डोनाल्ड ट्रम्प यांचे जवळचे सहकारी चार्ली कर्क यांची गोळ्या झाडून हत्या; भर कार्यक्रमात झाला हल्ला

डोनाल्ड ट्रम्प यांनी सोशल मीडियावर कर्क यांचा मृत्यू झाल्याच्या वृत्ताला दुजोरा दिला. युवा संघटना टर्निंग पॉइंट यूएसएचे सह-संस्थापक आणि सीईओ असलेले कर्क एका कार्यक्रमात बोलत होते. तेव्हा हल्ला करण्यात आला.

वॉशिंग्टन : अमेरिकेचे राष्ट्राध्यक्ष डोनाल्ड ट्रम्प यांचे जवळचे सहकारी चार्ली कर्क यांची गोळ्या झाडून हत्या करण्यात आली. कर्क हे बुधवारी युटा कॉलेजमधील एका कार्यक्रमात उपस्थित होते. त्याचवेळी त्यांची गोळ्या घालून हत्या करण्यात आली. अशाप्रकारे एका भर कार्यक्रमात हल्ला झाल्याने एकच खळबळ उडाली आहे. दरम्यान, या घटनेवरून अमेरिकेत राजकीय हिंसाचाराचा धोका अद्याप संपलेला नसल्याचे दिसून येत आहे.

डोनाल्ड ट्रम्प यांनी सोशल मीडियावर कर्क यांचा मृत्यू झाल्याच्या वृत्ताला दुजोरा दिला. युवा संघटना टर्निंग पॉइंट यूएसएचे सह-संस्थापक आणि सीईओ असलेले कर्क एका कार्यक्रमात बोलत होते. तेव्हा काही हल्लेखोरांनी त्यांच्यावर बंदुकीतून गोळ्या झाडल्या. त्यांच्या मृत्यूनंतर ट्रम्प यांनी ट्विट करत सांत्वन केले. पोस्ट केले की, ‘महान व्यक्तिमत्त्व चार्ली कर्क यांचे निधन. अमेरिकेतील तरुणांचे हृदय चार्लीपेक्षा चांगले कोणीही समजू शकत नव्हते. सर्वजण त्यांच्यावर प्रेम करत होते आणि त्यांचा आदर करत होते, विशेषतः मी. पण, आता ते आपल्यात नाही. मेलानिया आणि माझ्या संवेदना त्यांच्या पत्नी एरिका आणि कुटुंबासोबत आहेत’.

दरम्यान, अमेरिकेचे अध्यक्ष डोनाल्ड ट्रम्प यांनी पोस्ट केले की, खऱ्या महान अमेरिकन देशभक्त चार्ली कर्क यांच्या सन्मानार्थ रविवारी संध्याकाळी ६ वाजेपर्यंत संपूर्ण अमेरिकेतील सर्व अमेरिकन ध्वज अर्ध्यावर फडकवण्याचे आदेश देण्यात येत आहे.

संशयिताला पोलिसांनी घेतले ताब्यात

ट्रम्प यांनी त्यांच्या ट्रुथ सोशल अकाउंटवर लिहिले की, अमेरिकेतील तरुणांचे हृदय चार्लीपेक्षा चांगले कोणीही समजू शकत नव्हते. दरम्यान, येथील स्थानिक युटाचे महापौर डेव्हिड यंग यांनी सांगितले की, संशयित गोळीबार करणाऱ्याला अटक करण्यात आली आहे. आता याप्रकरणाचा पोलिसांकडून तपास केला जाणार आहे.