रॉयल एनफिल्ड हिमालयन 750 लडाखमध्ये दाखल; आता नजर थेट फ्लॅगशिप अ‍ॅडव्हेंचर बाईकवर

लडाखच्या खडतर रस्त्यांवर रॉयल एनफिल्डची आगामी हिमालयन 750 दिसल्याने बाइकप्रेमींची उत्सुकता वाढली आहे. 750cc ट्विन-सिलिंडर इंजिनसोबत क्रूझ कंट्रोल आणि ट्रॅक्शन कंट्रोल मिळणार असल्याने ही बाईक कंपनीच्या अ‍ॅडव्हेंचर लाइनअपमध्ये किती मोठी झेप घेणार?

• रॉयल एनफिल्डने लडाखमध्ये आगामी हिमालयन 750 ची रोड-बायस्ड आवृत्ती प्रथमच सविस्तर दाखवली आहे.
• नवीन 750cc पॅरलल-ट्विन इंजिनकडून सुमारे 55hp पॉवर आणि 60 Nm टॉर्क अपेक्षित आहे.
• क्रूझ कंट्रोल, ट्रॅक्शन कंट्रोल आणि TFT कन्सोलमुळे हिमालयन 750 तंत्रज्ञानात मोठी झेप घेणार आहे.

रॉयल एनफिल्डने लेह-लडाखमध्ये आयोजित केलेल्या पहिल्या हिमालयन बेसकॅम्पमध्ये आपली आगामी हिमालयन 750 दाखवली. भारतात हिमालयन 440 लाँच केल्यानंतर लगेच या नव्या अ‍ॅडव्हेंचर बाईकचे दर्शन घडल्याने प्रीमियम मोटरसायकल सेगमेंटमध्ये उत्सुकता वाढली आहे. कंपनी ही बाईक Motoverse 2026 मध्ये ऑफीशली सादर करणार आहे.

दाखवण्यात आलेली हिमालयन 750 ही रोड-बायस्ड आवृत्ती असून तिला अलॉय व्हील्स देण्यात आले आहेत. यापूर्वी ब्राझीलमध्ये स्पोक व्हील्ससह अधिक ऑफ-रोड केंद्रित आवृत्तीही पाहायला मिळाली होती. बाईकला नवीन डिझाइन, LED हेडलॅम्प, मोठे टँक श्राउड, उंच विंडस्क्रीन, स्प्लिट सीट, अपस्वेप्ट एक्झॉस्ट आणि सामानासाठी मागील रॅक मिळतो.

१० वर्षांनंतर ‘OG’ हिमालयनचा नवा अवतार! रॉयल एनफिल्ड Himalayan 440 लाँच; ₹२.२९ लाखांत क्लासिक ॲडव्हेंचर बाईकची रिएंट्री

750cc इंजिनसोबत दमदार हार्डवेअर

हिमालयन 750 मध्ये नवीन 750cc पॅरलल-ट्विन, एअर-अँड-ऑइल-कूल्ड इंजिन आणि 6-स्पीड गिअरबॉक्स मिळण्याची शक्यता आहे. अधिकृत पॉवर आणि टॉर्क आकडे अद्याप जाहीर झालेले नाहीत; मात्र अंदाजे 55hp आणि 60 Nm आउटपुट अपेक्षित आहे. समोर इन्व्हर्टेड फोर्क आणि मागे रिमोट-ऍडजस्टेबल मोनोशॉक देण्यात आला आहे.

बाईकला 19-इंच पुढचे आणि 17-इंच मागचे अलॉय व्हील्स, ड्युअल फ्रंट डिस्क आणि मागील डिस्क ब्रेक मिळतात. ड्युअल-चॅनल ABS सोबत निवडक ABS मोड्सची सुविधाही अपेक्षित आहे. यामुळे लांब पल्ल्याच्या प्रवासासोबत खराब रस्ते आणि साहसी रायडिंगसाठीही बाईक सक्षम ठरू शकते.

Royal Enfield August 2026 Sales: ऑगस्ट २०२६ मध्ये रॉयल एनफिल्डचा धमाका! विक्रीत ११% वाढ, १.२६ लाख दुचाकींची विक्री

टेक्नोलॉजीतही मोठी झेप

4-इंच राउंड TFT डिस्प्लेमध्ये ब्लूटूथ कनेक्टिव्हिटी, Google Maps मिररिंग आणि कॉल-SMS अलर्ट मिळतील. विशेष म्हणजे रॉयल एनफिल्डच्या अ‍ॅडव्हेंचर बाईक लाइनअपमध्ये प्रथमच क्रूझ कंट्रोल आणि ट्रॅक्शन कंट्रोल येणार आहेत.

हिमालयन 750 चे प्रोडक्शन मॉडेल 27 ते 29 नोव्हेंबर 2026 दरम्यान गोव्यात होणाऱ्या Motoverse 2026 मध्ये लॉन्च होण्याची शक्यता आहे. किंमत जाहीर नाही; पण अंदाजे ₹4.5 लाख एक्स-शोरूम अपेक्षित आहे. लॉन्चनंतर तिची स्पर्धा BMW F 450 GS, Honda NX500 आणि आगामी Norton Atlas सोबत होऊ शकते.