Adani Health City : मुंबईत अदाणी ग्रुप उभारणार ‘हेल्थ सिटी’; सर्वसामान्य नागरिकांसाठी कोणत्या सुविधा असणार? वाचा सविस्तर

अदाणी समूहाचे प्रमूख गौतम अदाणी यांनी अदाणी हेल्थ सिटी एकात्मिक आरोग्य कॅम्पस सुरू करण्याची घोषणा केली आहे. 1000 खाटांची सोय उपलब्ध असलेल्या हॉस्पिटलमध्ये परवडणाऱ्या दरात उपचार मिळणार आहेत.

देशातील उद्योग क्षेत्रात आघाडीवर असलेला अदाणी समूह देशाच्या विकासात अग्रणी भूमिका बजावत आहे. समूहाच्या वतीनं सामाजिक भान देखील नेहमी जपण्यात आलं आहे. अदाणी समुहाचे प्रमुख गौतम अदाणी यांनी मुलगा जीत अदाणी यांच्या विवाहाच्या प्रसंगी दहा हजार कोटी रुपये समाजाकरिता देण्याचे जाहीर केले होते. त्याच अनुषंगानं अदाणी समूहानं ही महत्त्वाची घोषणा केली आहे. त्यानुसार अदाणी समूहाचे प्रमूख गौतम अदाणी यांनी अदाणी हेल्थ सिटी एकात्मिक आरोग्य कॅम्पस सुरू करण्याची घोषणा केली आहे.

कशी असेल अदाणी हेल्थ सिटी?
अदाणी हेल्थ सिटीची निर्मिती अदाणी ग्रुपच्या नॉन-फॉर-प्रॉफिट हेल्थकेअर शाखाद्वारे केली जाईल. त्यासाठी अदाणी समूहाने यासाठी जगातील सर्वात मोठ्या ना-नफा वैद्यकीय समूह ‘मेयो क्लिनिक’शी करार केला आहे. मुंबई आणि अहमदाबाद येथे सुपर स्पेशालिटी हॉस्पिटल तसेच वैद्यकीय महाविद्यालय उभारण्यात येणार असून 1000 खाटांची सोय उपलब्ध असलेल्या हॉस्पिटलमध्ये परवडणाऱ्या दरात उपचार मिळतील, असे अदाणी समूहाचे चेअरमन गौतम अदाणी यांनी जाहीर केले आहे.

हेल्थ सिटीची महत्त्वाची वैशिष्ट्ये
देशातील सर्व स्तरातील नागरिकांना परवडणारी, जागतिक दर्जाची वैद्यकीय सेवा आणि वैद्यकीय शिक्षण देण्यासाठी अदाणी कुटुंब खर्चाची जबाबदारी पार पाडेल. अहमदाबाद आणि मुंबईमध्ये इंटीग्रेडेट हेल्थ कॅम्पस उभारण्यासाठी अदाणी कुटुंब 6,000 कोटी रुपयांपेक्षा अधिक रक्कम देणगी स्वरुपात देणार आहेत. देशातील गावांसह शहरांमध्ये अशाच प्रकारचे इंटीग्रेडेट अदाणी हेल्थ सिटी उभारण्याची गौतम अदाणींची योजना आहे.मेडिकल कॉलेजमध्ये दरवर्षी 150 विद्यार्थांना शिक्षण घेता येईल, 80 निवासी डॉक्टरही रुग्णसेवेसाठी नेमले जाणार आहेत’अदाणी हेल्थ सिटी’ असे या प्रकल्पाचे नाव देण्यात आले आहे.

अमेरिकेतील मेयो क्लिनिकची साथ
अदाणी समूहाने या निर्मितीसाठी अमेरिकेतील प्रसिद्ध मेयो क्लिनिक ग्लोबल कन्सल्टिंग (मेयो क्लिनिक) सोबत भागीदारी केली आहे.मेयो क्लिनिक डिजिटल आणि माहिती तंत्रज्ञानावर आणि आरोग्य सेवेची गुणवत्ता वाढवण्यावर भर देईल. तसेच तंत्रज्ञानाच्या एकात्मतेबाबत तज्ज्ञांचे मार्गदर्शन मिळेल.