शेअर बाजारातील गुंतवणूकदारांसाठी दिलासादायक बातमी; सेन्सेक्स 650 अकांनी वधारला, निफ्टी 16000 च्या पार

गुंतवणूकदारांसाठी आज चांगला दिवस आहे. सलग आठवडाभर शेअर बाजार पहिल्या सत्रात कोसळत होता. आठवड्याभरापासून सुरू असलेल्या पडझडीला अखेर ब्रेक लागला असून, सेन्सेक्स 650 अंकांनी वधारला आहे.

मुंबई : जागतिक बाजारात घडत असलेल्या सकारात्मक घडामोडींचा परिणाम आज भारतीय शेअर बाजारात देखील दिसून येत आहे. सलग आठवडाभर शेअर बाजार पहिल्या सत्रात कोसळत होता. मात्र आठवड्याभरापासून सुरू असलेल्या पडझडीला अखेर ब्रेक लागला असून, सेन्सेक्स 650 अंकांनी वधारला आहे. पहिल्याच सत्रात सेन्सक्सने (Sensex) 650 अकांची उसळी घेतली आहे. तसेच निफ्टीमध्ये देखील मोठी वाढ पहायला मिळत असून, निफ्टीने आज 16 हजारांचा टप्पा ओलांडला आहे.

बाजारावरील विक्रीचा दबाव कमी झाला असून, खरेदीदारांमध्ये वाढ झाली आहे. सध्या बँक, एफएमसीजी, मेटल यांच्यासोबत आज सर्वच क्षेत्रातील कंपन्या या वर जाताना दिसत आहेत. बऱ्याच दिवसांनी शेअर बाजारात हिरवे निशाण दिसत असल्याने गुंतवणूकदारांना दिलासा मिळाला आहे.

गुंतवणूकदारांना मोठा दिलासा मिळाला आहे

सोमवारी पहिल्या सत्रात मोठी पडझड दिसून येत होती. मात्र त्यानंतर शेअर बाजार या पडझडीतून सावरला. तरी देखील 164 अकांच्या घसरणीसह बंद झाला. मंगळवार आणि बुधवारी देखील सेन्सेक्स कोसळला होता. गुरुवारी सेन्सेक्समध्ये 1,158 अंकांची घसरण झाली. सेन्सेक्स 1,158 अंकाच्या घसरणीसह बंद झाला. मात्र आज काल झालेल्या घसरणीला मागे टाकत सेन्सेक्सने उसळी घेतल्याने गुंतवणूकदारांना मोठा दिलासा मिळाला आहे.

रुपयामध्ये सुधारणा झाल्याचे दिसून येत आहे

आज रुपयामध्ये सुधारणा झाल्याने त्याचा सकारात्मक परिणाम हा शेअर मार्केटमध्ये दिसून येत आहे. दरम्यान आठवडाभरापासून सूरू असलेल्या पडझडीमुळे गुंतवणूकदारांचे मोठे नुकसान झाले असून, कोट्यावधी रुपये बुडाले आहेत. आज रुपयामध्ये देखील सुधारणा झाल्याचे दिसून येत आहे. रुपयाचे मुल्य डॉलरच्या तुलनेत आठ पैशांनी वाढले. गुरुवारी रुपयाच्या मुल्यात डॉलरच्या तुलनेत तीस पैशांची घसरण झाली होती.