महाराष्ट्र तांत्रिक वस्त्रोद्योग अभियान; रोजगार निर्मिती व औद्योगिक प्रगतीला नवा मार्ग

महाराष्ट्र तांत्रिक वस्त्रोद्योग अभियानांतर्गत गुणवत्तापूर्ण उत्पादन, पर्यावरणपूरक प्रक्रिया, आणि जागतिक स्पर्धेसाठी स्थानिक उद्योगांना प्रोत्साहन देण्यात येणार आहे.

राज्यातील तांत्रिक व वस्त्रोद्योग क्षेत्राला प्रोत्साहन देण्यासाठी महाराष्ट्र सरकार “महाराष्ट्र तांत्रिक वस्त्रोद्योग अभियान” राबविणार असल्याची माहिती वस्त्रोद्योग मंत्री संजय सावकारे यांनी दिली. त्यांनी सांगितले की, जागतिक दर्जाची तांत्रिक वस्त्रोद्योग उत्पादने आणि सेवा विकसित करून महाराष्ट्राला या क्षेत्रातील राष्ट्रीय आणि आंतरराष्ट्रीय स्तरावर अग्रस्थानी आणणे हे अभियानाचे उद्दिष्ट आहे. या अभियानांतर्गत विविध पायाभूत सुविधांची उभारणी केली जाणार आहे. यामध्ये विशेष चाचणी प्रयोगशाळा, संशोधन केंद्रे, कौशल्य विकास संस्था यांचा समावेश असेल. यामुळे तांत्रिक वस्त्रोद्योगाच्या निर्मिती आणि विकासाला चालना मिळणार आहे. तसेच, तांत्रिक वस्त्रोद्योगासाठी आवश्यक प्रगत यंत्रसामग्री आणि तंत्रज्ञान हाताळण्यास सक्षम कुशल मनुष्यबळ विकसित करण्यावर भर दिला जाईल.

‘सीझनही जवळ, गुंतवणूकही कमी’; लवकर सुरु करा ‘हा’ व्यवसाय, ‘कमाई होईल अफाट, पैशांनी भरेल कपाट

मंत्री सावकारे म्हणाले की, तांत्रिक वस्त्रोद्योगातील संशोधन आणि विकासाला प्रोत्साहन देण्यासाठी सरकार विशेष निधी उपलब्ध करून देणार आहे. याशिवाय, बाजारपेठेतील प्रवेश सुलभ करण्यासाठी विविध उपक्रम राबवले जातील. तांत्रिक वस्त्रोद्योगातील उत्पादनांच्या संभाव्य उपयोग क्षमतेबाबत जागरूकता वाढवण्यासाठी शैक्षणिक संस्था आणि उद्योग यांच्यात सहकार्य सुलभ केले जाईल.

गुणवत्तापूर्ण उत्पादनांसाठी गुणवत्ता मानके आणि प्रमाणपत्रांची स्थापना करणे आणि त्यांना प्रोत्साहन देणे हा या अभियानाचा मुख्य उद्देश आहे. जागतिक स्तरावर स्पर्धा करण्यासाठी स्थानिक उत्पादने जागतिक मानकांशी सुसंगत असणे आवश्यक आहे, हे लक्षात घेऊन गुणवत्ता सुधारणे आणि प्रमाणपत्रांची प्रक्रिया सुलभ करणे यावर भर दिला जाईल. तांत्रिक वस्त्रोद्योग क्षेत्रात शाश्वतता आणि पर्यावरणपूरक उत्पादन प्रक्रियेच्या माध्यमातून नैसर्गिक साधनसंपत्तीचे संरक्षण करण्यासाठी विशेष प्रयत्न करण्यात येतील. पर्यावरणीय प्रभाव कमी करण्यासाठी पर्यावरणपूरक सामग्रीचा जास्तीत जास्त वापर होईल याची काळजी घेतली जाईल.

याशिवाय, तांत्रिक वस्त्रोद्योगात नावीन्यपूर्ण तंत्रज्ञान आणि टिकाऊ उत्पादन प्रक्रियांचा अवलंब करण्यासाठी प्रोत्साहनपर योजना आणल्या जातील. स्थानिक आणि ग्रामीण भागातील लघुउद्योग आणि नवउद्योजकांसाठी प्रशिक्षण शिबिरे, मार्गदर्शन कार्यशाळा, तसेच सवलतीच्या दरात तांत्रिक उपकरणे आणि साहित्य उपलब्ध करून दिले जाईल. यामुळे नवउद्योजकांना सुरुवातीपासूनच जागतिक स्तरावर पोहोचण्याची संधी मिळेल.

पगारावर आयुष्य भागवताय? मग, नक्की वाचा! घरबसल्या कमवाल मोठ्या रक्कमेत

या अभियानामुळे महाराष्ट्रातील तांत्रिक वस्त्रोद्योग क्षेत्राला प्रचंड गती मिळेल, असा ठाम विश्वास मंत्री सावकारे यांनी व्यक्त केला. स्थानिक उद्योगांना जागतिक बाजारपेठांमध्ये आपले स्थान निर्माण करण्यासाठी सक्षम केले जाईल आणि त्यांना निर्यातवाढीसाठी सहकार्य मिळेल, असेही त्यांनी स्पष्ट केले. या उपक्रमातून राज्यात मोठ्या प्रमाणावर रोजगार निर्मिती होईल. विशेषतः ग्रामीण भागातील युवकांना रोजगाराच्या संधी उपलब्ध होतील, ज्यामुळे शाश्वत विकासाला चालना मिळेल. अभियानातून केवळ औद्योगिक विकासाचाच नाही, तर सामाजिक आणि आर्थिक प्रगतीचाही मार्ग मोकळा होईल. तांत्रिक वस्त्रोद्योगातील महाराष्ट्राचे महत्त्व अधिक वाढून राज्य देशाच्या औद्योगिक क्षेत्रात अग्रगण्य बनण्याची शक्यता आहे, अशी अपेक्षा त्यांनी व्यक्त केली.