'Repo Rate मध्ये कोणताही बदल नाही'...., कर्जाचा EMI कमी होणार नाही, आरबीआयकडून जाहीर (फोटो सौजन्य-X)
रिझर्व्ह बँक ऑफ इंडिया (RBI) ने रेपो दर ५.५% वर कायम ठेवला आहे. चलनविषयक धोरण समिती (MPC) च्या तीन दिवसांच्या बैठकीनंतर RBI गव्हर्नर संजय मल्होत्रा यांनी आज (1 ऑक्टोबर) बैठकीत घेतलेले निर्णय जाहीर केले. मागील MPC बैठकीत व्याजदर अपरिवर्तित ठेवण्यात आले होते. MPC ने चलनविषयक धोरणाची भूमिका तटस्थ पातळीवर ठेवण्याचा निर्णय देखील घेतला. GST सुसूत्रीकरणाचा महागाईवर मध्यम परिणाम होईल आणि वापर आणि विकासाला चालना मिळेल असे RBI गव्हर्नर यांनी सांगितले.
ऑगस्टनंतर, ऑक्टोबरसाठी देखील व्याजदर ५.५% वर अपरिवर्तित ठेवण्यात आले आहेत. यापूर्वी, या वर्षी तीन वेळा रेपो दरात कपात करण्यात आली आहे, ज्यामुळे तो १०० बेसिस पॉइंट्सने कमी झाला आहे. MPC बैठकीचे निकाल जाहीर करताना, RBI गव्हर्नर संजय मल्होत्रा यांनी प्रथम देशवासियांना दसरा आणि गांधी जयंतीच्या शुभेच्छा दिल्या. त्यांनी सांगितले की, भारतीय अर्थव्यवस्था मजबूत आहे, पहिल्या तिमाहीत GDP वाढ उत्कृष्ट आहे. रेपो दर स्थिर ठेवण्याव्यतिरिक्त मध्यवर्ती बँकेने एसडीएफ दर ५.२५% आणि एमएसएफ दर ५.७५% वर कायम ठेवला आहे. एमपीसीच्या सर्व सहा सदस्यांनी बैठकीत रेपो दर अपरिवर्तित ठेवण्यास सहमती दर्शविली.
रेपो दर २५ बेसिस पॉइंट्सने कमी होण्याची अपेक्षा होती. परंतु आरबीआयने तो स्थिर ठेवला. २०२५ मध्ये मध्यवर्ती बँकेने केलेली ही चौथी कपात आहे. मागील तीन बैठकांमध्ये रेपो दर तीन वेळा कमी करण्यात आला. फेब्रुवारी, एप्रिल आणि जूनच्या बैठकांमध्ये तो सतत १०० बेसिस पॉइंट्सने ६.५०% वरून ५.५०% पर्यंत कमी करण्यात आला. तसेच ब्लूमबर्गच्या सर्वेक्षणात, ३८ पैकी २४ अर्थतज्ज्ञांना आरबीआय रेपो दर ५.५% वर स्थिर ठेवेल अशी अपेक्षा आहे, तर १४ जणांना २५ बेसिस पॉइंट्स कपातीची अपेक्षा आहे.
यासंदर्भात गव्हर्नर संजय मल्होत्रा यांनी सांगितले की, एकूण चलनवाढीचा अंदाज अधिक अनुकूल झाला आहे आणि अन्नधान्याच्या किमतींमध्ये झपाट्याने घट झाली आहे. परिणामी, मध्यवर्ती बँकेने या वर्षासाठीचा सरासरी प्रमुख चलनवाढीचा अंदाज ३.१% वरून २.६% पर्यंत कमी केला आहे. पूर्वी अंमलात आणलेल्या धोरणात्मक कृतींचे परिणाम दिसू लागले आहेत. जागतिक अनिश्चितता आणि शुल्काशी संबंधित अडथळे या वर्षी विकास मंदावू शकतात. त्यांनी पुढे सांगितले की, पुढील कारवाईचा निर्णय घेण्यापूर्वी चलनविषयक धोरण समितीने धोरणात्मक उपाययोजनांच्या परिणामाची वाट पाहण्याचा निर्णय घेतला आहे.
रेपो दर कमी केल्याने तुमचा कर्जाचा ईएमआय कसा कमी होईल? रेपो रेट हा व्याजदर आहे ज्यावर आरबीआय देशातील सर्व बँकांना कर्ज देते आणि या दरातील चढ-उतारांचा थेट परिणाम कर्ज घेणाऱ्या ग्राहकांवर होतो. कारण जेव्हा रिझर्व्ह बँक हा रेपो रेट कमी करण्याचा निर्णय घेते, म्हणजेच रेपो रेट कमी करते, तेव्हा बँकांना स्वस्त कर्ज मिळते आणि ते व्याजदर कमी करून गृहकर्ज, वाहन कर्ज आणि वैयक्तिक कर्ज घेणाऱ्या ग्राहकांना भेटवस्तू देतात. तर जेव्हा हा दर वाढतो तेव्हा बँका कर्जावरील व्याजदर वाढवण्याचा निर्णय घेतात.
.png "Videos"){kind=small}
