BRICS Summit 2026 : इथिओपियाने भारतीय खाण कंपन्यांसाठी उघडले दरवाजे; मलेशियासोबत सेमीकंडक्टरवर चर्चा सुरू

BRICS Summit 2026 : ब्रिक्स परिषदेच्या आधी पंतप्रधान नरेंद्र मोदी यांनी इथिओपिया आणि मलेशियाच्या नेत्यांची भेट घेतली. इथिओपियाने भारतीय खाण कंपन्यांना आमंत्रित केले, तर मलेशियासोबतच्या चर्चेत सेमीकंडक्टर प्रकल्पांवर लक्ष केंद्रित करण्यात आले.

• इथिओपियात भारतीय खाण कंपन्यांना संधी
• मलेशियासोबत सेमीकंडक्टरवर विशेष भर
• ब्रिक्स शिखर परिषदेपूर्वी द्विपक्षीय बैठका

नवी दिल्ली येथील भव्य भारत मंडपम येथे आयोजित १८ व्या ब्रिक्स शिखर परिषदेच्या (BRICS Summit 2026) निमित्ताने भारताच्या कूटनीतिक आणि आर्थिक मुत्सद्देगिरीला मोठे यश मिळाले आहे. परिषदेच्या अधिकृत उद्घाटनापूर्वी पंतप्रधान नरेंद्र मोदी यांनी इथिओपियाचे पंतप्रधान अबी अहमद अली आणि मलेशियाचे पंतप्रधान अन्वर इब्राहिम यांच्यासोबत अत्यंत महत्त्वपूर्ण द्विपक्षीय चर्चा केली. या दोन्ही बैठकांमध्ये व्यापार, गुंतवणूक, संरक्षण सहकार्य आणि आधुनिक तंत्रज्ञानावर भर देण्यात आला.

जागतिक स्तरावर वेगाने बदलणाऱ्या राजकीय आणि आर्थिक समीकरणांच्या पार्श्वभूमीवर भारताचे स्थान अत्यंत मजबूत होत असल्याचे या बैठकींवरून स्पष्ट दिसून आले. भारताच्या अध्यक्षतेखाली होत असलेल्या या ब्रिक्स परिषदेचे मुख्य सूत्र ‘लवचिकता, नावीन्य, सहकार्य आणि शाश्वतता’ हे असून, पंतप्रधान मोदींच्या ‘मानवता प्रथम’ या लोककेंद्रित विचाराचे हे प्रतीक मानले जात आहे.

इथिओपिया आणि भारत: खाण आणि खनिज क्षेत्रातील नवे युग

इथिओपियाचे पंतप्रधान अबी अहमद अली यांच्यासोबत झालेल्या बैठकीत दोन्ही देशांमधील ऐतिहासिक संबंध अधिक घट्ट करण्यावर विस्तृत चर्चा झाली. या चर्चेतील सर्वात महत्त्वाचा टप्पा म्हणजे इथिओपियाने भारतीय खाण कंपन्यांना आपल्या देशातील समृद्ध खनिज क्षेत्रात गुंतवणुकीसाठी आणि उत्खननासाठी दिलेले थेट निमंत्रण होय. इथिओपियामध्ये सोने, दुर्मिळ खनिजे आणि औद्योगिक खनिजांचे मोठे साठे उपलब्ध आहेत.

जागतिक घडामोडी संबंधित बातम्या वाचण्यासाठी येथे क्लिक करा : BRICS Summit 2026: तथाकथित G7 ची पिछेहाट! दिल्लीत पुतिन यांनी पाश्चात्त्य देशांना दाखवला आरसा; जागतिक GDPत ब्रिक्सचे वर्चस्व सिद्ध

भारतीय उद्योगांनी इथिओपियात आधीच सुमारे ५ अब्ज डॉलर्सहून अधिक गुंतवणूक केली असून, त्याद्वारे तेथील ७५,००ंपेक्षा जास्त लोकांना रोजगार मिळाला आहे. आता खाण आणि ऊर्जा क्षेत्रात भारतीय कंपन्यांच्या प्रवेशामुळे आफ्रिकन खंडात भारताची पकड अधिक मजबूत होईल. याशिवाय संरक्षण खरेदी, लष्करी प्रशिक्षण आणि डिजिटल सार्वजनिक पायाभूत सुविधांच्या विकासातही दोन्ही देश एकत्र काम करणार आहेत.

मलेशियासोबत सेमीकंडक्टर आणि हाय-टेक भागीदारीची नवी दिशा

मलेशियाचे पंतप्रधान अन्वर इब्राहिम यांच्याशी झालेल्या चर्चेत हाय-टेक उत्पादन आणि सेमीकंडक्टर पुरवठा साखळी मजबूत करण्यावर विशेष लक्ष केंद्रित करण्यात आले. जागतिक स्तरावर इलेक्ट्रॉनिक चिप्स आणि सेमीकंडक्टरची वाढती मागणी लक्षात घेता भारत आणि मलेशिया या क्षेत्रातील सहकार्य एका नव्या उंचीवर नेणार आहेत. या बैठकीत व्यापार, गुंतवणूक, पायाभूत सुविधा, फिनटेक, पर्यटन, शिक्षण आणि डिजिटल अर्थव्यवस्थेतील प्रगतीचा आढावा घेण्यात आला. एक मोठी राजनैतिक घडामोड म्हणजे मलेशियाच्या सबाह राज्यातील ‘कोटा किनाबालू’ येथे भारतीय वाणिज्य दूतावास (Consulate General of India) उघडण्यास मलेशियाने मान्यता दिली आहे. यामुळे दोन्ही देशांतील व्यवसाय आणि पर्यटन संबंधांना मोठा वेग मिळणार आहे.

जागतिक घडामोडी संबंधित बातम्या वाचण्यासाठी येथे क्लिक करा : Claude AI: एआय बनला शस्त्रांचा इंजिनिअर? हुथी बंडखोरांनी क्षेपणास्त्रे बनवण्यासाठी केला चक्क ‘असा’ वापर; Anthropic चा मोठा खुलासा

ब्रिक्स परिषदेचे महत्त्व आणि ग्लोबल साऊथचा आवाज

नवी दिल्लीत होत असलेल्या १८ व्या ब्रिक्स शिखर परिषदेत जगाचे लक्ष लागून राहिले आहे. आफ्रिका, आशिया आणि लॅटिन अमेरिकेतील देशांचा विकास डोळ्यासमोर ठेवून भारत ग्लोबल साऊथचा (विकसनशील देशांचा) मजबूत आवाज म्हणून पुढे येत आहे. भारत, रशिया, चीन, ब्राझील आणि दक्षिण आफ्रिका यांच्यासोबतच आता इथिओपिया, इराण, सौदी अरेबिया, युएई आणि इजिप्त या नव्या सदस्यांच्या सहभागामुळे ब्रिक्स संघटनेची ताकद प्रचंड वाढली आहे. नवी दिल्लीतील या परिषदेमुळे भारतीय कंपन्यांसाठी आंतरराष्ट्रीय बाजारपेठेत नव्या संधी निर्माण झाल्या आहेत. खाणकाम, सेमीकंडक्टर, संरक्षण उत्पादन आणि फिनटेक या क्षेत्रांत भारतीय तंत्रज्ञानाची मागणी वाढल्याचे या द्विपक्षीय बैठकांमधून सिद्ध झाले आहे.