थायलंडच्या सिंहासनाची वारसदार ‘Sleeping Princess’ची जीवासाठी झुंज; 2022 पासून कोमात, आता ओढवले एक नवीन संकट

Princess Bajrakitiyabha severe infection : राजकुमारी बज्रकितियाभा नरेंद्र देवीयवती यांना राजाची मोठी मुलगी म्हणून सिंहासनाची वारस म्हणून पाहिले जाते. 2022 मध्ये, हृदयविकारामुळे त्या कोमात गेल्या.

Princess Bajrakitiyabha severe infection : थायलंडचे राजघराणे आज जगभर चर्चेत आहे. कारण, गेली तीन वर्षे कोमात असलेल्या राजकुमारी बज्रकितियाभा नरेंद्र देबयावती यांच्या प्रकृतीबाबत नवे तपशील समोर आले आहेत. ‘झोपेची राजकुमारी’ म्हणून ओळखल्या जाणाऱ्या या राजकुमारीला गंभीर संसर्ग झाला असून त्यांच्यावर उपचार सुरू आहेत. थायलंडच्या ‘रॉयल हाऊसहोल्ड ब्युरो’ने याबाबत अधिकृत निवेदन जारी केले आहे.

2022 पासून कोमात

डिसेंबर २०२२ मध्ये राजकुमारींना अचानक हृदयविकाराचा झटका आला आणि त्या कोमात गेल्या. त्यानंतर गेल्या तीन वर्षांपासून त्या वैद्यकीय उपकरणांच्या मदतीने जगत आहेत. त्यांच्या फुफ्फुस व मूत्रपिंडावर शस्त्रक्रिया करण्यात आली आहे. आता डॉक्टरांनी ९ ऑगस्ट रोजी त्यांच्या रक्तात गंभीर संसर्ग असल्याचे निदान केले आहे. संसर्ग नियंत्रित ठेवण्यासाठी त्यांना सतत अँटीबायोटिक्स आणि इतर औषधं दिली जात आहेत.

जागतिक घडामोडी संबंधित बातम्या वाचण्यासाठी येथे क्लिक करा : Trump-Putin Meeting : ‘ना युद्धबंदी ना कोणताही करार…’ ट्रम्प आणि पुतिन यांच्यातील 3 तासांच्या बैठकीत नेमके काय घडले?

सिंहासनाची वारसदार?

४६ वर्षीय बज्रकितियाभा या राजा महा वज्रलोंगकोर्न यांच्या सर्वात मोठ्या मुलगी आहेत. त्या राजाच्या पहिल्या पत्नी सोमसावली यांच्यापासून झालेल्या एकुलत्या एका मुली आहेत. राजाला इतर तीन पत्नींपासून सहा मुले आहेत, मात्र सिंहासनाचा वारसा कोणाला मिळेल याचा निर्णय अजून झालेला नाही. त्यामुळे, कोमात जाण्यापूर्वी राजकुमारी बज्रकितियाभा यांच्याकडे संभाव्य उत्तराधिकारी म्हणून पाहिले जात होते. सध्या राजा वज्रलोंगकोर्न यांचे वय ७३ वर्षे आहे. त्यांनी २०१६ मध्ये सिंहासन स्वीकारले, परंतु आजपर्यंत अधिकृत वारसदाराची घोषणा केलेली नाही. त्यामुळे राजघराण्याच्या पुढील वाटचालीबाबत संपूर्ण थायलंडमध्येच नव्हे, तर जगभरात कुतूहल आहे.

आंतरराष्ट्रीय अनुभव

राजकुमारींचा शैक्षणिक आणि व्यावसायिक प्रवास देखील उल्लेखनीय आहे. त्यांनी इंग्लंडमधील प्रतिष्ठित शाळेत शिक्षण घेतले असून कॉर्नेल विद्यापीठातून कायद्याची पदवी मिळवली आहे. त्यांनी ऑस्ट्रिया, स्लोवाकिया आणि स्लोव्हेनिया या देशांमध्ये राजदूत म्हणून जबाबदाऱ्या पार पाडल्या आहेत. तसेच, त्यांनी संयुक्त राष्ट्रसंघाच्या UN Women संस्थेत आणि अॅटर्नी जनरलच्या कार्यालयात महत्त्वपूर्ण भूमिका बजावल्या आहेत.

राजघराण्यासाठी कठीण काळ

थायलंडच्या जनतेसाठी राजकुमारी बज्रकितियाभा या केवळ सिंहासनाच्या वारसदार नाहीत, तर आशेचा किरण आहेत. गेली तीन वर्षे त्या कोमात असून, आता संसर्गामुळे त्यांची परिस्थिती अधिक गुंतागुंतीची झाली आहे. तरीही राजघराणं आणि थायलंडचे नागरिक त्यांच्या प्रकृतीत सुधारणा व्हावी अशी प्रार्थना करत आहेत.

जागतिक घडामोडी संबंधित बातम्या वाचण्यासाठी येथे क्लिक करा : Trump Putin Meeting: ‘पुढच्या वेळी मॉस्कोमध्ये…’ पुतिन यांचे ट्रम्पला थेट निमंत्रण; युक्रेन युद्धावर गरमागरम चर्चा

पुढे काय?

वैद्यकीय पथक त्यांच्यावर अत्यंत दक्षतेने उपचार करत आहे. जरी संसर्ग गंभीर स्वरूपाचा असला तरी डॉक्टरांना आशा आहे की योग्य उपचारांमुळे त्यांची प्रकृती स्थिर राहील. मात्र, थायलंडच्या भविष्यातील राजकीय व राजघराण्याच्या नेतृत्वाबाबतचे प्रश्न मात्र अजूनही अनुत्तरितच आहेत. ‘झोपेच्या राजकुमारी’ म्हणून ओळखल्या जाणाऱ्या बज्रकितियाभा यांच्या आयुष्याची ही झुंज केवळ थायलंडसाठीच नाही, तर संपूर्ण जगासाठी एका राजघराण्याच्या संघर्षाची कहाणी ठरत आहे.