नेक्सॉन, ब्रेझाला टक्कर द्यायला येतेय फोक्सवॅगनची नवीन सब- कंपॅक्ट ४ मीटर SUV; कंपनीकडून अधिकृत घोषणा! 2027 मध्ये होणार लाँच!

भारतीय ऑटो बाजारात वाढती स्पर्धा पाहता एका प्रसिद्ध जर्मन कार उत्पादक ब्रँडने मोठ्या लाँचिंगची तयारी पूर्ण केली आहे. अत्यंत लोकप्रिय ठरत असलेल्या एका खास सेगमेंटमध्ये ही कंपनी कधी आणि कोणते नवीन मॉडेल घेऊन उतरणार, याबाबत अधिकृत माहिती समोर आल्याने वाहनप्रेमींमध्ये मोठी उत्सुकता निर्माण झाली आहे.

• फोक्सवॅगनने भारतीय बाजारासाठी नवीन सब-४ मीटर कंपॅक्ट एसयूव्ही २०२७ मध्ये लाँच करण्याची अधिकृत घोषणा केली.
• ही नवीन एसयूव्ही स्कोडा कायलाकप्रमाणेच खास भारतासाठी बनवलेल्या ‘MQB-A0-IN’ प्लॅटफॉर्मवर आधारित असेल.
• स्थानिक पातळीवर निर्मिती केली जाणारी ही कार जर्मन इंजिनिअरिंगसह ग्राहकांसाठी अत्यंत परवडणारा पर्याय ठरेल.

फोक्सवॅगन इंडियाने अखेर भारतीय ऑटोमोबाईल बाजारात आपल्या नवीन सब-४ मीटर कंपॅक्ट एसयूव्हीच्या लाँचची ऑफीशल घोषणा केली आहे. ही मोस्ट अवेटेड एसयूव्ही २०२७ मध्ये भारतीय बाजारात दाखल होणार आहे. ही कार स्कोडा कायलाकप्रमाणेच ‘MQB-A0-IN’ या प्लॅटफॉर्मवर आधारित असेल. भारतातील सामान्य ग्राहकांसाठी ही फोक्सवॅगनची सर्वात परवडणारी जर्मन इंजिनिअरिंग असलेली एसयूव्ही ठरेल.

भारतात निर्मिती आणि जर्मन तंत्रज्ञान

ही नवीन एसयूव्ही पूर्णपणे भारतात तयार केली जाणार असून, त्यात उच्च दर्जाच्या स्थानिक भागांचा वापर केला जाईल. फोक्सवॅगन आपल्या जर्मन इंजिनिअरिंग, चांगली बिल्ड क्वालिटी आणि सुरक्षेच्या वैशिष्ट्यांसह या सेगमेंटमध्ये मोठे आव्हान उभे करण्याच्या तयारीत आहे. जरी कंपनीने या कारचे नाव, डिझाइन आणि फीचर्स अजून सिक्रेट ठेवले असले, तरी तिची रचना स्कोडा कायलाकपेक्षा वेगळी आणि फोक्सवॅगनच्या सिग्नेचर स्टाईलमध्ये असेल.

महिंद्रा XEV 9e आता मार्केटमध्ये येणार ६-सीटर अवतारात! पाहा काय आहेत खास फीचर्स आणि इंटेरियर!

इंजिन आणि गिअरबॉक्स कसा असेल?

कंपनीने ऑफीशली इंजिनची माहिती दिलेली नसली, तरी यात १.०-लिटर ३-सिलेंडर TSI टर्बो पेट्रोल इंजिन मिळण्याची दाट शक्यता आहे. यासोबत ६-स्पीड मॅन्युअल आणि ६-स्पीड टॉर्क कन्व्हर्टर ऑटोमॅटिक गिअरबॉक्सचे पर्याय दिले जाऊ शकतात.

मार्केटमधील स्थान आणि स्पर्धा

सध्या फोक्सवॅगनच्या पोर्टफोलिओमध्ये ‘टाइगुन’ ही एसयूव्ही उपलब्ध आहे. मात्र, नवीन सब-४ मीटर एसयूव्हीमुळे कंपनीला टाटा नेक्सॉन, मारुती ब्रेझा आणि ह्युंदाई वेन्यू यांसारख्या गाड्यांना थेट टक्कर देता येईल.

भारतीय बाजारात लाँच होण्यापूर्वी Jetour T2 Plug-In Hybrid SUV ला परदेशात मिळाला मोठा अपडेट! जाणून घ्या माहिती

Škoda Auto Volkswagen India चे व्यवस्थापकीय संचालक आणि सीईओ पीयूष अरोरा यांनी स्पष्ट केले की, ही कार भारतासाठी, भारतातच विकसित केली जात आहे, ज्यामुळे स्थानिक पुरवठादार नेटवर्क अधिक मजबूत होईल. फोक्सवॅगनच्या चाहत्यांसाठी २०२७ मधील ही लाँचिंग अत्यंत उत्सुकतेची ठरणार आहे.