पाकिस्तानच्या Jaffar Express मध्ये बॉम्ब ब्लास्ट, ट्रेनचे 6 डबे रूळावरून घसरले

क्वेटा येथून अपघाताची माहिती देताना पाकिस्तानी रेल्वे अधिकारी मोहम्मद काशिफ म्हणाले की, ‘रेल्वे ट्रॅकवर बॉम्ब ठेवण्यात आला होता. जाफर एक्सप्रेस तेथून जात असताना एक जोरदार बॉम्बस्फोट झाला, ज्यामुळे ट्रेनचे 6 डबे रुळावरून घसरले. तथापि, या घटनेत कोणतीही जीवितहानी किंवा मालमत्तेचे नुकसान झाले नाही.’

ट्रेनमध्ये ३५० प्रवासी

खरं तर, रविवारी, क्वेट्टाहून पेशावरला जाणारी जाफर एक्सप्रेस मास्तुंगच्या स्पाझंद स्टेशनजवळ पोहोचली. ट्रेनमध्ये सुमारे ३५० प्रवासी होते. अचानक मोठा स्फोट झाला, ज्यामुळे ट्रेनमध्ये घबराट निर्माण झाली. ट्रेनचे ६ डबे रुळावरून घसरले. शोध मोहीम हाती घेण्यात आली असून मोहम्मद काशिफच्या म्हणण्यानुसार, “घटनेची माहिती मिळताच सुरक्षा दल आणि बचाव पथके घटनास्थळी पोहोचली. परिसरात शोध मोहीम राबवण्यात आली. तासनतास कठोर परिश्रमानंतर, ट्रेनचे सर्व डबे रुळावर आणण्यात पथकांना यश आले.”

Pakistan airspace crores loss : पाकिस्तानचं निघालं दिवाळं! भारताला हवाई क्षेत्र बंद केल्याने झाले कोट्यवधींचे नुकसान

१४ ऑगस्टपर्यंत रद्द करण्यात आलेल्या गाड्या

अपघातानंतर, पाकिस्तान रेल्वेने सर्व ३५० प्रवाशांना दुसऱ्या ट्रेनने क्वेट्टाला परत पाठवले. सर्व प्रवाशांची तिकिटे देखील रद्द करण्यात आली आणि त्यांचे पैसे परत करण्यात आले आहेत. काशिफने एक निवेदन जारी करून म्हटले आहे की, या अपघातानंतर जाफर एक्सप्रेस आणि बोलन मेल १४ ऑगस्टपर्यंत रद्द करण्यात आल्या आहेत. १६ ऑगस्टपासून बोलन कराचीहून चालवली जाईल, जी दुसऱ्या दिवशी क्वेट्टाला पोहोचेल. १४ ऑगस्ट रोजी पाकिस्तानचा स्वातंत्र्य दिन साजरा केला जातो. योग्य खबरदारी म्हणून हे पाऊल उचलण्यात आले असल्याचे दिसून येत आहे.

३ दिवसांपूर्वीही स्फोट झाला होता

याशिवाय तीन दिवसांपूर्वी असाच एक अपघात झाला होता. अनेक प्रवाशांनी भरलेली जाफर एक्सप्रेस बलुचिस्तानमधील सिबी येथून जाताच, रुळावर मोठा स्फोट झाला. मात्र, तोपर्यंत ट्रेन निघून गेली होती, त्यामुळे मोठी दुर्घटना टळली. दुसरीकडे, २४ जुलै रोजी बोलन मेलमध्ये स्फोट झाला आणि २८ जुलै रोजीही स्फोटामुळे जाफर एक्सप्रेस रुळावरून घसरली. एकामागोमाग एक या दुर्घटना होत असल्याने सध्या पाकिस्तानमध्ये दहशत पसरली आहे.