वर्ल्ड चॅम्पियनशिप ऑफ लीजेंड्समध्ये भारत सेमीफायनलला (फोटो सौजन्य - इन्स्टाग्राम)
वर्ल्ड चॅम्पियनशिप ऑफ लीजेंड्सचा १५ वा सामना इंडिया चॅम्पियन आणि वेस्ट इंडिज चॅम्पियन यांच्यात खेळला गेला. इंडिया चॅम्पियनने हा सामना ५ विकेट्सने जिंकला. यासह, भारतीय संघ या स्पर्धेत उपांत्य फेरीत पोहोचला आहे, जिथे त्यांचा सामना पाकिस्तान चॅम्पियनशी होणार आहे. भारत आणि पाकिस्तान यांच्यातील पहिला उपांत्य सामना ३१ जुलै रोजी होणार आहे. तथापि, गट टप्प्यात भारताने पाकिस्तानशी खेळण्यास नकार दिला.
परंतु, आतापर्यंत उपांत्य फेरीबाबत अशी कोणतीही बातमी समोर आलेली नाही. त्यामुळे आता भारत नक्की काय पाऊल उचलणार याकडे सर्वांचे लक्ष लागून राहिले आहे. सध्या भारत आणि पाकिस्तानमध्ये पहलगाम हल्ल्यानंतर जबरदस्त तणाव असून कोणत्याही प्रकारच्या खेळातही पाकिस्तानसह भारत दिसत नाहीये. मात्र आता अशी परिस्थिती आल्यानंतर भारत काय करणार पहावे लागेल.
इंडिया चॅम्पियनने जिंकला टॉस
इंडिया चॅम्पियनचा कर्णधार युवराज सिंगने वेस्ट इंडिज चॅम्पियनविरुद्ध टॉस जिंकून प्रथम गोलंदाजीचा निर्णय घेतला. अशा परिस्थितीत, वेस्ट इंडिजचा संघ निर्धारित २० षटकांत ९ विकेट्सच्या मोबदल्यात केवळ १४४ धावाच करू शकला. किरॉन पोलार्डने ४३ चेंडूत ७४ धावांची वेगवान खेळी केली. त्याने आपल्या डावात ३ चौकार आणि ८ षटकार मारले. भारताकडून पियुष चावलाने सर्वाधिक ३ विकेट्स घेतल्या. वरुण आरोन आणि स्टुअर्ट बिन्नी यांनीही २-२ विकेट्स घेतल्या. पवन नेगीनेही १ विकेट घेतली.
१४.१ षटकांत लक्ष्याचा पाठलाग
इंडिया चॅम्पियन्सने १४५ धावांचे लक्ष्य केवळ १४.१ षटकांत ५ गडी बाद करून पूर्ण केले. शिखर धवनने चांगली सुरुवात केली. त्याने २५ धावा केल्या. त्यानंतर गुरकीरत सिंग मान आणि सुरेश रैना प्रत्येकी ७ धावा करून लवकर बाद झाले. पण त्यानंतर स्टुअर्ट बिन्नीने २१ चेंडूंत ५० धावांची तुफानी खेळी केली. तो शेवटपर्यंत नाबाद राहिला. बिन्नीने त्याच्या डावात ३ चौकार आणि ४ षटकार मारले.
त्याला युवराज सिंग (२१) आणि युसूफ पठाण (२१*) यांनी साथ दिली. पठाणने ७ चेंडूत १ चौकार आणि २ षटकार मारले. सामना जिंकणारा शॉट मारल्यानंतर, युसूफ स्टँडमधील आपल्या मुलांकडे गेला आणि त्याने त्याच्या मुलांसह हा विजय साजरा केला. वेस्ट इंडिज चॅम्पियन्ससाठी ड्वेन स्मिथ आणि ड्वेन ब्राव्होने २-२ विकेट घेतल्या. दरम्यान आता सेमीफायनलमध्ये भारताचा कट्टर शत्रू असणाऱ्या पाकिस्तानशी सामना होणार आहे आणि त्यामुळे सर्वांचे लक्ष या सामन्याकडे लागून राहिले आहे.
पहा व्हिडिओ
.png "Videos"){kind=small}
