
Awa tribe Amazon rainforest news Uncontacted Awa tribe Brazil video
जगाच्या पाठीवर आजही अशी अनेक ठिकाणे आहेत, जिथे आधुनिकतेचे वारे पोहोचलेले नाहीत आणि माणूस शतकांपूर्वीच्या निसर्गनियमांनुसार जगतो आहे. ब्राझीलमधील जगप्रसिद्ध ॲमेझॉन वर्षावनातील ‘आवा’ (Awa Tribe) जमात हा याचाच एक जिवंत दाखला आहे. वर्षानुवर्षे बाह्य जगाशी कोणताही थेट संपर्क न ठेवता, स्वतःच्या वेगळ्या विश्वात रमलेली ही जमात नुकतीच जंगलातून बाहेर पडली आणि एका गावाजवळ पोहोचली. या घटनेचा एक दुर्मीळ व्हिडिओ समोर आल्यानंतर जगभरातून आश्चर्य आणि तितकीच चिंता व्यक्त केली जात आहे.
या घटनेकडे केवळ एक कुतूहलजनक बातमी म्हणून पाहता येणार नाही, तर ती मूळनिवासी समुदायांवरील वाढत्या संकटाची घंटा आहे. ‘सर्व्हायव्हल इंटरनॅशनल’ या आंतरराष्ट्रीय संस्थेच्या माहितीनुसार, आवा जमातीचे सुमारे वीस सदस्य जंगलातून बाहेर आले आणि त्यांनी जवळच्या भागात भेट दिली. शतकानुशतके आपले वेगळेपण जपणाऱ्या या लोकांचे असे अचानक बाहेर येणे, त्यांच्या जंगलात सुरू असलेल्या उलथापालथीचे आणि संकटाचे संकेत देत आहे.
‘सर्व्हायव्हल इंटरनॅशनल’ने दिलेल्या वृत्तानुसार, आवा जमातीच्या या गटाने स्थानिक सरकारी पथकाशी संपर्क साधला. ते ज्या भागात पोहोचले, ते ब्राझीलच्या ईशान्येकडील मारानाओ राज्यातील ‘अरारिबोइया’ या मूळनिवासी प्रदेशाचा एक भाग आहे. या भागात ‘गुआजारा’ हा वांशिक गटही वास्तव्यास असून, त्यांच्याच परिसराजवळ ही ऐतिहासिक भेट घडली.
गावात किंवा गावाजवळ पोहोचल्यानंतर तेथील स्थानिकांनी या आवा सदस्यांना अन्न देऊ केले. अहवालांनुसार, या लोकांनी प्रामुख्याने रताळी मागून घेतली आणि ती पुन्हा आपल्या जंगलातील आसऱ्याकडे घेऊन गेले. सहसा माणसांच्या वस्तीपासून दूर राहणारा हा गट अन्नासाठी बाहेर आला की निसर्गात काहीतरी बिघडले आहे, असा प्रश्न या निमित्ताने उपस्थित होत आहे.
जागतिक घडामोडी संबंधित बातम्या वाचण्यासाठी येथे क्लिक करा : Indonesia : इंडोनेशियात भरधाव ट्रेनने मिनीबसला उडवले; चालक जिवंत जळाला, पण कसे वाचले 264 प्रवाशांचे प्राण? पहा VIRAL VIDEO
या संपूर्ण घटनेचे चित्रीकरण तेथील गुआजारा समुदायातील लोकांनी केले आणि ते ‘सर्व्हायव्हल इंटरनॅशनल’मार्फत समोर आले. या व्हिडिओमध्ये जंगलाच्या कडेला उभे असलेले पुरुष, महिला आणि लहान मुले स्पष्टपणे दिसतात. आधुनिक वस्त्रांऐवजी त्यांच्या शरीराचा काही भाग झाकण्यासाठी पाने आणि नैसर्गिक गोष्टींचा वापर केलेला दिसतो, तर काहींच्या हातात पारंपरिक धनुष्य आणि लांब बाण आहेत.
हा व्हिडिओ पाहिल्यानंतर अनेकांच्या मनात हळहळ व्यक्त होत आहे. आजही पूर्णपणे आदिम जीवनशैली जगणारा हा समाज, आजूबाजूला बदलणारे जग आणि आपल्याच जंगलात वाढणारी अस्वस्थता पाहून का बाहेर आला, याचे विश्लेषण तज्ज्ञांकडून केले जात आहे.
Brazil’s UNCONTACTED Awá tribe EMERGES from the AMAZON RAINFOREST — asking for FOOD near govt outpost https://t.co/BjGM6AAiNg — RTVisual (@RT_Visual_on_X) November 19, 2026
credit – social media and Twitter
आवा जमातीला जगातील सर्वात जास्त धोक्यात असलेल्या मूळनिवासी समुदायांपैकी एक मानले जाते. शिकार करणे आणि जंगलातील कंदमुळे, फळे व इतर वनउपज गोळा करणे, यावरच त्यांचा संपूर्ण उदरनिर्वाह चालतो. निसर्गाच्या सान्निध्यात राहून स्वतःच्या गरजा स्वतः भागवण्याची त्यांची परंपरा अत्यंत जुनी आहे.
परंतु, गेल्या काही वर्षांत त्यांच्या या शांत आणि स्वयंपूर्ण आयुष्यावर बाहेरच्या जगाचा दबाव प्रचंड वाढला आहे. जंगलात होणारी अवैध वृक्षतोड, बेकायदेशीर शिकार आणि जमिनीवरील अतिक्रमण यामुळे त्यांचा मूळ अधिवास संकुचित होत चालला आहे. जंगल तुटत असताना किंवा तिथली नैसर्गिक साधनसंपत्ती कमी होत असताना, अशा जमातींच्या जगण्यावर थेट परिणाम होतो.
जागतिक घडामोडी संबंधित बातम्या वाचण्यासाठी येथे क्लिक करा : Donald Trump: ‘भारताकडे बघा’ डोनाल्ड ट्रम्प यांनी केले भारतीय अर्थव्यवस्थेचे तोंडभरून कौतुक; US फेडरल रिझर्व्हला सुनावले खडेबोल
व्हिडिओ समोर आल्यानंतर आवा जमातीच्या आरोग्याबाबत मोठी चिंता निर्माण झाली आहे. या गटातील काही सदस्य, विशेषतः लहान मुले आणि वृद्ध, अत्यंत अशक्त व कुपोषित अवस्थेत दिसत असल्याचे स्थानिक आणि संघटनांच्या नोंदींतून समोर आले आहे. जंगलात अन्नाची टंचाई निर्माण झाली आहे का, असा सवाल यातून पुढे येत आहे.
याशिवाय, एक अत्यंत गंभीर वैद्यकीय आणि सामाजिक धोका म्हणजे बाह्य जगाशी होणारा अचानक संपर्क. पिढ्यान्पिढ्या अलिप्त राहिल्यामुळे या लोकांची रोगप्रतिकारशक्ती आधुनिक जगातील सामान्य विषाणू किंवा जिवाणूंशी लढण्यास तयार नसते. सर्दी, ताप किंवा सामान्य संसर्गासारखा वाटणारा आजारही अशा समुदायांसाठी जीवघेणा ठरू शकतो. त्यामुळेच, त्यांच्याशी संपर्क साधताना अत्यंत काळजी घेणे, त्यांच्या जमिनीचे संरक्षण करणे आणि त्यांच्या जीवनशैलीचा आदर राखणे, ही काळाची गरज बनली आहे.
Ans: 'आवा' जमात ब्राझीलमधील ॲमेझॉन वर्षावनात, प्रामुख्याने मारानाओ राज्यातील अरारिबोइया परिसरात राहते.
Ans: अहवालांनुसार, ते जंगलातून बाहेर येऊन गावाजवळ पोहोचले आणि त्यांनी रताळी मागून घेतली; त्यांच्या जंगलातील वाढत्या अतिक्रमण व अडचणींमुळे चिंता व्यक्त होत आहे.
Ans: दीर्घकाळ अलिप्त राहिल्यामुळे त्यांची रोगप्रतिकारशक्ती बाहेरील रोगांशी लढण्यास अननुभवी असल्याने त्यांना संसर्गजन्य आजारांचा मोठा धोका संभवतो.