अदानी समूहाकडून साम्राजाचा विस्तार; 8100 कोटींमध्ये ओरिएंट सिमेंट कंपनीच्या अधिग्रहणाची घोषणा!
अदानी समूहाची कंपनी असलेल्या अंबुजा सिमेंटने ओरिएंट सिमेंट कंपनीचे अधिग्रहण करण्याची घोषणा केली आहे. सिमेंट उद्योग क्षेत्रातील कंपनीचा दबदबा वाढला आहे. या संपादनासाठी अंबुजा सिमेंट 8100 कोटी रुपये खर्च करणार आहे. कंपनी तिच्याकडे उपलब्ध असलेल्या निधीतून ही खरेदी पूर्ण करणार आहे. या संपादनानंतर, अदानी सिमेंटची एकूण परिचालन क्षमता वार्षिक ९७.४ एमटीपीए टन असेल आणि कंपनी मार्च २०२५ पर्यंत तिची उत्पादन क्षमता १०० दशलक्ष टनांपर्यंत वाढवणार आहे.
अदानी सिमेंटचा बाजार हिस्सा २ टक्क्यांनी वाढला
स्टॉक एक्स्चेंजकडे नियामक फाइलिंगमध्ये माहिती देताना अंबुजा सिमेंट कंपनीने म्हटले आहे की, ओरिएंट सिमेंटच्या अधिग्रहणामुळे अंबुजा सिमेंटला दक्षिण आणि पश्चिम भारतात त्यांची उत्पादन क्षमता वार्षिक 8.5 दशलक्ष टनांपर्यंत वाढण्यास मदत होणार आहे. तसेच अदानी सिमेंटचा बाजारहिस्सा 2 टक्क्यांनी वाढणार आहे. दरम्यान, सध्या शेअर बाजारात सुरु असलेल्या घसरणीमुळे अंबुजा सिमेंटचा शेअर १.४९ टक्क्यांच्या घसरणीसह ५६३.१५ रुपयांवर व्यवहार करत आहे.
3 ते 4 महिन्यांत अधिग्रहण पूर्ण होणार
नियामक फाइलिंगमध्ये माहिती देताना कंपनीने म्हटले आहे की, ओरिएंट सिमेंट लिमिटेडच्या 37.90 टक्के समभागांचे 7,76,49,413 इक्विटी शेअर्स खरेदी करण्यासाठी करारावर स्वाक्षरी केली आहे. याशिवाय, कंपनी 8.90 टक्के स्टेक देखील विकत घेईल जे 1,82,23,750 इक्विटी शेअर्सच्या समतुल्य आहे. याशिवाय, अंबुजा सिमेंट ओरिएट सिमेंटच्या विद्यमान भागधारकांकडून 26 टक्के स्टेक अंतर्गत 5,34,19,567 शेअर्स 395.40 रुपये प्रति शेअर या दराने खरेदी करण्याची खुली ऑफर दिली आहे. हे अधिग्रहण पुढील 3 ते 4 महिन्यांत पूर्ण होईल, असेही अंबुजा सिमेंट कंपनीकडून सांगण्यात आले आहे.
2028 पर्यंत 140 दशलक्ष टनांचे उद्दिष्ट
ओरिएंट सिमेंटच्या अधिग्रहणानंतर अंबुजा सिमेंटची वार्षिक क्षमता 2025 पर्यंत 100 दशलक्ष टनांपर्यंत पोहोचेल. कंपनीने 2028 पर्यंत ते 140 दशलक्ष टनांपर्यंत वाढवण्याचे लक्ष्य निश्चित केले आहे. यापूर्वी, अदानी समूहाने डिसेंबर 2023 मध्ये सांघी सिमेंट लिमिटेडचे अधिग्रहण केले होते. यावर्षी समूहाने पेन्ना सिमेंट खरेदीची घोषणाही केली होती. या संपादनाबाबत अंबुजा सिमेंटचे संचालक करण अदानी म्हणाले आहे की, योग्य वेळी केलेल्या या संपादनामुळे अंबुजा सिमेंटच्या वाढीला गती मिळण्यास मदत होईल आणि दोन वर्षांत क्षमता 30 दशलक्ष टनांनी वाढवता येईल.
