Microsoft News : मायक्रोसॉफ्टमध्ये मोठा बदल! ६० हजार कर्मचाऱ्यांसाठी एक्झिट पॅकेज

Microsoft News : मायक्रोसॉफ्टने भारतासह अमेरिका, ब्रिटन आणि कॅनडातील सुमारे ६० हजार पात्र कर्मचाऱ्यांसाठी स्वेच्छा एक्झिट योजना आणली आहे. आर्थिक मदत आणि करिअर मार्गदर्शन देणाऱ्या या योजनेमागे एआय क्षेत्रातील वाढती गुंतवणूक आणि कर्मचारी व्यवस्थापनातील बदल हे प्रमुख कारण आहे.

• ६० हजार कर्मचाऱ्यांना स्वेच्छानिवृत्तीची संधी
• आर्थिक पॅकेज आणि करियर नियोजनाची सुविधा
• AI गुंतवणुकीसाठी खर्चावर नियंत्रण

Microsoft News : जगातील आघाडीची तंत्रज्ञान कंपनी मायक्रोसॉफ्टने आपल्या कर्मचारी व्यवस्थापनात मोठा बदल करण्याचा निर्णय घेतला आहे . कंपनीकडून तब्बल ६० हजार कर्मचाऱ्यांना स्वच्छेने नोकरी सोडण्याची संधी देण्यात येत आहे . विशेष म्हणजे या योजनेत भारतातील कर्मचाऱ्यांचाही समावेश आहे . अमेरिका , ब्रिटन ,आणि कॅनडा या देशांतील पात्र कर्मचाऱ्यांनाही या योजनेचा लाभ घेता येणार आहे .

कंपनीच्या जागतिक कर्मचारी संख्येच्या सुमारे २७ टक्के कर्मचाऱ्यांना या योजनेअंतर्गत संधी मिळू शकते . मात्र याचा अर्थ ६० हजार कर्मचाऱ्यांना नोकरीवरून काढले जाणार असा नाही . ही योजना जबरदस्ती लादली जाणार नसून पात्र कर्मचाऱ्यांना आर्थिक मदत आणि करियर नियोजनासाठी सुविधा देण्यात येणार आहे .

६० हजार कर्मचाऱ्यांना स्वेच्छानिवृत्तीची संधी

मायक्रोसॉफ्टच्या मुख्य मानव संसाधन अधिकारी एमी कोलमन यांनी कर्मचाऱ्यांना पाठवलेल्या अंतर्गत संदेशातून या योजनेची माहिती दिली . कंपनीतील लेव्हल ७० आणि त्याखालील पात्र कर्मचाऱ्यांना या योजनेचा लाभ घेता येणार आहे . मात्र कंपनीतील सर्व विभागांसाठी ही योजना लागू नसेल . प्रत्येक विभागाच्या कामकाजाच्या गरजा , ग्राहकांशी संबंधित जबाबदाऱ्या आणि व्यावसायिक प्राधान्यक्रम लक्षात घेऊन पात्रता निश्चित केली जाणार आहे . पात्र कर्मचाऱ्यांना ३१ डिसेंबर पर्यंत कंपनी सोडावी लागणार आहे .

Congo News : काँगोमध्ये इबोलाचा कहर; रुग्णसंख्या १० हजारांपार; आफ्रिकेत भीतीचे वातावरण

आर्थिक पॅकेज आणि करियर नियोजनाची सुविधा

या योजनेतून कंपनी सोडणाऱ्या कर्मचाऱ्यांना आर्थिक मदत आणि करियर नियोजनासाठी आवश्यक मार्गदर्शन दिले जाणार आहे . कर्मचाऱ्यांना पुढील नोकरीच्या संधी शोधण्यासाठी तसेच करियरमधील बदलासाठी मदत केली जाणार आहे . कंपनीने याआधीही स्वेच्छानिवृत्ती योजना राबवली होती . त्या योजनेला पात्र कर्मचाऱ्यांकडून चांगला प्रतिसाद मिळाला होता . यावेळी मात्र अधिक व्यापक स्तरांवर कर्मचाऱ्यांना बाहेर पडण्याचा पर्याय देण्यात आला आहे . विशेष म्हणजे ही सक्तीची नोकरकपात नसून कर्मचाऱ्यांना स्वतःच्या इच्छेने कंपनी सोडण्याची संधी आहे .

Japan News : अमेरिकेचा चीनला मोठा धक्का! जपानमधील महत्त्वाच्या लष्करी तळावर BYD वाहनांना प्रवेशबंदी

AI गुंतवणुकीसाठी खर्चावर नियंत्रण

मायक्रोसॉफ्ट सध्या कृत्रिम बुद्धिमत्ता क्षेत्रात मोठ्या प्रमाणावर गुंतवणूक करत आहे . डेटा सेंटर , अत्याधुनिक चिप्स , सर्व्हर आणि एआय पायाभूत सुविधांच्या उभारणीसाठी कंपनीने मोठा खर्च करण्याचे नियोजन केले आहे . २०२६ या वर्षात कंपनीचा भांडवली खर्च सुमारे १७५ अब्ज डॉलरपर्यंत जाण्याचा अंदाज आहे . त्यामुळे खर्चाचे नियोजन आणि कर्मचारी व्यवस्थापनावर कंपनीचा भर वाढला आहे .

यापूर्वी जुलै महिन्यातही मायक्रोसॉफ्टने सुमारे ४ हजार ८०० पदांमध्ये कपात केली होती . आता नव्या स्वेच्छा एक्झिट योजनेमुळे कंपनीच्या कर्मचारी रचनेत आणखी बदल होण्याची शक्यता आहे . दरम्यान , भारतातील किती कर्मचारी प्रत्यक्ष या योजनेचा लाभ घेतील हे अद्याप स्पष्ट झालेले नाही .