(फोटो सौजन्य - सोशल मीडिया)
चंद्रशेखरन यांनी १९८७ मध्ये टाटा ग्रुपसोबत आपल्या प्रवासाला सुरुवात केली. ते २००९ मध्ये TCSचे सीईओ झाले आणि २०१७ मध्ये त्यांनी टाटा सन्सच्या चेअरमनपदाची धुरा स्विकारली. त्यांच्या नेतृत्वाखाली, टाटा ग्रुपने विमान वाहतूक, इलेक्ट्रिक वाहने, सेमीकंडक्टर, बॅटरी आणि डिजिटल व्यवसायांसह अनेक नवीन क्षेत्रांमध्ये मोठी गुंतवणूक केली. चांगल्या लेव्हलवर कंपनी नेण्याचा त्यांनी प्रयत्न केला.
चंद्रशेखरन यांच्या निर्णयाचा परिणाम आज शेअर बाजारावरही मोठ्या प्रमाणात दिसून आला. टाटा समूहाच्या लिस्टींग कंपन्यांच्या शेअर्समध्ये मोठी घसरण झाली आणि समूहाच्या कंपन्यांचे एकत्रित मार्केट कॅपिटल अंदाजे ६८,००० कोटी रुपयांनी घटले. सर्वाधिक फटका बसलेल्या कंपन्यांमध्ये TCS चा समावेश होता, तिच्या शेअरमध्ये अंदाजे ४.८% इतकी घसरण झाली. टायटन, टाटा स्टील, टाटा कंझ्युमर प्रॉडक्ट्स, टाटा पॉवर आणि इंडियन हॉटेल्ससह इतर अनेक कंपन्यांच्या शेअर्सवरही दबाव आला. पण काही टाटा कंपन्यांच्या शेअर्समध्ये वाढही दिसून आली.
चंद्रशेखरन यांच्या पुनर्नियुक्तीवरून टाटा सन्स आणि टाटा ट्रस्ट्स यांच्यात मतभेद असल्याच्या बातम्या काही काळापासून बऱ्याच पसरत आहेत. बाजारातील सूत्रांनुसार, टाटा ट्रस्ट्सचे अध्यक्ष नोएल टाटा यांनी टाटा सन्सच्या संभाव्य भविष्यातील सूचीकरणासह काही अटींवर चर्चा केली. संचालक मंडळातील प्रतिनिधित्व आणि समूहाच्या भविष्यातील धोरणाबाबतही मतभेद असल्याचे वृत्त आहे. पण या मुद्द्यांवर टाटा समूहाकडून कोणतीही सविस्तर अधिकृत पुष्टी मिळालेली नाही.
टाटा सन्स ही टाटा समूहाची प्रमुख होल्डिंग कंपनी असून, यामध्ये टीसीएस, टाटा मोटर्स आणि एअर इंडियासह ३० हून अधिक कंपन्यांचा समावेश आहे. टाटा सन्समध्ये टाटा ट्रस्ट्सची अंदाजे ६६% हिस्सेदारी आहे.
चंद्रशेखरन यांचा हा निर्णय अशा वेळी आला आहे, जेव्हा एअर इंडिया, टीसीएस आणि जॅग्वार लँड रोव्हरसह समूहातील अनेक कंपन्या विविध व्यावसायिक आव्हानांना तोंड देत आहेत. आता बाजाराचे लक्ष १८ ऑगस्टच्या वार्षिक सर्वसाधारण सभेवर आणि नवीन अध्यक्षांच्या नियुक्तीवर असेल. तज्ज्ञांच्या मते, सध्याची घसरण ही व्यवसायातील अचानक आलेल्या कमकुवतपणामुळे नसून, नेतृत्वाच्या अनिश्चिततेवर बाजाराने दिलेली प्रतिक्रिया म्हणून पाहिली जात आहे.
.png "Videos"){kind=small}
