World Health Day 2025 : जागतिक आरोग्य दिन का आणि केव्हा साजरा केला जातो? जाणून घ्या थीम

7 एप्रिल हा दिवस संपूर्ण जगभरात जागतिक आरोग्य दिन म्हणून साजरा केला जातो. आरोग्याच्या सर्वंकष जाणीवेचा प्रसार करण्यासाठी आणि लोकांना निरोगी राहण्याचे महत्त्व पटवून देण्यासाठी हा दिवस अत्यंत महत्त्वाचा मानला जातो.

World Health Day 2025 : 7 एप्रिल हा दिवस संपूर्ण जगभरात जागतिक आरोग्य दिन म्हणून साजरा केला जातो. आरोग्याच्या सर्वंकष जाणीवेचा प्रसार करण्यासाठी आणि लोकांना निरोगी राहण्याचे महत्त्व पटवून देण्यासाठी हा दिवस अत्यंत महत्त्वाचा मानला जातो. यंदाच्या जागतिक आरोग्य दिनाची थीम “आपला ग्रह, आपले आरोग्य” अशी आहे.

आजच्या घडीला जगभरातील नागरिक विविध संसर्गजन्य रोग, वाढते प्रदूषण, हृदयरोग, मधुमेह, कर्करोग आणि इतर अनेक गंभीर आजारांशी झुंज देत आहेत. अशा परिस्थितीत आरोग्यसंबंधी जनजागृती करणे आणि प्रभावी आरोग्यसेवा सर्वांपर्यंत पोहोचवणे अत्यावश्यक आहे. जागतिक आरोग्य संघटना (WHO) याच उद्देशाने दरवर्षी आरोग्य दिनाच्या निमित्ताने आरोग्यविषयक मोहिमा राबवते आणि सरकारांना धोरणात्मक उपाययोजना राबवण्यास प्रवृत्त करते.

जागतिक आरोग्य दिन, सुरुवात आणि उद्देश

जागतिक आरोग्य संघटना (WHO) ची स्थापना ७ एप्रिल १९४८ रोजी झाली. त्या स्मरणार्थ १९५० पासून दरवर्षी ७ एप्रिल हा जागतिक आरोग्य दिन म्हणून साजरा केला जातो. या दिनाचे मुख्य उद्दिष्ट म्हणजे लोकांमध्ये आरोग्यविषयक जागरूकता निर्माण करणे आणि आरोग्यासंबंधी महत्त्वाच्या समस्यांवर जागतिक पातळीवर लक्ष केंद्रित करणे. जागतिक आरोग्य संघटना ही संयुक्त राष्ट्रांच्या (UN) तत्त्वावधानाखाली कार्यरत असलेली एक प्रमुख संस्था आहे. ही संस्था जागतिक स्तरावर आरोग्य धोरणे ठरवते, संशोधनाला चालना देते, विविध देशांना तांत्रिक मदत पुरवते आणि आरोग्यविषयक संकटांचे मूल्यमापन करते.

जागतिक घडामोडी संबंधित बातम्या वाचण्यासाठी येथे क्लिक करा : Travis Scott Concert India: ट्रॅव्हिस स्कॉटच्या शोसाठी बुकिंग सुरू, जाणून घ्या भारतात कधी होणार कॉन्सर्ट

यंदाची थीम, “आपला ग्रह, आपले आरोग्य”

WHO च्या म्हणण्यानुसार, वाढते प्रदूषण, हवामान बदल, महामारी आणि संसर्गजन्य रोग यांचा थेट परिणाम मानवी आरोग्यावर होत आहे. त्यामुळे या वर्षीचा जागतिक आरोग्य दिन “आपला ग्रह, आपले आरोग्य” या संकल्पनेवर आधारित आहे. सध्याच्या घडीला दरवर्षी सुमारे १३ दशलक्ष लोकांचा मृत्यू टाळता येण्याजोग्या पर्यावरणीय कारणांमुळे होतो, असे WHO चे निरीक्षण आहे. यामध्ये हवामान बदलामुळे होणाऱ्या आरोग्यविषयक धोक्यांचा सर्वात मोठा वाटा आहे. WHO च्या अंदाजानुसार, हवामान संकट हे आरोग्यासाठी सर्वात मोठे संकट बनले आहे. वायूप्रदूषण, विषारी रसायने, स्वच्छ पाणी आणि पोषणाचा अभाव यामुळे अनेक देशांमध्ये नागरिकांचे आरोग्य धोक्यात आले आहे.

जागतिक आरोग्य संघटनेच्या (WHO) महत्त्वाच्या भूमिका

WHO संपूर्ण जगभरात आरोग्यविषयक प्रश्नांवर काम करणारी एक अग्रगण्य संस्था आहे. ती विविध महत्त्वाच्या भूमिका पार पाडते, जसे की –

जागतिक आरोग्य धोरणांचे नेतृत्व करणे.
संसर्गजन्य आणि असंसर्गजन्य रोगांवर संशोधन करणे.
सदस्य राष्ट्रांसाठी आरोग्यविषयक नियम आणि मानके तयार करणे.
विविध देशांना तांत्रिक सहाय्य पुरवणे.
महत्त्वाच्या आरोग्य ट्रेंडचे निरीक्षण आणि मूल्यमापन करणे.

जागतिक आरोग्य दिनाचे महत्त्व आणि जनजागृती

जागतिक आरोग्य दिनानिमित्त विविध देशांमध्ये आरोग्य शिबिरे, मोफत आरोग्य तपासणी, व्याख्याने आणि जनजागृती कार्यक्रम राबवले जातात. आरोग्यासंबंधी जनजागृती वाढवणे हे या दिवसाचे मुख्य उद्दिष्ट आहे.n निरोगी जीवनशैलीचा प्रसार करणे आणि लोकांना योग्य वैद्यकीय सुविधा मिळवून देण्यासाठी प्रयत्न करणे गरजेचे आहे. संपूर्ण मानवजातीला निरोगी ठेवण्यासाठी सामूहिक प्रयत्नांची आवश्यकता आहे. WHO यंदाच्या जागतिक आरोग्य दिनाच्या निमित्ताने, संपूर्ण जगाने आरोग्यसेवा आणि पर्यावरण सुधारण्याच्या दिशेने तातडीने पावले उचलावीत, असा संदेश देत आहे.

जागतिक घडामोडी संबंधित बातम्या वाचण्यासाठी येथे क्लिक करा : डोनाल्ड ट्रम्प आणि इलॉन मस्क विरोधात लोकांचा रोष शिगेला; अमेरिकेत 1200 ठिकाणी ‘Hands off’ आंदोलनाने घेतले उग्र वळण

 निरोगी समाजाच्या दिशेने एक पाऊल

जागतिक आरोग्य दिन हा केवळ एक दिवस साजरा करण्याचा विषय नाही, तर तो आरोग्यासाठी संपूर्ण वर्षभर कृतीशील राहण्याचा संदेश देतो.

वाढते प्रदूषण आणि हवामान बदल ही मानवाच्या आरोग्यासाठी मोठी आव्हाने बनली आहेत. निरोगी राहण्यासाठी योग्य आहार, व्यायाम, स्वच्छता आणि पर्यावरणपूरक सवयी अंगीकाराव्यात. सरकार, संस्था आणि नागरिकांनी एकत्र येऊन आरोग्याच्या मूलभूत गरजा पूर्ण करण्यासाठी योगदान द्यावे.  या वर्षीचा जागतिक आरोग्य दिन फक्त व्यक्तिगत आरोग्य नव्हे, तर आपल्या संपूर्ण ग्रहाच्या आरोग्यासाठीही महत्त्वाचा ठरतो. त्यामुळे “आपला ग्रह, आपले आरोग्य” ही केवळ एक थीम नाही, तर भविष्यातील आरोग्यदृष्टीकोन ठरू शकतो.