Badminton: पुण्यनगरीत रायगडच्या संघाचा डंका! राज्यस्तरीय स्पर्धेत पटकावले ‘हे’ दुहेरी विजेतेपद

Badminton: निर्णायक एकेरीच्या सामन्यात प्रांजल शिंदेने समन्वया धनंजयचा १५-११, १५-१३ असा पराभव करत रायगडच्या विजेतेपदावर शिक्कामोर्तब केले.उपांत्य फेरीत रायगडने मुंबई उपनगरचा २-० असा पराभव केला.

• बॅडमिंटनमध्ये रायगड संघाला दुहेरी विजेतेपद
  
• सब-ज्युनियर सांघिक बॅडमिंटनमध्ये मुला-मुलींच्या दोन्ही गटांत बाजी
  
•  बुलढाणा आणि पुणे संघांचा पराभव
  

Pune: सुधांशु बॅडमिंटन अकादमीच्या वतीने आणि समर्थ ग्रुपच्या सहकार्याने आयोजित योनेक्स सनराईज एसबीए कप राज्यस्तरीय सब-ज्युनियर आंतरजिल्हा सांघिक बॅडमिंटन अजिंक्यपद स्पर्धेत रायगड संघाने मुलांच्या आणि मुलींच्या दोन्ही गटांत विजेतेपद पटकावून दुहेरी कामगिरी नोंदवली.

शिवाजीनगर येथील पी. ई. सोसायटी मॉडर्न पीडीएमबीए स्पोर्ट्स कॉम्प्लेक्सच्या बॅडमिंटन कोर्टवर सुरू असलेल्या या स्पर्धेतील १७ वर्षांखालील मुलांच्या अंतिम सामन्यात रायगडने बुलढाणा संघाचा २-१ असा पराभव केला. रायगडच्या कृत्य पटेलने एकेरीच्या सामन्यात बुलढाण्याच्या देवव्रत खांडेकरचा १५-५, १५-६ असा सहज पराभव करत संघाला आघाडी मिळवून दिली.त्यानंतर दुहेरीच्या सामन्यात बुलढाण्याच्या देवव्रत खांडेकर आणि करण सावळे यांनी रायगडच्या कृत्य पटेल व मयुरेश भुटकी यांचा ११-१५, १७-१५, १५-११ असा पराभव करत सामना बरोबरीत आणला.

कृत्य पटेल-मयुरेश भुटकी जोडीचा धडाका

निर्णायक एकेरीच्या सामन्यात रायगडच्या प्रगणय शिंदेने करण सावळेचा १५-९, १५-६ असा पराभव करत रायगडच्या विजेतेपदावर शिक्कामोर्तब केले.रायगडने उपांत्य फेरीत नागपूरचा २-० असा पराभव केला होता. या सामन्यात कृत्य पटेलने आदित्य यौलचा १७-१५, १०-१५, १५-१० असा पराभव केला, तर दुहेरीत कृत्य पटेल-मयुरेश भुटकी या जोडीने आदित्य यौल-साईराज नायसे जोडीवर १५-९, १५-८ अशी मात केली. दुसऱ्या उपांत्य सामन्यात बुलढाण्याने ठाण्याचा २-० असा पराभव केला. देवव्रत खांडेकरने विश्वजीत थविलचा १५-१२, १६-१८, १५-१२ असा पराभव केला, तर देवव्रत खांडेकर-करण सावळे जोडीने मयंक राजपूत-विश्वजीत थविल जोडीवर १५-८, १५-९ अशी मात केली.

मुलींच्या गटातही रायगडची सरशी

१७ वर्षांखालील मुलींच्या अंतिम फेरीत रायगडने पुणे संघाचा २-१ असा पराभव करत विजेतेपदाला गवसणी घातली. रायगडच्या अनुष्का इप्टे आणि प्रांजल शिंदे यांनी निर्णायक कामगिरी बजावत संघाला जेतेपद मिळवून दिले.पहिल्या एकेरीच्या सामन्यात अनुष्का इप्टेने पुण्याच्या कायरा रैनाचा ८-१५, १७-१५, १५-१० असा पराभव करत रायगडला आघाडी मिळवून दिली. त्यानंतर दुहेरीत पुण्याच्या शरयू रांजणे आणि सोयरा शेलार यांनी अनुष्का इप्टे-प्रांजल शिंदे जोडीचा १५-१३, १५-७ असा पराभव करत सामना बरोबरीत आणला.

Badminton कोर्टवर चुरशीच्या लढती; मुलांमध्ये रायगड, तर मुलींमध्ये…; सेमीफायनलमध्ये कोणाचा प्रवेश?

निर्णायक एकेरीच्या सामन्यात प्रांजल शिंदेने समन्वया धनंजयचा १५-११, १५-१३ असा पराभव करत रायगडच्या विजेतेपदावर शिक्कामोर्तब केले.उपांत्य फेरीत रायगडने मुंबई उपनगरचा २-० असा पराभव केला. अनुष्का इप्टेने स्पृहा जोशीचा १५-१२, १५-१० असा पराभव केला. त्यानंतर अनुष्का इप्टे-प्रांजल शिंदे जोडीने अनिका तनेजा-गार्गी दाभोलकर जोडीवर १५-५, १५-७ अशी मात केली.

विजेत्यांना रोख पारितोषिक

स्पर्धेतील विजेत्या संघाला करंडक व २५ हजार रुपये, तर उपविजेत्या संघाला करंडक व १५ हजार रुपये अशी पारितोषिके देण्यात आली. पारितोषिक वितरण समर्थ ग्रुपचे मुख्य कार्यकारी अधिकारी पार्थ सूर्यवंशी यांच्या हस्ते करण्यात आले. यावेळी रायगड बॅडमिंटन संघटनेचे वरिष्ठ उपाध्यक्ष रवींद्र भगत, एमबीएच्या कार्यकारी समितीचे सदस्य विश्वास देशवंडीकर, पीडीएमबीएचे स्पर्धा सचिव राजीव बाग आणि स्पर्धा सचिव सुधांशु मेडसीकर आदी मान्यवर उपस्थित होते.

Asian Para Games : नितेश-थुलसिमथीची रौप्यपदकाला गवसणी; पॅरा बॅडमिंटनमध्ये भारताची दमदार कामगिरी!