‘हे’ 5 खेळाडू IPL 2024 नंतर संन्यास घेण्याची शक्यता; भारताच्या माजी दिग्गज कर्णधारासह मोठ्या खेळाडूंचा समावेश; वाचा कोण कोण आहेत हे खेळाडू

38 वर्षीय अनुभवी यष्टीरक्षक फलंदाज दिनेश कार्तिकचा हा शेवटचा आयपीएल हंगाम देखील असू शकतो. क्रिकेट खेळण्यासोबतच कार्तिक पार्ट टाइम समालोचकही आहे. निवृत्तीनंतर तो पूर्णवेळ समालोचक होण्याची शक्यता आहे. कार्तिकने आयपीएलमध्ये आतापर्यंत खेळलेल्या 253 सामन्यांमध्ये 4799 धावा केल्या आहेत.

36 वर्षीय उमेश यादव 2010 पासून आयपीएल खेळत आहे. कदाचित त्याची ही शेवटची आयपीएल असेल. आता त्याला भारतीय संघातही स्थान नाही. अशा परिस्थितीत यादव स्वतः निवृत्ती घेऊन युवा खेळाडूंना संधी देऊ शकतो. आयपीएलमध्ये त्याने एकूण 147 सामन्यात 143 विकेट घेतल्या आहेत.

IPL 2024 हा अनुभवी भारतीय वेगवान गोलंदाज इशांत शर्मासाठी शेवटचा हंगाम असू शकतो, ज्याने भारतासाठी 100 हून अधिक कसोटी खेळल्या आहेत. वाढते वय आता त्याच्या शरीराला साथ देत नाहीये. या मोसमातही तो खूपच कमी खेळला आहे. इशांतने आयपीएलमध्ये खेळलेल्या 107 सामन्यांमध्ये 88 विकेट घेतल्या आहेत.

39 वर्षांचा अनुभवी यष्टीरक्षक फलंदाज रिद्धिमान साहा देखील IPL 2024 नंतर निवृत्त होऊ शकतो. तो 2008 पासून आयपीएल खेळत आहे. त्याने आयपीएलमध्ये 170 सामन्यांमध्ये 2934 धावा केल्या आहेत.

चेन्नई सुपर किंग्जचा माजी कर्णधार आणि अनुभवी यष्टिरक्षक फलंदाज एमएस धोनीचाही हा शेवटचा आयपीएल हंगाम असू शकतो. गेल्या वर्षीच आयपीएलनंतर माही निवृत्त होऊ शकला असता. पण त्याच्या चाहत्यांसाठी त्याला आणखी एक वर्ष खेळणे योग्य वाटले. माहीला अजूनही गुडघ्यात समस्या आहे. असे असूनही तो त्याच्या चाहत्यांसाठी पूर्ण उत्साहाने मैदानात उतरतो. असे होऊ शकते की चाहते त्याला शेवटच्या वेळी पिवळ्या जर्सीत पाहत असतील. धोनीने आयपीएलमध्ये खेळलेल्या 261 सामन्यांमध्ये 5192 धावा केल्या आहेत.