Sabalenka Rybakina Reached Final
यूएस ओपन २०२६ (US Open 2026) च्या स्पर्धेचे महिला एकेरीच्या अंतिम सामन्याचे चित्र आता अधिक स्पष्ट झाले आहे. अव्वल मानांकित आर्यना सबालेन्का आणि कझाकस्तानची एलेना रायबाकिना विजेतेपदासाठी आमनेसामने येतील. अमेरिकेच्या कोको गॉफ आणि जेसिका पेगुला यांचा प्रवास उपांत्य फेरीतच संपला आहे.
आर्थर ॲश स्टेडियमवर खेळल्या गेलेल्या पहिल्या उपांत्य फेरीच्या सामन्यात, सबालेन्काने तिसऱ्या मानांकित जेसिका पेगुलाचा ७-५, ६-२ असा पराभव केला. या विजयामुळे, ती सलग तिसऱ्या यूएस ओपन विजेतेपदापासून फक्त एक विजय दूर आहे. सबालेन्काने संपूर्ण सामन्यात आपल्या सर्व्हिस आणि शक्तिशाली ग्राऊंडस्ट्रोक्सचा उत्कृष्टपणे वापर केला. तिने पेगुलाला कमबॅक करण्याची कोणतीही संधी दिली नाही.
पहिला सेट दोन्ही खेळाडूंमध्ये अटीतटीचा झाला. १२व्या गेमपर्यंत दोघींनीही आपली सर्व्हिस राखली होती. त्यावेळी सबालेन्का ६-५ ने आघाडीवर होती. त्यानंतर तिने आक्रमक खेळ करत पेगुलावर दबाव टाकला आणि तो सेट जिंकला. दुसऱ्या सेटमध्येही सबालेन्काने सुरुवातीपासूनच दबाव कायम ठेवला. तिने पेगुलाच्या दुसऱ्या सर्व्हिसवर हल्ला चढवला आणि एका शानदार फोरहँडने सर्व्हिस ब्रेक मिळवून ३-१ अशी आघाडी घेतली. आठव्या गेममध्ये, पेगुलाचा रिटर्न लांब गेल्याने सबालेन्काला मॅच पॉइंट मिळाला. या सामन्यात सबालेन्काने सात एस आणि २९ विनर्स मारले, जी या स्पर्धेतील तिच्या सर्वोत्तम कामगिरींपैकी एक होती.
दुसऱ्या उपांत्य फेरीत अमेरिकन कोको गॉफचा सामना एलेना रायबाकिनाशी झाला. गॉफने पहिला सेट ६-३ ने जिंकून सामन्याची शानदार सुरुवात केली. परंतु, त्यानंतर रायबाकिनाने जोरदार पुनरागमन करत दुसरा सेट ६-४ ने जिंकून सामना निर्णायक सेटमध्ये नेला. रायबाकिनाने तिसरा सेटही ६-४ ने जिंकून गॉफला ३-६, ६-४, ६-४ ने पराभूत केले आणि अंतिम फेरीत प्रवेश केला.या स्पर्धेच्या अंतिम फेरीत पोहोचण्याची रायबाकिनाची ही पहिलीच वेळ आहे. तिने आतापर्यंत दोन ग्रँड स्लॅम विजेतेपदे पटकावली आहेत. २०२२ मध्ये रायबाकिनाने विम्बल्डन आणि २०२६ च्या सुरुवातीला ऑस्ट्रेलियन ओपन जिंकली.
यूएस ओपन २०२६ महिला एकेरीचा अंतिम सामना आता सबालेन्का आणि रायबाकिना यांच्यात खेळला जाईल. सबालेन्का तिच्या सलग तिसऱ्या विजेतेपदासाठी मैदानात उतरतील, तर रायबाकिना ट्रॉफीवर आपले नाव कोरण्याचे प्रयत्न करेल.
.png "Videos"){kind=small}
