ICC Top 10 Test Ranking : अफगाणिस्तानचा इतिहास घडला! रहमत शाह यांची आयसीसी टेस्ट रँकिंगच्या टॉप-10 मध्ये एंट्री
अफगाणिस्तानचा कर्णधार आणि अनुभवी फलंदाज रहमत शाह याने आंतरराष्ट्रीय क्रिकेटमध्ये ऐतिहासिक कामगिरी केली आहे. आयसीसीच्या पुरुष कसोटी फलंदाजांच्या ताज्या क्रमवारीत टॉप-10 (ICC Top 10 Test Ranking) मध्ये स्थान मिळवणारे तो अफगाणिस्तानचा पहिला क्रिकेटपटू ठरला आहे.
झिम्बाब्वेविरुद्ध शारजाह येथे झालेल्या कसोटी सामन्यातील दमदार कामगिरीच्या जोरावर त्यांने सहा स्थानांची झेप घेत सातवे स्थान पटकावले. त्यामुळे अफगाणिस्तानच्या क्रिकेट इतिहासात त्याच्या नावावर आणखी एक महत्त्वपूर्ण विक्रमाची नोंद झाली आहे.
झिम्बाब्वेविरुद्धच्या दोन कसोटी सामन्यांच्या मालिकेतील पहिल्या सामन्यात रहमत शाहने 173 धावांची शानदार खेळी केली. त्यांच्या या खेळीचा फायदा त्याला आयसीसीच्या ताज्या क्रमवारीत झाला. सहा स्थानांची प्रगती करत त्याने कारकिर्दीतील सर्वोत्तम रेटिंग मिळवले. या कामगिरीमुळे त्याने भारताचा कर्णधार शुभमन गिल, दक्षिण आफ्रिकेचा एडन मार्करम आणि श्रीलंकेचा कामिंदू मेंडिस यांसारख्या आघाडीच्या फलंदाजांना मागे टाकले.
33 वर्षीय रहमत शाहचे कसोटी क्रिकेटमधील हे पाचवे शतक ठरले. विशेष म्हणजे, चालू वर्षातील त्याचे हे दुसरे शतक आहे. त्यांच्या सातत्यपूर्ण कामगिरीमुळे अफगाणिस्तानच्या कसोटी क्रिकेटला नवी ओळख मिळत आहे. यापूर्वी या महिन्याच्या सुरुवातीला अफगाणिस्तानने आयसीसी पुरुष वनडे संघांच्या क्रमवारीतही ऐतिहासिक प्रगती केली होती. संघाने सहावे स्थान मिळवत आतापर्यंतची सर्वोत्तम कामगिरी नोंदवली होती.
दरम्यान, झिम्बाब्वेचा फलंदाज क्रेग एर्विन यालाही कसोटी क्रमवारीत मोठा फायदा झाला आहे. अफगाणिस्तानविरुद्धच्या शारजाह कसोटीच्या दुसऱ्या डावात द्विशतकी खेळी केल्यामुळे त्याने नऊ स्थानांची प्रगती केली. तो आता 48 व्या क्रमांकावर पोहोचला आहे.
बांगलादेश आणि वेस्ट इंडिज यांच्यातील आयसीसी जागतिक कसोटी अजिंक्यपद स्पर्धेच्या मालिकेनंतरही फलंदाजांच्या क्रमवारीत बदल झाले आहेत. वेस्ट इंडिजचा कावेम हॉज याने 12 स्थानांची झेप घेत 52 वे स्थान मिळवले. बांगलादेशचा तौहिद हृदॉय 60 व्या क्रमांकावर पोहोचला आहे. तर वेस्ट इंडिजचा आमिर जंगू याने तब्बल 28 स्थानांची प्रगती करत 62 वे स्थान पटकावले.
गोलंदाजांच्या क्रमवारीत वेस्ट इंडिजचा फिरकीपटू जोमेल वॉरिकन यानेही लक्षवेधी कामगिरी केली आहे. बांगलादेशविरुद्धच्या मालिकेत मालिकावीर ठरल्यानंतर त्याला कसोटी क्रमवारीत मोठा फायदा झाला. त्याने 11 स्थानांची झेप घेत गोलंदाजांच्या यादीत 19 वे स्थान मिळवले. त्याचबरोबर कसोटी अष्टपैलू खेळाडूंच्या क्रमवारीतही चार स्थानांची प्रगती करत 31 वे स्थान पटकावले.
वेस्ट इंडिजच्याच जस्टिन ग्रीव्ह्ज यालाही अष्टपैलू खेळाडूंच्या क्रमवारीत फायदा झाला आहे. त्याने एका स्थानाची प्रगती करत आठवे स्थान मिळवले आहे.
भारत आणि न्यूझीलंड यांच्यातील वनडे मालिकेतील सुरुवातीच्या दोन सामन्यांनंतर ताज्या क्रमवारीत भारतीय गोलंदाजांनीही प्रगती केली आहे. भारताचा फिरकीपटू अक्षर पटेल याने वेलिंग्टन येथे झालेल्या दुसऱ्या सामन्यात 28 धावांत दोन बळी मिळवले. या कामगिरीच्या जोरावर त्याने वनडे गोलंदाजांच्या क्रमवारीत 23 स्थानांची झेप घेत 21 वे स्थान मिळवले.
न्यूझीलंडविरुद्ध ऑकलंड येथे झालेल्या मालिकेतील पहिल्या सामन्यात चार बळी घेणारा डावखुरा वेगवान गोलंदाज अर्शदीप सिंग यानेही 11 स्थानांची प्रगती केली. तो आता 31 व्या क्रमांकावर पोहोचला आहे.
युवा भारतीय वेगवान गोलंदाज गुरनूर बरार यानेही आपल्या कामगिरीने लक्ष वेधले आहे. न्यूझीलंडविरुद्धच्या मालिकेपूर्वी तो टॉप-100 च्या बाहेर होता. मात्र, दोन सामन्यांत सात बळी मिळवत त्याने थेट 48 व्या स्थानावर झेप घेतली आहे. त्यामुळे आयसीसीच्या ताज्या क्रमवारीत भारतीय गोलंदाजांच्या प्रगतीचीही चर्चा होत आहे.
.png "Videos"){kind=small}
