प्रेमापोटी त्याग केला! मुलाच्या मुंडन समारंभात महिलांसह संपूर्ण कुटुंबाने केलं टक्कल; Video Viral

Family Mundan Video : मुलाला एकटं वाटू नये म्हणून घरातील महिलांसह संपूर्ण कुटुंबाने मुंडन करुन घेतलं. कुटुंबाच्या या कृतीने आता सर्वांचे लक्ष वेधून घेतलं असून यूजर्सने यावर आपल्या टिका व्यक्त केल्या आहेत.

• गुजरातमध्ये एका बाळाच्या मुंडन सोहळ्यात संपूर्ण कुटुंबाने केस काढून त्यागाचा अनोखा दाखला दिला.
• बाळाला एकटे वाटू नये म्हणून महिलांसह सर्वांनी आनंदाने टक्कल केले.
• व्हिडिओ व्हायरल होत असून काहींनी कौतुक तर काहींनी या कृतीवर टीका केली आहे.

आपलं कुणावर प्रेम असेल तर या प्रेमासाठी कधी ना कधी त्याग हा करावा लागतोच. प्रेमात त्यागाचे महत्त्व काही वेगळेचं. अलिकडे सोशल मिडियावर अशाच एका त्यागाचे उदाहरण शेअर करण्यात आले आहे जे पाहून सर्वांनाच आश्चर्याचा धक्का बसला. हिंदू धर्मात सहसा १ ते ३ वर्षांच्या दरम्यान नवजात बाळाचे मुंडण केले जाते म्हणजेच त्याचे सर्व केस कापून टाकले जातात. या विधीला हिंदू धर्मात खूप महत्त्व आहे. अशातच आता अलिकडे सोशल मिडियावर एका चिमुकल्याच्या मुंडन सोहळ्याचे दृष्य शेअर करण्यात आले आहे ज्यात बाळासोबतच संपूर्ण कुटुंबाने आपल्या केसांचा त्याग केल्याचे दिसून आले. मुख्य म्हणजे, फक्त पुरुष मंडळीच नाही तर घरातील महिला देखील आपली केस काढून टक्कल करताना दिसून आल्या. चला याविषयी सविस्तर जाणून घेऊया.

काय घडलं व्हिडिओत?

सोशल मिडियावर व्हायरल होत असलेल्या या व्हिडिओची सुरुवात मुलाच्या स्वागताने होती. त्याच्या आईने त्याला हातात उचलून घेतलेले असते ज्यात मुलाचे मुंडन झालेले असते. यानंतर पुढे मुलाच्या आईचे मुंडन होताना आपल्या नजरेस पडते. मग आणखी एक महिला सदस्य आपल्या केसांचा त्याग करते. मुख्य म्हणजे असं करताना त्यांच्या चेहऱ्यावर कोणतीच दुःखद भावना नव्हती, उलट आनंदाने चेहऱ्यावर स्मितहास्य ठेवून त्या आपल्या केसांचा त्याग करण्यास तयार होत्या. व्हिडिओच्या शेवटी संपूर्ण कुटुंब मुंडन करुन एकत्र उभे असल्याचे दाखवण्यात येते. यात एकाच्या डोक्यावर केस नसते पण मनात समाधानाची भावना असते. मुलाच्या आनंदासाठी संपूर्ण कुटुंबाने उचलले हे पाऊल आता यूजर्सना चांगलेच थक्क करत आहे. त्याचबरोबर सोशल मिडियावरही व्हिडिओ सर्वांचे चांगलेच लक्ष वेधून घेत आहे. काहींनी कुटुंबाच्या या कृतीचे समर्थन केले आहे तर काहींनी ही चुकीची शिकवण असल्याचे म्हटले आहे.

हा व्हिडिओ @gharkekalesh नावाच्या एक्स अकाऊंटवरून शेअर करण्यात आला आहे. व्हिडिओच्या कॅप्शनमध्ये लिहिण्यात आले आहे की, ‘गुजरातच्या एका चिमुकल्या गावात, आपल्या लहान मुलाला त्याच्या मुंडन समारंभाच्या वेळी एकटे वाटू नये, याची खात्री करण्यासाठी संपूर्ण कुटुंबानेच आपले डोके मुंडून घेतले’. व्हिडिओला आतापर्यंत लाखो व्युज मिळाल्या असून हजारो युजर्सने व्हिडिओवर कमेंट करत यावर आपल्या प्रतिक्रिया व्यक्त केल्या आहेत. एका युजरने लिहिले आहे, “प्रत्येक क्षणी एकमेकांच्या पाठीशी खंबीरपणे उभे राहणे, खरे कुटुंब असेच असते.” तर दुसऱ्या युजरने लिहिले आहे, “आणि लग्नानंतर त्याला एकटेपणा वाटला तर?” आणखीन एका युजरने लिहिले आहे, “खरं सांगायचं तर, हे चांगलं पालकत्व नाही. मुलाला हा खरा धडा शिकवण्याची ही एक उत्तम संधी होती की, कधीकधी गोष्टींना एकट्याने सामोरे जावे लागते आणि त्यात काही गैर नाही. पण त्याऐवजी, त्यांनी त्याला अगदी उलट शिकवले, की जग तुमच्यासाठी स्वतःला जुळवून घेईल.”

टीप – हे व्हिडिओ सोशल मीडियावर व्हायरल झाले असून आम्ही वाचकांना काय योग्य आणि काय अयोग्य हे दाखविण्यासाठी लेख देत असतो. कोणत्याही प्रकारे अशा व्हिडिओबाबत आमचे मत आम्ही मांडत नाही वा आमचा कोणताही दावा नाही.