photo - social media
फुटबॉलच्या जगातील पाच वेळा बॅलोन डी’ओर विजेता ख्रिस्तियानो रोनाल्डोने आपल्या निवृत्तीबद्दल सर्वात मोठा संकेत दिला आहे. या पोर्तुगीज दिग्गज फुटबॉलपटूने म्हटले आहे की, चालू हंगाम हा एक खेळाडू म्हणून त्याचे शेवटचे वर्ष असू शकते. ४१ वर्षीय रोनाल्डोचा सध्या सौदी प्रो- लीग क्लबच्या अल नासरसोबत जून २०२७ पर्यंत करार आहे. जरी त्याने भूतकाळात अनेक वेळा आपली खेळाडू कारकीर्द संपत आल्याचे मान्य केले असले, तरी त्याने निवृत्तीची कोणतीही विशिष्ट तारीख कधीही दिली नव्हती. आता, ‘वोग’ला दिलेल्या एका मुलाखतीत त्याने म्हटले आहे की, हे कदाचित फुटबॉलमधील त्याचे शेवटचे वर्ष आहे आणि त्याला एक महान वारसा मागे ठेवायचा आहे.
रोनाल्डोने ‘वोग’ला दिलेल्या एका मुलाखतीत म्हटले की, ‘हे कदाचित माझे फुटबॉलमधील शेवटचे वर्ष असेल आणि मला एक महान वारसा मागे ठेवायचा आहे.’ तो पुढे म्हणाला की, त्याने आपल्या भविष्याची योजना आखली आहे आणि फुटबॉलमधून निवृत्ती घेतल्यानंतर त्याला व्यस्त ठेवण्यासाठी अनेक गोष्टी आहेत.’माझं भविष्य पूर्णपणे निश्चित आहे. मला व्यस्त ठेवण्यासाठी माझ्याकडे करायला भरपूर गोष्टी आहेत. निवृत्तीनंतर एक मोठी पोकळी निर्माण होऊ शकते, त्यामुळे तो वेळ अनेक गोष्टीन भरून काढायला हवा,’ असेही तो म्हणाला.
रोनाल्डोने गेल्या नोव्हेंबरमध्ये असेही म्हटले होते की तो आणखी एक-दोन वर्षे खेळू शकतो. त्याने हेही स्पष्ट केले होते की २०२६ चा विश्वचषक त्याचा शेवटचा असेल. गेल्या महिन्यात स्पेनकडून पराभूत झाल्यामुळे पोर्तुगाल २०२६ च्या फिफा विश्वचषकातून बाहेर पडला. परंतु, रोनाल्डोने फुटबॉलमधून पूर्णपणे कधी निवृत्त होईल हे स्पष्ट करण्यास नकार दिला.
रोनाल्डो म्हणाला की, त्याने फुटबॉल सोडल्यानंतरच्या आयुष्याचे नियोजन आधीच सुरू केले आहे. रोनाल्डोला आपल्या कुटुंबासोबत अधिक वेळ घालवायचा आहे. तसेच मैदानाबाहेरील जीवनाचा देखील आनंद घ्यायचा आहे. तो म्हणाला की, फुटबॉलमधून निवृत्त झाल्यानंतर त्याच्या आयुष्यात निर्माण झालेली पोकळी अनेक वेगवेगळ्या गोष्टींनी भरून काढावी लागेल. रोनाल्डोने प्रवास करणे, पॅडेल खेळणे आणि पाहणे यांसारख्या गोष्टींचा उल्लेख केला आणि सांगितले की त्याला आपल्या यशाचा आनंद घ्यायचा आहे. तो म्हणाला की, गेली २५ वर्षे त्याच्यासाठी त्याग आणि कठोर परिश्रमाने भरलेली होती. त्यामुळे, आता आयुष्याच्या इतर गोष्टींना वेळ देणे महत्त्वाचे आहे.
रोनाल्डो या वर्षी निवृत्त होणार असून हा त्याचा शेवटचा वर्ष असेल असे महत्वाचे संकेत त्याने दिले आहेत. रोनाल्डोने आपल्या कारकिर्दीची सुरुवात स्पोर्टिंग सीपीमधून केली. त्यानंतर तो मँचेस्टर युनायटेड, रियल माद्रिद आणि युव्हेंटस यांसारख्या मोठ्या क्लब्सकडून खेळला. जानेवारी २०२३ पासून तो सौदी अरेबियाच्या अल नासर क्लबसोबत आहे. त्याच्या कारकिर्दीतील सर्वात यशस्वी काळ रियल माद्रिदमध्ये होता, जिथे त्याने ४३८ सामन्यांमध्ये विक्रमी ४५० गोल केले. रोनाल्डोने या वर्षीच्या विश्वचषकात तीन गोल करून पोर्तुगालला १६ संघांच्या फेरीत पोहोचण्यास मदत केली.
.png "Videos"){kind=small}
