गाडी असावी तर सेडानसारखीच! स्कोडा इंडिया ब्रँड डायरेक्टर आशिष गुप्ता यांची भूमिका

बाजारात सध्या एसयूव्हींचा बोलबाला असतानाच एका प्रमुख वाहन उत्पादक ब्रँडने सेडान गाड्यांबाबत अत्यंत महत्त्वाचा दावा केला आहे. एसयूव्हींच्या प्रचंड वाढीनंतरही सेडानचे स्थान का अबाधित राहील आणि भविष्यात या सेगमेंटमध्ये कोणता मोठा बदल पाहायला मिळेल, यावर कंपनीच्या प्रमुखांनी मांडलेली भूमिका सध्या चर्चेत आली आहे.

• एसयूव्हींच्या वाढत्या प्रभावानंतरही सेडान हीच परिपूर्ण कार म्हणून टिकून राहील असा विश्वास स्कोडाने व्यक्त केला.
• स्कोडा स्लाव्हियाचा भारतीय सेडान सेगमेंटमध्ये तब्बल ३० टक्के वाटा असून कंपनीने नवीन मॉडेल्स लाँच केली आहेत.
• भविष्यात एसयूव्हींच्या एकाच प्रकारच्या डिझाइनला कंटाळलेले ग्राहक पुन्हा सेडान खरेदीला प्राधान्य देतील असा अंदाज आहे.

भारतीय ऑटोमोबाईल बाजारात सध्या एसयूव्हींचा मोठा बोलबाला असला, तरी स्कोडा ऑटो इंडियाने सेडान गाड्यांवरील आपला विश्वास कायम ठेवला आहे. स्कोडाच्या ‘स्लाव्हिया फेसलिफ्ट’, ‘सुपर्ब डिझेल’ आणि ‘ऑक्टाव्हिया आरएस’ या तीन नवीन सेडान गाड्यांच्या आगमनानंतर, स्कोडा इंडियाचे ब्रँड डायरेक्टर आशिष गुप्ता म्हणाले, “बाजाराचा कल बदलला असला, तरीही ‘सेडान’ हीच खरी आणि परिपूर्ण कार म्हणून टिकून आहे.”

सेडानची क्रेझ आणि स्कोडाचा वाटा

गुप्ता यांच्या मते, प्रीमियम सेडान सेगमेंटचा भारतीय बाजारात दरमहा ४,००० ते ४,५०० युनिट्सचा वाटा आहे. यामध्ये एकट्या ‘स्कोडा स्लाव्हिया’चा वाटा तब्बल ३० टक्के इतका आहे. सेडान गाड्यांचे उत्तम ड्रायव्हिंग डायनॅमिक्स, अप्रतिम लूक आणि आरामदायी अनुभव यामुळे ही गाडी चालवण्याचा व मालकी हक्क असण्याचा आनंद वेगळाच असतो.

महिंद्रा XEV 9e आता मार्केटमध्ये येणार ६-सीटर अवतारात! पाहा काय आहेत खास फीचर्स आणि इंटेरियर!

एसयूव्हीच्या गर्दीत सेडानचा मार्ग कसा असणार?

ऑटोमोबाईल कंपन्यांनी आपला संपूर्ण लक्ष एसयूव्ही निर्मितीवर केंद्रित केल्यामुळे सेडान सेगमेंटचा विस्तार काहीसा मंदावला असल्याचे गुप्ता यांनी मान्य केले. मात्र, येत्या काळात जेव्हा ग्राहक एसयूव्हींच्या एकाच प्रकारच्या डिझाइनला कंटाळतील, तेव्हा सेडानला पुन्हा मोठी मागणी येईल, असा विश्वास त्यांनी व्यक्त केला. विशेषतः, ज्या कुटुंबांकडे एकापेक्षा जास्त गाड्या आहेत, ते विविधतेसाठी सेडान खरेदीला प्राधान्य देतील.

भारतीय बाजारात लाँच होण्यापूर्वी Jetour T2 Plug-In Hybrid SUV ला परदेशात मिळाला मोठा अपडेट! जाणून घ्या माहिती

स्कोडाचे भारतीय बाजारातील सेडान पोर्टफोलिओ

• स्कोडा स्लाव्हिया : ही एंट्री-लेव्हल मास-मार्केट सेडान असून कंपनी लवकरच याचे सीएनजी व्हर्जन आणण्याच्या तयारीत आहे.
• स्कोडा सुपर्ब डिझेल: २०२७ पर्यंत ही लक्झरी सेडान टॉप-स्पेक्ट ‘L&K’ ट्रिममध्ये भारतात दाखल होईल. २०२० नंतर स्कोडाची ही पहिलीच डिझेल कार असेल.
• स्कोडा ऑक्टाव्हिया आरएस: स्पीड आणि परफॉर्मन्सची आवड असणाऱ्या ग्राहकांसाठी ही स्पोर्ट्स सेडान ५० युनिट्सच्या मर्यादित संख्येत उपलब्ध केली जाईल.

याशिवाय, भारत आणि युरोपियन युनियन मधील प्रस्तावित मुक्त व्यापार करारामुळे भविष्यात परदेशातून आयात केल्या जाणाऱ्या प्रीमियम गाड्यांच्या किंमती आणि आयात शुल्कात मोठा दिलासा मिळण्याची शक्यताही गुप्ता यांनी वर्तवली आहे.