहेर काढून पाण्याने धुण्यात आल्या. त्यातील एक वस्तू भगवान शंकराचा त्रिशूळ असल्याचे हुसेन यांच्या लक्षात आले. दुसऱ्या वस्तूचा नेमका उलगडा त्यांना झाला नव्हता. त्या वस्तूला त्यांनी लोखंडी सळीने स्पर्श केला असता त्यातून धातूचा आवाज आला. ती वस्तू कोणत्याही देवतेची मूर्ती नव्हती.

हेदेखील वाचा – नागलोकाचा मार्ग आहे या विहिरीतून, वर्षातून 1 दिवस इथे होते शंकराचं दर्शन

या दोन्ही वस्तू हिंदू संस्कृतीशी संबंधित असल्याचा अंदाज हुसेन यांना आला. त्या संदर्भात कुतूहल जागृत झाल्यामुळे या दोन्ही वस्तू हुसेन यांनी घरी आणल्या आणि त्यांची छायाचित्रे काढून आपल्या मित्रांना पाठवली. आणि त्या वस्तूंची सखोल माहिती घेण्यास सांगितले. सखोल अभ्यास केला असता त्रिशूळ सोबत असलेली दुसरी वस्तू भगवान इंद्राचे हत्यार वज्र असल्याचे स्पष्ट झाले. त्यानंतर हुसेन भारतात आले आणि त्यांनी पुरातत्व विभागाच्या कार्यालयाशी संपर्क साधला. या दोन्ही वस्तू त्यांनी तिथे नोंदणीकृत करून घेतल्या.

2015 सालापासून हुसेन हे या दोन्ही वस्तूंची काळजी घेत आहेत. विविध 25 देशांत प्रवास करून त्यांनी माहिती संकलित केली आहे. वज्र आणि त्रिशूळ यांचे महत्व जाणून घेण्यासाठी त्यांनी भारताचे सांस्कृतिक मंत्रालय, विविध संग्रहालये आदी ठिकाणी फेऱ्या मारल्या. विविध धर्मग्रंथांचा अभ्यास असलेले विद्वान, स्वामी, योगी, इतिहासकार आणि संशोधक यांच्याशी त्यांनी चर्चा केली. या दोन्ही वस्तू अतिप्राचीन असून त्यांच्यात खूप सामर्थ्य असल्याचे त्यांना अनेक जणांनी सांगितले. या दोन्ही वस्तूंच्या विक्रीसाठी काहीजणांनी त्यांच्यावर दबाव आणला. मात्र हुसेन यांनी त्याला ठाम नकार दिला.

हा ठेवा जगाने पहावा या वस्तू विक्री करण्याची माझी कोणतीही इच्छा नाही. मी खाण व्यवसायाशी संबंधित आहे. धातू हा माझ्या अभ्यासाचा विषय आहे. गेल्या अनेक वर्षांपासून मी या क्षेत्रात काम करतो आहे. या वस्तू दीड हजार वर्षांपूर्वीच्या आहेत असे सांगण्यात येत असले तरी यांचा काळ त्यापेक्षा शेकडो वर्षे आधीचा असावा असा माझा अंदाज आहे. संग्रहालये ही या वस्तूंची जागा नाही. जनतेने त्यांचे दर्शन घ्यावे आणि सकारात्मक उर्जेचा अनुभव घ्यावा, एखाद्या भव्य मंदिरात त्याची स्थापना व्हावी अशी आपली इच्छा असल्याचे हुसेन यांनी सांगितले.