
फोटो सौजन्य सोशल मीडिया
जेन्सेन हुआंग यांनी १२ नोव्हेंबर रोजी एनव्हिडियाच्या अध्यक्ष आणि मुख्य कार्यकारी अधिकारी पदाचा तातडीने राजीनामा दिला होता. कंपनीच्या नेतृत्वाखाली त्यांनी तब्बल ३३ वर्षे काम केले. त्यांच्या नेतृत्वात एनव्हिडियाने ग्राफिक्स प्रोसेसरपासून कृत्रिम बुद्धिमत्ता (AI) क्षेत्रातील आघाडीच्या कंपन्यांपर्यंत मोठी झेप घेतली.
हुआंग यांच्या राजीनाम्यानंतर कंपनीच्या मुख्य वित्त अधिकारी कोलेट क्रेस यांच्याकडे अंतरिम CEO पदाची जबाबदारी सोपवण्यात आली. कंपनीचे संचालक मंडळ कायमस्वरूपी उत्तराधिकारी शोधण्याच्या प्रक्रियेत आहे. दरम्यान, हुआंग यांनी परतण्याची तयारी दर्शवल्याने नेतृत्वबदलाचा विषय पुन्हा चर्चेत आला आहे.
World News : नाटोला रशियाचा अण्वस्त्र हल्ल्याचा इशारा; कलिनिनग्राडवरून संघर्षाची शक्यता वाढली
हुआंग यांना पुन्हा CEO पदावर आणण्याची मागणी तंत्रज्ञान क्षेत्रातील अनेक दिग्गजांनी केली आहे. एलॉन मस्क यांनीही त्यांच्या नेतृत्वाचे समर्थन केले आहे. एनव्हिडियाचे अनेक महत्त्वाचे व्यावसायिक करार आणि पुरवठा साखळीतील संबंध हुआंग यांच्या वैयक्तिक विश्वासावर आधारित असल्याचे मस्क यांनी म्हटले आहे.
अमेरिकेचे राष्ट्राध्यक्ष डोनाल्ड ट्रम्प यांनीही हुआंग पुन्हा CEO झाल्यास आपली हरकत नसल्याचे म्हटले आहे. त्यांच्या मते, हुआंग यांनी या प्रकरणातून महत्त्वाचा धडा घेतला आहे. त्यामुळे त्यांना पुन्हा संधी देण्याच्या मागणीला राजकीय आणि व्यावसायिक पातळीवरही पाठिंबा मिळताना दिसत आहे.
हुआंग यांनी तयारी दर्शवली असली, तरी एनव्हिडियाचे संचालक मंडळ त्यांना पुन्हा CEO करण्याचा विचार करत नसल्याचे वृत्त आहे. त्यांच्या राजीनाम्यामागील वैयक्तिक संबंध आणि संभाव्य राष्ट्रीय सुरक्षेशी संबंधित प्रश्नांची स्वतंत्र चौकशी सुरू आहे. या प्रकरणात कंपनीची गोपनीय माहिती किंवा अमेरिकेच्या राष्ट्रीय सुरक्षेला धोका निर्माण झाला होता का, याचीही तपासणी केली जात आहे.
हुआंग यांच्या पुनरागमनासाठी ऑनलाइन याचिकेलाही मोठा प्रतिसाद मिळाला असून, हजारो कर्मचारी आणि तंत्रज्ञान क्षेत्रातील व्यक्तींनी त्यांना पाठिंबा दर्शवला आहे. मात्र, कंपनीच्या संचालक मंडळाचा अंतिम निर्णय काय असेल, याकडे आता संपूर्ण तंत्रज्ञान उद्योगाचे लक्ष लागले आहे.